Úrskurður nr. 541/2024

Hinn 13. júní 2024 er kveðinn upp svohljóðandi

úrskurður nr. 541/2024

í stjórnsýslumálum nr. KNU24040091 og KNU24040065

Endurteknar umsóknir og beiðni um frestun á framkvæmd í málum [...]og barns hennar

1. Málsatvik

Með úrskurði nr. 170/2024, dags. 7. mars 2024, staðfesti kærunefnd útlendingamála ákvarðanir Útlendingastofnunar, dags. 26. september 2023, um að taka umsóknir [...], fd. [...], ríkisborgara Nígeríu (hér eftir kærandi), og barns hennar [...], fd. [...], ríkisborgara Nígeríu (hér eftir A), um alþjóðlega vernd á Íslandi ekki til efnismeðferðar og vísa þeim frá landinu. Niðurstaða kærunefndar var birt kæranda sama dag.

Hinn 13. mars 2024 lagði kærandi fram beiðni um frestun á framkvæmd, sbr. lokamálslið 6. mgr. 104. gr. laga um útlendinga. Með úrskurði kærunefndar nr. 316/2024, dags. 4. apríl 2024, var kröfu kæranda hafnað. Kærandi lagði fram frestun á framkvæmd að nýju 8. apríl 2024. Þá bárust kærunefnd endurteknar umsóknir kæranda og barns hennar 11. apríl 2024 ásamt fylgigögnum. Frekari gögn bárust kærunefnd 18., 19. og 20. apríl 2024. Upplýsingar um málsmeðferð í máli kæranda bárust frá Útlendingastofnun og stoðdeild Ríkislögreglustjóra 11. apríl 2024 og frá Vinnumálastofnun 15. apríl 2024.

Endurteknar umsóknir kæranda og barns hennar byggja á 35. gr. a laga um útlendinga nr. 80/2016.

1. Málsástæður og rök kæranda

Kærandi vísar til þess að nú hafi borist mikilvæg gögn frá Barnaverndarþjónustu Hafnarfjarðar. Telur kærandi að gögnin séu þess eðlis að rétt sé að skoða mál hennar að nýju en ekki hafi legið fyrir við málsmeðferð hennar hjá kærunefnd að opið barnaverndarmál væri í gangi vegna A. Með vísan til framangreinds telur kærandi að hún uppfylli skilyrði 1. mgr. 35. gr. a laga um útlendinga.

1. Niðurstaða kærunefndar útlendingamála

Samkvæmt 1. mgr. 35. gr. laga um útlendinga skal endurtekinni umsókn vísað frá. Þó skal taka endurtekna umsókn til meðferðar að nýju ef umsækjandi er staddur hér á landi og nýjar upplýsingar liggja fyrir í máli hans sem leiða til þess að sýnilega auknar líkur séu á því að fallist verði á fyrri umsókn hans samkvæmt 24. gr. laganna.

Samkvæmt fyrirliggjandi upplýsingum frá Útlendingastofnun, Vinnumálastofnun og stoðdeild Ríkislögreglustjóra er kærandi stödd hér á landi.

Kærandi byggir endurteknar umsóknir sínar aðallega á því að nýjar upplýsingar liggi fyrir sem leiði til þess að sýnilega auknar líkur séu á því að fallist verði á fyrri umsóknir þeirra með vísan til þess að opið barnaverndarmál sé í gangi hjá Hafnarfjarðarbæ vegna A.

Í málinu liggja fyrir gögn frá barnaverndaryfirvöldum hér á landi. Samkvæmt framlögðum gögnum hafa verið sendar nokkrar tilkynningar til Barnaverndarþjónustu Hafnarfjarðar vegna vanrækslu kæranda gagnvart A. Í skýrslu félagsráðgjafa hjá Hafnarfjarðarbæ, dags. 2. febrúar 2024, kemur m.a. fram að fyrsta tilkynning hafi borist 15. ágúst 2023 þess efnis að móðir væri að drekka á meðgöngu og í kjölfarið hafi eftirlit verið samþykkt inn á heimilið. Út frá könnun hafi verið ljóst að móðir væri andlega veik og hafi ekki burði til að sinna A vegna veikinda sinna. Ekki hafi borið neitt á því að kærandi hafi drukkið eftir að hún kom í þjónustu til Barnaverndar en áhyggjur hafi verið af samskiptum kæranda og A frá fyrstu tilkynningu. Kærandi gefi lítið af sér og samskipti við hana flöt. Áhyggjur séu af getu kæranda til að sinna A. Þá hafi önnur tilkynning borist frá bráðamóttöku 16. desember 2023, vegna vanrækslu varðandi umsjón og eftirlit A, í kjölfar líkamlegs og andlegs ofbeldis. Kærandi hafi öskrað á A, tekið í hálsmálið á peysu hans og ýtt honum út úr herbergi það harkalega að A datt í gólfið. Móðir hafi ekki sýnt svipbrigði á meðan á þessu stóð eða eftir á. Í skýrslu félagsráðgjafa, dags. 11. janúar 2024, kemur m.a. fram að A hafi greint frá því að hafa verið skilinn eftir að nóttu til á Ítalíu meðan foreldrar hans hafi farið út. A hafi greint frá því að þegar hann væri einn með móður sinni líði honum ekki alltaf vel og gráti stundum. Þá hafi Barnaverndarþjónustu borist tilkynning frá skóla A, 29. febrúar 2024, m.a. vegna gruns um vanrækslu varðandi umsjón og eftirlit. Þar hafi komið fram að A hefði greint frá því að vera mikið einn heima og hafi ekkert að gera fyrir utan að vera í símanum. Í skýrslu félagsráðgjafa hjá Hafnarfjarðarbæ, dags. 7. mars 2024, kemur m.a. fram að skóli A hafi tilkynnt um ofbeldi og vanrækslu. Skólinn hafi áhyggjur af A, eftir að hann hafi farið til móður sinnar eftir að bróðir hans lést. Samkvæmt starfsmanni skólans sé A ósofinn, en móðir hans sofi á nóttunni en hann vaki. A hafi greint stuðningsaðila frá því að móðir hans kenni honum um að bræður hans séu látnir en móðir kannist ekki við áhyggjur skólans. Samkvæmt gögnum málsins hefur A verið vistaður hjá fósturfjölskyldu um tíma. Fyrir liggur að kærandi hafi eignast dreng hér á landi 6. desember 2023 en hann látist 7. febrúar 2024 vegna arfgengs sjúkdóms (e. [...]). Samkvæmt framburði kæranda hafi hún misst tvö önnur börn úr sama sjúkdómi.

Samkvæmt gögnum málsins hafi kærandi verið búsett á Ítalíu á árunum 2011-2015 og aftur á árunum 2019-2023.. Hún hafi notið fjárhagsaðstoðar frá ítölskum stjórnvöldum og hún og A hafi haft aðgang að heilbrigðiskerfinu. A hafi gengið í skóla á Ítalíu auk þess sem faðir hans, sem jafnframt sé kærasti kæranda, sé búsettur þar. Gögn málsins benda til þess að kærandi og A kunni að vera í þörf fyrir áframhaldandi félagslegan stuðning barnaverndarþjónustu. Samkvæmt þeim gögnum sem kærunefnd hefur kynnt sér er til staðar virkt barnaverndarkerfi í viðtökuríki sem stjórnað er af yfirvöldum á Ítalíu og starfar í samræmi við landslög. Jafnframt kemur fram í gögnum málsins, t.a.m. skýrslu félagsráðgjafa, dags. 11. janúar 2024, að A hafi greint frá því að tala við föður sinn, sem búsettur sé á Ítalíu, í síma næstum daglega. Þá greindi A frá því að meðan hann dvaldi á Ítalíu hafi hann búið með báðum foreldrum sínum á sama heimili. A sakni Ítalíu mikið og verði stundum leiður. A hafi greint frá því að sakna hinna landanna sem hann hafi búið í og vina sinna þar. Gögn málsins bera með sér að A hafi verið vistaður utan heimilis hér á landi í desembermánuði 2023. Í minnisblaði frá barnavernd Hafnarfjarðar, dags. 7. mars 2024, sem gert hafi verið í kjölfar tilkynningar frá skóla A, kemur fram að hann hafi hann nú verið færður aftur í umsjá móður sinnar. Barnaverndarstarfsmenn hafi farið yfir mikilvægi þess að kærandi tali við A um líðan hans og sýni meiri áhuga á því sem hann geri á daginn í skólanum.

Af framlögðum gögnum er ljóst að A býr með kæranda og er því ekki í umsjá barnaverndaryfirvalda sem stendur. Þá liggur fyrir að faðir A er búsettur á Ítalíu og er í reglulegum samskiptum við hann. Þau gögn sem kærunefnd hefur kynnt sér bera með sér að kærandi geti fengið aðstoð barnaverndaryfirvalda á Ítalíu, sé hún í þörf fyrir áframhaldandi stuðning. Kærunefnd áréttar að samkvæmt 31. og 32. gr. Dyflinnarreglugerðarinnar skuli miðla upplýsingum um heilsufar umsækjenda um alþjóðlega vernd til yfirvalda í viðtökuríki, að uppfylltum skilyrðum ákvæðanna, þannig að flutningur viðkomandi fari fram með þeim hætti að heilsufari þeirra verði ekki stefnt í hættu.

Að framangreindu virtu er kröfu kæranda um endurteknar umsóknir vísað frá.

Með vísan til framangreindrar niðurstöðu verður ekki fallist á beiðni kæranda um frestun réttaráhrifa, sbr. 3. mgr. 35. gr. a laga um útlendinga.

Úrskurðarorð:

Endurteknum umsóknum kæranda og barns hennar er vísað frá.

The appellant‘s subsequent applications are dismissed.

Valgerður María Sigurðardóttir

Bjarnveig Eiríksdóttir

Gunnar Páll Baldvinsson