Mikill munur á einkunnadreifingu milli grunnskóla

Mennta- og barnamálaráðuneytið hefur tekið saman gögn um dreifingu lokaeinkunna í grunnskólum landsins. Gögnin sýna mikinn mun á einkunnadreifingu milli grunnskóla. Hlutfall nemenda sem fá A í lokaeinkunn nær frá 0% upp í 56,7% eftir skólum.

Tilefnið er fyrirspurn frá Alþingi þess efnis. Kallað var eftir hlutfalli nemenda í hverjum grunnskóla sem fékk A, B+, B, C+, C og D í lokaeinkunn við útskrift í 10. bekk vorin 2023–2026.

Smellt er á mynd til að stækka.

 

Ljóst er að mikill munur milli skóla ræðst varla eingöngu af frammistöðu nemenda heldur virðist hann gefa til kynna ósamræmi í einkunnagjöf milli skóla. Lokaeinkunnin hefur áhrif á í hvaða framhaldsskóla nemendur komast og því getur ósamræmið þar með leitt til mismununar á tækifærum til náms eftir búsetu.

Í sl. mánuði voru í fyrsta sinn kynntar niðurstöður stöðu- og framvinduprófa í lesskilningi og stærðfræði í grunnskólum landsins. Prófin eru hluti af Matsferli, samræmdu námsmati sem styður við betri yfirsýn yfir stöðu og framvindu nemenda í námi. Vonir standa til að prófin ýti undir samræmdari einkunnagjöf á milli skóla en jafnframt stendur til að skoða hvort ganga þurfi lengra í samræmdum prófum til að einkunnagjöf endurspegli betur raunverulega frammistöðu nemenda.

Þar að auki kynnti mennta- og barnamálaráðuneytið fyrirhugaðar breytingar á námsmati í grunnskóla til umsagnar í Samráðsgátt stjórnvalda í lok maí. Þær fela í sér afnám einkunnagjafar í bókstöfum og upptöku einkunnagjafar í tölustöfum. Þessar niðurstöður um einkunnadreifingu í grunnskólum eru mikilvægt innlegg í vinnu ráðuneytisins við endurskoðun námsmatsins. Þær draga skýlaust fram mikilvægi þess að námsmati fylgi skýr hæfni – og matsviðmið og eftirfylgni til að tryggja samræmi milli skóla.

• Svar mennta- og barnamálaráðherra við fyrirspurn Sigríðar Andersen

Uppfært 1.7.26 kl. 14:57