Ísland áfram meðal fremstu ríkja í réttindum hinsegin fólks

Ísland heldur þriðja sætinu á Regnbogakorti ILGA, samtaka yfir réttindi hinsegin fólks í Evrópu og Mið-Asíu árið 2026. Spánn fer úr fimmta sæti í það fyrsta, Malta fylgir í kjölfarið eftir tíu ár í fyrsta sæti og svo koma Ísland, Belgía og Danmörk. Ísland hefur frá árinu 2018 farið úr 18. sæti í það þriðja.  

Ísland bætir við sig tveimur prósentustigum frá fyrra ári vegna aðgerða innan nýrrar aðgerðaáætlunar í málefnum hinsegin fólks fyrir árin 2026 til 2029 og uppfyllir nú um 86% viðmiða ILGA um réttindi hinsegin fólks. Til samanburðar uppfylla Evrópulönd að meðaltali 43% viðmiða samtakanna og ríki Evrópusambandsins 52%.  

Réttindakort transfólks í Evrópu (TGEU) sýnir á sama hátt stöðu trans fólks og þar er Ísland í efsta sæti eins og undanfarin ár.  

Regnbogakortið sýnir á myndrænan hátt réttindi og stöðu hinsegin fólks í 49 aðildarríkjum ILGA eftir 76 viðmiðum innan sjö þemaflokka. Kortið er birt ár hvert í kringum IDAHOT, alþjóðlegan baráttudag hinsegin fólks. Haldið verður upp á daginn með fjölbreyttri baráttudagskrá í Kaupmannahöfn þann 19. maí næstkomandi.  

Áhyggjur af bakslagi víða í Evrópu 

Í fréttatilkynningu ILGA kemur fram að hagur hinsegin fólks fari almennt versnandi í mörgum aðildarríkjum samtakanna, meðal annars í Þýskalandi, Slóvakíu og Tyrklandi. Á því séu þó ánægjulegar undantekningar á borð við hástökk Spánar og Svíþjóðar á kortinu. Svíþjóð færist upp um þrjú sæti frá því í fyrra og er nú í níunda sæti. Rússland hefur vermt neðsta sæti Regnbogakortsins frá árinu 2024.  

Þorbjörg Sigríður Gunnlaugsdóttir dóms- og jafnréttisráðherra lýsir yfir ánægju sinni með viðurkenningu ILGA á lagalegum umbótum í þágu hinsegin fólks á Íslandi.  

„Íslendingar hafa náð langt í réttindabaráttu hinsegin fólks og það skiptir máli að sjá þann árangur endurspeglast í alþjóðlegum samanburði. En við megum ekki líta svo á að þessari vegferð sé lokið. Við sjáum víða í Evrópu bakslag í réttindum hinsegin fólks og við finnum líka fyrir harðari orðræðu og aukinni andstöðu hér á landi. Þess vegna skiptir máli að standa vörð um þau réttindi sem hafa unnist og halda áfram að sækja fram. Næsta skref er að halda áfram með metnaðarfulla aðgerðaráætlun okkar og tryggja að hinsegin fólk njóti sömu réttinda, öryggis, virðingar og tækifæra og aðrir í íslensku samfélagi,“ segir ráðherra.