01 apríl 2026
/
Heilbrigðisþjónustan sett í forgang í fjármálaáætlun 2027–2031
Í fjármálaáætlun ríkisstjórnarinnar fyrir árin 2027–2031 er lögð skýr og markviss áhersla á uppbyggingu heilbrigðisþjónustu um land allt. Með áætluninni eru stigin stór skref í átt að sterkari, aðgengilegri og skilvirkari heilbrigðisþjónustu sem mætir þörfum landsmanna til framtíðar.
Gert er ráð fyrir verulegri aukningu á framlögum til heilbrigðismála, en fjárheimildir til málaflokksins hækka um 32 milljarða árið 2027 frá árinu 2025 og gert er ráð fyrir áframhaldandi aukningu á öllu tímabili áætlunarinnar. Með þessum viðbótarfjármunum er lagður grunnur að víðtækum umbótum sem miða að því að stytta biðtíma, bæta þjónustu og styrkja innviði kerfisins.
„Við setjum heilbrigðisþjónustuna í forgang og tryggjum henni aukið fjármagn til að mæta vaxandi þörfum samfélagsins. Markmiðið er skýrt: að bæta aðgengi, efla gæði þjónustunnar og styðja við starfsfólk heilbrigðiskerfisins um allt land,“ segir Alma D. Möller heilbrigðisráðherra.
Álagi létt af bráðamóttöku
Með fjármálaáætluninni er sérstaklega ráðist í aðgerðir til að létta álagi af bráðamóttöku Landspítala. Fjármögnuð verður ný matsdeild sem mun gegna lykilhlutverki í að bæta flæði sjúklinga og tryggja að þeir fái viðeigandi þjónustu á réttum stað og tíma. Þá er stefnt að því að hefja rekstur heimaspítala í samvinnu Landspítalans og heimahjúkrunar.
Samhliða er gert ráð fyrir stórfelldri fjölgun hjúkrunarrýma sem mun draga úr álagi á sjúkrahús um allt land, flýta fyrir útskriftum og auka lífsgæði þeirra sem þurfa á langvarandi umönnun að halda.
Efling heilsugæslu og menntunar
Heilsugæslan verður efld með markvissum umbótaverkefnum og auknu fjármagni til sérnáms, meðal annars í heimilislækningum. Markmiðið er að fjölga heimilislæknum á landinu eins hratt og auðið þannig að allir landsmenn fái heimilislækni en það mun taka nokkur ár. Með því er stefnt að því að styrkja fyrsta viðkomustað fólks í heilbrigðiskerfinu og bæta samfellu í þjónustu. Aukin áhersla á menntun og sérhæfingu heilbrigðisstarfsfólks er lykilatriði í áætluninni, enda er tryggt að kerfið búi yfir nægilegri þekkingu og getu til að mæta fjölbreyttum áskorunum framtíðarinnar.
Uppbygging heilbrigðisinnviða um land allt
Á þessu ári verður byrjað á viðbyggingu við Sjúkrahúsið á Akureyri samhliða uppbyggingu nýs Landspítala. Með þessum framkvæmdum er markvisst unnið að því að efla heilbrigðisþjónustu bæði á landsbyggðinni og á höfuðborgarsvæðinu og tryggja betra aðgengi að sérhæfðri þjónustu.
Þá er verið að hefja hönnun nýrrar viðbyggingar við heilbrigðisstofnun Suðurlands á Selfossi og tvöföldun heilsugæslustöðvar Miðbæjar í Reykjavík.
Markviss stytting biðlista
Mikil áhersla er lögð á að stytta biðlista með viðbótarfjármagni og markvissum aðgerðum til að auka samhæfinu og skilvirkni. Sérstök áhersla verður á að draga úr biðtíma barna, enda brýnt að tryggja skjótan aðgang yngstu sjúklinganna að nauðsynlegri þjónustu.
Aukið fé til lyfja og endurhæfingar
Þá er gert ráð fyrir auknum fjármunum til lyfjakaupa og endurhæfingar samhliða áframhaldandi gæða- og umbótavinnu innan kerfisins. Með því er leitast við að bæta árangur meðferða, styðja við bataferli sjúklinga og auka sjálfbærni heilbrigðisþjónustunnar til lengri tíma.
Fjármálaáætlunin endurspeglar heildstæða sýn um öflugt og framtíðarmiðað heilbrigðiskerfi þar sem áhersla er lögð á aðgengi, gæði og jafnræði. Með markvissri fjárfestingu í innviðum, mannauði og þjónustu er stefnt að því að tryggja landsmönnum örugga og skilvirka heilbrigðisþjónustu til framtíðar.