Nr. 77/2024 Úrskurður

Hinn 19. janúar 2024 er kveðinn upp svohljóðandi

úrskurður nr. 77/2024

í stjórnsýslumáli nr. KNU23120048

 

Endurtekin umsókn [...]

 

I.       Málsatvik

Með úrskurði kærunefndar útlendingamála nr. 381/2022, dags. 22. september 2022, staðfesti nefndin ákvörðun Útlendingastofnunar, dags. 12. júlí 2022, um að taka umsókn einstaklings er kveðst heita [...], vera fæddur [...]og vera ríkisborgari Palestínu (hér eftir kærandi), um alþjóðlega vernd á Íslandi ekki til efnismeðferðar og vísa honum frá landinu. Kærandi var fluttur af stoðdeild ríkislögreglustjóra til Grikklands 19. október 2022. Hinn 13. nóvember 2022 kom kærandi aftur til landsins og lagði fram umsókn um alþjóðlega vernd að nýju. Með úrskurði kærunefndar útlendingamála nr. 153/2023, dags. 23. mars 2023, staðfesti nefndin ákvörðun Útlendingastofnunar, dags. 19. desember 2022, um að taka ekki til efnismeðferðar umsókn kæranda um alþjóðlega vernd á Íslandi og vísa honum frá landinu. Niðurstaða kærunefndar var birt fyrir kæranda 24. mars 2023.

Hinn 30. mars 2023 barst kærunefnd beiðni kæranda um endurupptöku sem var synjað með úrskurði nr. 289/2023, dags. 17. maí 2023. Kærandi fór sjálfviljugur úr landi með aðstoð Útlendingastofnunar 31. maí 2023. Kærandi kom til landsins í þriðja sinn 26. nóvember 2023, lagði fram endurtekna umsókn hér á landi 27. nóvember 2023 og kom til viðtals hjá lögreglu sama dag. Með ákvörðun Útlendingastofnunar, dags. 28. nóvember 2023, var endurtekinni umsókn kæranda vísað frá. Hinn 12. desember 2023 barst kærunefnd kæra vegna frávísunar á endurtekinni umsókn kæranda ásamt athugasemdum.

Umsókn kæranda byggir á 35. gr. a laga um útlendinga nr. 80/2016

II.        Málsástæður og rök kæranda

Í athugasemdum kæranda frá 12. október 2023 kemur fram að hann hafi engin gögn undir höndum og geti ekki skrifað rökstuðning úr lausu lofti. Einu upplýsingarnar sem kærandi hafi séu að kærandi hafi skilað gögnum og skriflegum staðfestingum á því að hann hafi ekki aðgang að félags- og heilbrigðisþjónustu í Grikklandi. Staðfestingarnar séu gefnar út af þar til bærum stjórnvöldum í Grikklandi og þar af leiðandi séu upplýsingar Útlendingastofnunar og kærunefndar útlendingamála um aðgengi kæranda að nauðsynlegri þjónustu í Grikklandi ekki réttar. Útlendingastofnun hafi tekið ákvörðun án þess að rannsaka gögn og sannreyna sannleiksgildi upplýsinga sem stofnunin byggir ákvarðanir á og gagna sem kærandi hafi lagt fram. Með vísan til þess hafi rannsóknarregla stjórnsýsluréttar, sbr. 10. gr. stjórnsýslulaga nr. 37/1993 verið brotin. Samkvæmt lögum um útlendinga eigi ákvarðanir Útlendingastofnunnar að vera einstaklingsbundnar og taka tillit til ástæðna hvers og eins umsækjanda. Með tilliti til þess að í máli kæranda hafi Útlendingastofnun einungis vitnað í fyrri ákvarðanir og almennar landaupplýsingar um ástandið í Grikklandi, án þess að skoða hvort eitthvað hafi breyst og án þess að taka tillit til gagna og upplýsinga sem kærandi hafi lagt fram, samræmist hin kærða ákvörðun ekki gildandi lögum og beri að ógilda hana og láta Útlendingastofnun taka málið til efnismeðferðar. Síðar sama dag greindi kærandi frá því að hann hafi fengið afrit af fyrirliggjandi gögnum. Samkvæmt þeim hafi viðtal hjá Útlendingastofnun ekki farið fram. Þá gerir kærandi athugasemd við að skjal sem beri yfirheitið „skjal vegna endurtekinnar umsóknar“ sé ekki rétt útfyllt. Samkvæmt því séu engin ný gögn eða ástæður í málinu sem sé ekki rétt þar sem ný gögn og nýjar upplýsingar um nýjar ástæður liggi fyrir.

III.      Niðurstaða kærunefndar útlendingamála

Samkvæmt 1. mgr. 35. gr. a laga um útlendinga skal endurtekinni umsókn vísað frá. Þó skal taka endurtekna umsókn til meðferðar að nýju ef umsækjandi er staddur hér á landi og nýjar upplýsingar liggja fyrir í máli hans sem leiða til þess að sýnilega auknar líkur séu á því að fallist verði á fyrri umsókn hans samkvæmt 24. gr. laganna.

Líkt og að framan er rakið fór kærandi sjálfviljugur úr landi með aðstoð Útlendingastofnunar 31. maí 2023. Samkvæmt gögnum málsins kom kærandi aftur hingað til lands 26. nóvember 2023 og lagði fram endurtekna umsókn 27. nóvember 2023. Í viðtali hjá lögreglu greindi kærandi frá því að hann hafi dvalið á götunni í Grikklandi. Á yfirliti yfir viðtal við kæranda er hakað við að ekkert hafi breyst í máli kæranda frá því að hann lagði síðast fram umsókn um alþjóðlega vernd hér á landi. Þá er jafnframt hakað við að kærandi hafi ekki lagt fram nein skjöl sem styðji við málavexti hans. Yfirlitið er undirritað af kæranda, túlki og lögreglu. Fyrir liggur að kærandi lagði fram tvö skjöl frá grískum stjórnvöldum sem staðfesta heimilisleysi hans í Grikklandi. Í viðtali hjá Útlendingastofnun 28. nóvember 2023 greindi kærandi frá því að hann hafi engin tengsl við önnur ríki innan Schengen-svæðisins. Þá greindi kærandi frá því að það væri ósanngjörn ráðstöfun að brottvísa honum og endursenda hann til Grikklands þar sem þar væri engin mannúð og hann hafi búið á götunni. Lögreglan hafi verið ósanngjörn og hann óttist hana. Þá sé kærandi með gögn frá Grikklandi sem staðfesti að hann búi á götunni.

Við meðferð fyrri umsókna kæranda hjá kærunefnd bar kærandi fyrir sig að hann hafi ekki fengið atvinnu, fjárhagsaðstoð eða mat í Grikklandi. Kærandi hafi sofið á götum úti og ekki haft aðgang að húsnæði eða heilbrigðisþjónustu. Var það mat kærunefndar í úrskurði í máli kæranda nr. 153/2023, frá 23. mars 2023, með vísan til heimilda um aðstæður í Grikklandi, að einstaklingar með alþjóðlega vernd þar í landi hafi heimild til að stunda atvinnu, hafi aðgang að húsnæðismarkaðnum og eigi sambærilegan rétt á félagslegri aðstoð og grískir ríkisborgarar þó að þeir þurfi í einhverjum tilvikum að yfirstíga ákveðnar hindranir til að sækja þá þjónustu. Vísað var til þess að þrátt fyrir að skýrslur um aðstæður í Grikklandi bendi til þess að aðstæður einstaklinga sem njóti alþjóðlegrar verndar þar séu um margt lakari en aðstæður þeirra hér á landi, m.a. m.t.t. inntaks félagslegrar aðstoðar og aðgangs að félagslegum húsnæðisúrræðum, sé það mat nefndarinnar að almennar aðstæður einstaklinga sem njóta alþjóðlegrar verndar í Grikklandi séu ekki þess eðlis að þær, einar og sér, teljist til sérstakra ástæðna. Í því sambandi vísaði nefndin jafnframt til þess sem fram kemur í 32. gr. a reglugerðar um útlendinga að efnahagslegar ástæður geti ekki talist til sérstakra ástæðna. Þá var það mat kærunefndar að aðstæður kæranda hafi ekki verið slíkar að hann geti ekki borið sig eftir þeirri þjónustu og aðstoð sem hann eigi að lögum rétt á og þarf á að halda í Grikklandi. Kærunefnd vísar til þess að handhafar alþjóðlegar verndar í Grikklandi sem búa undir fátæktarmörkum eiga m.a. rétt á fjárhagsaðstoð í formi mánaðarlegra greiðslna. Skilyrði fyrir styrknum er m.a. að framvísa leigusamningi eða í tilviki heimilislausra, vottorði um heimilisleysi frá gistiskýli eða sveitarfélagi, líkt og kærandi hefur lagt fram við meðferð málsins. Það er mat kærunefndar að þau skjöl sem kærandi hefur nú lagt fram um heimilisleysi hans í Grikklandi séu aðeins til fyllingar þeim upplýsingum sem lágu fyrir við meðferð umsóknar hans hjá nefndinni en ekki nýjar upplýsingar í skilningi 1. mgr. 35. gr. a laga um útlendinga.

Í greinargerð gerir kærandi athugasemd við að Útlendingastofnun hafi ekki skoðað hvort eitthvað hafi breyst eða tekið tillit til nýrra gagna og upplýsinga sem kærandi hafi lagt fram. Þá gerir kærandi athugasemd við að í viðtali kæranda hjá lögreglu hafi verið merkt við að engin ný gögn eða málsástæður liggi fyrir í máli hans. Kærunefnd vísar til þess að í viðtali kæranda hjá lögreglu hafi kærandi m.a. verið spurður út í ferðaleið sína og ástæður þess að hann hafi komið aftur hingað til lands og lagt fram umsókn um alþjóðlega vernd. Samkvæmt gögnum málsins greindi kærandi sjálfur frá því að ekkert hafi breyst í máli hans og hann hafi engin gögn sem styðji við málavexti hans. Viðtalið er undirritað af kæranda, túlki og lögreglu. Auk þess vísar kærunefnd til þess að í ákvörðun Útlendingastofnunar var litið til þess að kærandi hafi lagt fram ný gögn um heimilisleysi í Grikklandi. Þau gögn voru hins vegar ekki talin sýna fram á nýjar málsástæður sem gætu leitt til þess að fallist yrði á fyrri umsókn kæranda um alþjóðlega vernd hér á landi.

Í ljósi framangreinds, er það mat kærunefndar að ekki liggi fyrir nýjar upplýsingar í máli kæranda sem leiði til þess að sýnilega auknar líkur séu á því að fallist verði á fyrri umsóknir hans samkvæmt 24. gr. laganna, sbr. 1. mgr. 35. gr. a laga um útlendinga. Með vísan til þess sem að framan er rakið þykir rétt að staðfesta ákvörðun Útlendingastofnunar.

 

Úrskurðarorð:

 

Ákvörðun Útlendingastofnunar er staðfest.

 

The decision of the Directorate of Immigration is affirmed.

 

F.h. kærunefndar útlendingamála,

 

Valgerður María Sigurðardóttir, varaformaður.