Ársskýrsla TR: 86.000 einstaklingar og fleiri en ein milljón innskráninga

Tæplega 86.000 einstaklingar fengu greiðslur frá Tryggingastofnun (TR) í fyrra og voru ellilífeyrisþegar rúmlega helmingur þeirra. Ríflega 20.000 einstaklingar fengu greiddan örorkulífeyri og um 8.600 einstaklingar sjúkra- og endurhæfingargreiðslur. Heildargreiðslur TR námu tæplega 250 milljörðum króna á árinu. Þetta kom fram á ársfundi TR sem haldinn var fyrir skemmstu. Samhliða kom ársskýrsla stofnunarinnar út.

• Ársskýrsla TR 2025

• Frétt TR um ársfundinn

Umfangsmiklar kerfisbreytingar

Eitt stærsta umbótaverkefni í almannatryggingum í áratugi – var innleiðing nýs kerfis örorku og endurhæfingar sem tók gildi 1. september 2025. TR bara ábyrgð á innleiðingunni og þakkaði Ragnar Þór Ingólfsson, félags- og húsnæðismálaráðherra, starfsfólki TR fyrir að hafa sinnt verkefninu af ábyrgð og fagmennsku og sýnt af sér bæði seiglu og ríka þjónustulund.

Nýtt kerfi byggir á breyttri hugmyndafræði þar sem færni og þátttaka einstaklinga er metin í heildrænu samhengi. Innleiðing samþætts sérfræðimats, byggðu á ICF-kerfi Alþjóðaheilbrigðismálastofnunarinnar, markar grundvallarbreytingu frá fyrra matskerfi. Jafnframt urðu til nýir greiðsluflokkar og samstarf milli þjónustuaðila innan velferðar- og heilbrigðiskerfisins var aukið, meðal annars með stofnun svæðisbundinna samhæfingarteyma um allt land sem TR leiðir.

Margvísleg tölfræði í ársskýrslu stofnunarinnar

Greiðslur 2025

Í ársskýrslu TR er margvíslega tölfræði að finna.

• Greiðslur vegna ellilífeyris námu 122,6 milljörðum króna

• Greiðslur vegna örorkulífeyris námu 85,3 milljörðum króna 

• Sjúkra – og endurhæfingargreiðslur námu 28,4 milljörðum króna 

• Aðrar greiðslur námu 13,2 milljörðum króna. 

Fjöldi stöðugilda óbreyttur

• Í árslok 2025 störfuðu 111 starfsmenn hjá TR í 102,4 stöðugildum. 

• Á sama tíma og viðskiptavinum hefur fjölgað um rúm 22% á síðustu tíu árum hefur fjöldi stöðugilda staðið nær óbreyttur. 

Rúmlega 78.000 símtöl og fleiri en ein milljón innskráninga

• Á árinu 2025 afgreiddi TR tæplega 33.000 erindi og tók á móti rúmlega 78.000 símtölum. Yfir 22.000 viðtöl fóru fram í þjónustumiðstöðinni. 

• Stafræn þjónusta hefur jafnframt vaxið hratt. Fleiri en ein milljón innskráningar voru á Mínum síðum TR og heimsóknir á vefinn tr.is voru ríflega 1,2 milljónir á árinu.