Ríkisstjórnin kynnti áherslumál vetrarins

Formenn ríkisstjórnarflokkanna, Kristrún Frostadóttir forsætisráðherra, Þorgerður Katrín Gunnarsdóttir utanríkisráðherra og Inga Sæland mennta- og barnamálaráðherra, kynntu í dag áherslumál ríkisstjórnarinnar á komandi þingvetri.

„Breiðu línurnar í vetur birtast m.a. í fyrstu hallalausu fjárlögum í tæp 10 ár sem við kynntum í gær, ári fyrr en stefnt var að á síðasta kjörtímabili. Þetta er það mikilvægasta sem ríkið getur gert til að hætta að kynda undir þenslu og verðbólgu,“ segir Kristrún Frostadóttir, forsætisráðherra.

„Við höldum áfram þríhliða samtali við ASÍ og SA og ýmis mál í þingmálaskrá hafa verið rædd á þeim vettvangi, eins og frumvarp til að draga úr vægi verðtryggingar og frumvarp um lögfestingu á viðurlögum við brotum á lágmarkskjörum launafólks. Á sama tíma styrkjum við áfram grunninn, m.a. með stórfjölgun hjúkrunarrýma, innviðafélaginu Göng og brú sem þegar er farið af stað og mikilvægum þingmálum á sviði orkumála,“ segir Kristrún.

EES-samningurinn styrktur, gagnsæi í sjávarútvegi og sanngjörn innviðagjöld

Þá eru mál sem varða almannahagsmuni, gagnsæi og samkeppni á markaði í öndvegi á þingmálaskrá. Frumvarp atvinnuvegaráðherra um eignarhald í sjávarútvegi verður lagt fram strax í haust og nýju frumvarpi um náttúru- og innviðagjald er ætlað að tryggja að ferðamenn sem njóta náttúruperla Íslands taki sanngjarnan þátt í kostnaði við vernd þeirra og uppbyggingu innviða.

Lögð er áhersla á að standa vörð um EES-samninginn í þinginu í vetur. Utanríkisráðherra mun leggja fram svokallaða Bókun 35 í haust, til að tryggja fulla virkni samningsins í þágu einstaklinga og fyrirtækja.

Öryggi borgaranna í öndvegi

Mál sem lúta að öryggi almennings verða einnig í brennidepli, m.a. með frumvarpi dómsmálaráðherra um verulega hertar aðgerðir gegn skipulagðri brotastarfsemi. Þá verða lögð fram ný heildarlög um almannavarnir auk nýrra öryggislaga.

„Við höldum áfram að standa vörð um hagsmuni Íslands, heima og úti, og byggja öruggt samfélag þar sem kerfin vinna með fólki, ekki á móti því. Þar höfum við almannahagsmuni alltaf að leiðarljósi,“ segir Þorgerður Katrín Gunnarsdóttir utanríkisráðherra.

Tekið utan um börn og ungmenni

Rík áhersla er lögð á málefni barna í nýrri þingmálaskrá. Eitt fyrsta málið á haustþingi verður ný heildarlöggjöf um barnavernd, sem felur í sér mestu breytingar á barnaverndarlögum í 20 ár. Þá mun mennta- og barnamálaráðherra leggja fram fyrstu heildstæðu aðgerðaáætlun Íslands gegn fátækt barna, fyrstu heildstæðu ungmennastefnuna og nýja löggjöf um hærri aldursmörk á samfélagsmiðlum.

Forsætisráðherra mun flytja frumvarp um almennar sanngirnisbætur, fyrir fólk sem sætt hefur óforsvaranlegri meðferð sem börn á ábyrgð hins opinbera.

Aukið húsnæðisöryggi og sterkari heilbrigðisþjónusta

Á sama tíma heldur ríkisstjórnin áfram stórfelldri uppbyggingu hjúkrunarrýma, heilbrigðisþjónusta verður styrkt með nýrri bráðamatsdeild á Landspítala og æ stærri hóp fólks tryggður fastur heimilislæknir.

Þá verða vísitöluhækkanir á húsaleigu takmarkaðar við eitt skipti á ári með nýju frumvarpi félags- og húsnæðismálaráðherra, í nafni aukins fyrirsjáanleika og húsnæðisöryggis fyrir leigjendur.

„Við ætlum að standa með börnum, fjölskyldum, öryrkjum og eldra fólki. Við ætlum að grípa börnin áður en þau falla, tryggja fólki húsnæðisöryggi og sjá til þess að þeir sem hafa skilað ævistarfi geti átt öruggt og áhyggjuminna ævikvöld,“ segir Inga Sæland mennta- og barnamálaráðherra.

Þingmálaskrá fyrir 158. löggjafarþing Alþingis veturinn 2026-2027 verður birt á morgun í heild sinni, samhliða stefnuræðu forsætisráðherra. Á skránni eru 159 þingmál, þar af 133 lagafrumvörp, 17 þingsályktunartillögur og 9 skýrslur ráðherra til Alþingis. Endurflutt þingmál eru 23 og innleiðingar sem leiða af samningnum um Evrópska efnahagssvæðið  27 talsins, sem er 50% aukning frá þingmálaskrá síðasta löggjafarþings.