Úrskurður nr. 991/2024

Hinn 1. október 2024 er kveðinn upp svohljóðandi

úrskurður nr. 991/2024

í stjórnsýslumálum nr. KNU24070190, KNU24070191 og KNU24070192

Endurtekin umsókn í máli […], […] og […]

I. Málsatvik

Með úrskurði kærunefndar útlendingamála nr. 752/2024, dags. 18. júlí 2024, staðfesti nefndin ákvarðanir Útlendingastofnunar, dags. 4. október 2023, um að synja […], fd. […] (hér eftir M), […], fd. […] (hér eftir K) og fullorðinni dóttur þeirra, […], fd. […] (hér eftir A), ríkisborgurum Srí Lanka, um alþjóðlega vernd á Íslandi ásamt því að synja þeim um dvalarleyfi á grundvelli 74. gr. laga um útlendinga nr. 80/2016.

Hinn 22. júlí 2024 barst kærunefnd beiðni kærenda um endurtekna umsókn. Greinargerð barst sama dag ásamt fylgigögnum.

Af greinargerð kæranda má ráða að umsókn þeirra byggi á 35. gr. a laga um útlendinga nr. 80/2016.

II. Málsástæður og rök kæranda

Fram kemur í greinargerð kærenda að þau byggi umsókn sína á því að þau séu í alvarlegri hættu við að snúa til baka til heimaríkis.

Í greinargerð kemur fram að kærendur hafi flúið ofsóknir vegna þjóðernisuppruna og stjórnmálaskoðana. Þá hafi þau orðið fyrir hótunum glæpahópa og m.a. hafi verið reynt að ræna A og öryggi K hafi verið ógnað. Þá sé Srí Lanka hættulegur staður fyrir kærendur vegna átaka sem þar viðgangist og ofbeldis sem beinist sérstaklega að kærendum. Líf kærenda hafi verið í slíkri hættu að þau hafi stöðugt þurft að flytja sig úr stað til að forðast þá sem hafi verið á eftir þeim. Kærendur hafi mátt þola alvarleg mannréttindabrot m.a. hótanir um líkamlegt ofbeldi og sálræn áföll. Geðheilsu A hafi versnað vegna hótana og hún hafi nú þörf fyrir lyf vegna [...].

Kærendur leggi nú fram lögregluskýrslur, heilbrigðisgögn og önnur gögn til að stuðnings frásögn sinni um ofsóknir og hótanir sem sýni í hversu mikilli hættu kærendur hafi verið í heimaríki.

III. Niðurstaða kærunefndar útlendingamála

Endurtekin umsókn á grundvelli 1.mgr. 35. gr. a laga um útlendinga

Samkvæmt 1. mgr. 35. gr. a laga um útlendinga skal endurtekinni umsókn vísað frá. Þó skal taka endurtekna umsókn til meðferðar að nýju ef umsækjandi er staddur hér á landi og nýjar upplýsingar liggja fyrir í máli hans sem leiða til þess að sýnilega auknar líkur séu á því fallist verði á fyrri umsókn hans samkvæmt 24. gr. laganna.

Ákvæði 35. gr. a. laga um útlendinga kom nýtt inn í lög um útlendinga með lögum nr. 14/2023 frá 27. mars 2023. Kveður ákvæðið á um að endurtekin umsókn skuli tekin til meðferðar að nýju ef umsækjandi er staddur hér á landi og nýjar upplýsingar liggja fyrir í málinu sem leiða til að sýnilega auknar líkur séu á því að fallist verði á fyrri umsókn. Í ákvæðinu kemur jafnframt fram að ákvæði 24. gr. stjórnsýslulaga nr. 37/1993 gildi ekki um ákvarðanir í málum er varða alþjóðlega vernd. Í greinargerð með frumvarpi til laga nr. 14/2023 kemur fram að mælikvarðann um ,,sýnilega auknar líkur“ verði að túlka með hliðsjón af því að líkur séu á því að önnur niðurstaða fáist í málið vegna upplýsinga sem ekki lágu fyrir við meðferð upphaflegrar umsóknar. Gerir orðalag ákvæðisins og útskýringar í greinargerð því ekki þá kröfu að fullvissa sé fyrir því að niðurstaðan verði önnur en í fyrri umsókn. Þá verður einnig að líta til þess að við mat á endurtekinni umsókn má oft útiloka að hinar nýju upplýsingar hafi áhrif á fyrri niðurstöðu.

Eins og áður hefur komið fram kvað kærunefnd upp úrskurði í máli kærenda 18. júlí 2024. Með úrskurðinum var komist að þeirri niðurstöðu að kærendur uppfylltu ekki skilyrði 1. og 2. mgr. 37. gr. laga um útlendinga og ætti þau því ekki rétt á alþjóðlegri vernd hér á landi, sbr. 40. gr. laga um útlendinga. Þá var það mat kærunefndar að aðstæður kærenda væru ekki með þeim hætti að veita bæri þeim dvalarleyfi á grundelli 74. gr. laga um útlendinga.

Kærendur byggja endurteknar umsóknir sínar á því að þeim sé búin mikil hætta við það að snúa til baka til heimaríkis á grundvelli stjórnmálaskoðana og áreitis og ofbeldis af hálfu glæpahópa. Þá liggi fyrir frekari upplýsingar í máli þeirra varðandi ofsóknir og áreiti sem þau og ættingjar þeirra hafa orðið fyrir og um tilraun til að ræna A.

Í úrskurði kærunefndar nr. 752/2024 frá 18. júlí 2024, er ítarlega fjallað um meintar ofsóknir gegn kærendum m.a. um árás einstaklinga á M í kjölfar uppboðs, tilraun til íkveikju á heimili kærenda og tilraun til að ræna A. Í úrskurðinum kemur fram að kærendur hafi ekki sett fram annað en getgátur um það hverjir hafi staðið að baki hótunum og að ótilgreindir aðilar hafi elt A og reynt að ræna henni. Kærendum hafi ekki tekist að sýna fram á að einstaklingar sem hafi staðið að baki ógnunum og hótunum, hafi verið með stjórnmálatengsl á heimasvæði kærenda eða að um sömu einstaklinga hafi verið að ræða í öllum tilfellum. Kærendur hafi því ekki með rökstuddum hætti leitt líkur að því að þau hafi áður en þau flúðu heimaríki sitt upplifað áreiti, hótanir eða ofbeldi af hálfu annarra aðila sem nái því alvarleikastigi að fela í sér ofsóknir í skilningi 1. mgr. 37. gr. laga um útlendinga. Jafnframt hafi kærendur ekki sýnt fram á að stjórnvöld í Srí Lanka geti ekki eða vilji ekki veita kærendum vernd m.a. með því að ákæra eða refsa fyrir þær athafnir sem feli í sér ofsóknir, sbr. c-lið 4. mgr. 38. gr. laga um útlendinga. Í ljósi heimilda um heimaríki kærenda hafi kærendur raunhæfan möguleika á að leita sér ásjár stjórnvalda þar í landi, ef kærendur þurfi á aðstoð að halda. Þá hafi M ekki sýnt fram á að hann hafi sætt ofsóknum, áreitni eða mismunun vegna stjórnmálaskoðana sinna af hálfu stjórnvalda eða annarra í heimaríki.

Í beiðni kæranda eru ítrekuð sömu sjónarmið og á reyndi í úrskurði kærunefndar nr. 752/2024. Hvað hin nýju gögn varðar er um að ræða afrit skjala sem kærendur segja vera lögregluskýrslur. Í gögnunum kemur fram einhliða frásögn kærenda af atburðum í heimaríki sem var lögð til grundvallar í úrskurði kærunefndar. Ekki hefur verið sýnt fram á að hin nýju gögn leiði til þess að sýnilega auknar líkur séu á því að fallist yrði á umsókn þeirra hvað þessi atriði varðar. Þau gögn sem kærendur hafa lagt fram með endurtekinni umsókn sinni eru því ekki til þess fallin að hnekkja fyrra mati kærunefndar.

Kærendur byggja endurteknar umsóknir sínar einnig á slæmri andlegri heilsu A og leggja fram frekari heilsufarsgögn frá Srí Lanka frá árunum 2022 og 2023. Í úrskurði nefndarinnar nr. 752/2024 frá 18 júlí 2024 er ítarlega fjallað um andlega heilsu A og framlögð heilsufarsgögn. Kærendur hafa greint frá og lagt fram heilsufarsgögn þess efnis að A hafi haft aðgang að heilbrigðisþjónustu, sálfræðing og lyfjum í heimaríki. Var það mat kærunefndar að kærendur geti fengið þá heilbrigðisþjónustu m.a. sálfræðiþjónustu og lyf sem A þarfnast í heimaríki. Framlögð gögn varðandi andlega heilsu A breyta ekki fyrra mati kærunefndar.

Þá er ekkert í gögnum málsins bendir til þess að A sé í meðferð hér á landi sem sé ekki aðgengileg í heimaríki eða að óforsvaranlegt sé að rjúfa þá meðferð. Það er því mat kærunefndar að framangreindar upplýsingar í máli kærenda leiði ekki til þess að sýnilega auknar líkur séu á því að fallist verði á fyrri umsóknir þeirra samkvæmt 1. mgr. 35. gr. a laga um útlendinga og telur kærunefnd því skilyrði ákvæðis 35. gr. laga um útlendinga ekki vera uppfyllt.

Kærendur byggja endurteknar umsóknir sínar einnig á því að þau hafi orðið fyrir ofsóknum vegna þjóðernisuppruna. Í viðtölum hjá Útlendingastofnun greindu kærendur frá því að vera Búdda trúar og af sínhalesískum uppruna. Í úrskurði sínum nr. 752/2024 frá 18. júlí 2024 fjallaði kærunefndin um þjóðernisuppruna kærenda og upplýsingar um heimaríki kærenda hvað trú og þjóðernisuppruna varðar. Af heimildum má ráða kærendur hafi tilheyrt meirihlutahópi í heimaríki hvað trú og þjóðernisuppruna varðar og heimildir bera ekki með sér að fólk af sínhalesískum uppruna verði fyrir mismunun eða ofsóknum.

Að öðru leyti eru í greinargerð kæranda reifuð sjónarmið sem kærendur höfðu uppi við meðferð umsóknar þeirra án þess að þeim fylgi ný gögn eða annar rökstuðningur. Hvað þau sjónarmið varðar vísar kærunefnd til úrskurðar nr. 752/2024.

Að framangreindu virtu er endurtekinni umsókn kærenda vísað frá.

Úrskurðarorð:

Endurtekinni umsókn kærenda er vísað frá.

The appellants subsequent application is dismissed.

F.h. kærunefndar útlendingamála,

Þorsteinn Gunnarsson, formaður