Úrskurður nr. 97/2025

Hinn 6. febrúar 2025 er kveðinn upp svohljóðandi

úrskurður nr. 97/2025

í stjórnsýslumálum nr. KNU24090045 og KNU24090046

Kæra […]

á ákvörðun Útlendingastofnunar

I. Kröfur, kærufrestir og kæruheimild

Hinn 6. september 2024 kærðu […], fd.[…] og […], fd. […], ríkisborgarar Pakistan (hér eftir kærendur) ákvarðanir Útlendingastofnunar, dags. 21. ágúst 2024, um að synja þeim um dvalarleyfi á grundvelli fjölskyldusameiningar, sbr. 71. gr. laga um útlendinga nr. 80/2016. Ákvarðanirnar birtar fyrir kærendum sama dag.

Fyrrgreindar ákvarðanir eru kærðar á grundvelli 7. gr. laga um útlendinga nr. 80/2016. Í ákvæði 7. gr. kemur fram að ákvarðanir Útlendingastofnunar sé heimilt að kæra til kærunefndar útlendingamála innan 15 daga frá því að útlendingi var tilkynnt um ákvörðunina.

Með tölvubréfi, dags. 6. september 2024, lögðu kærendur fram stjórnsýslukæru og fóru kærendur fram á að þeim yrði veitt dvalarleyfi á Íslandi á grundvelli 71. gr. laga um útlendinga. Með tölvubréfi kærunefndar, dags. 31. janúar 2025, var kærendum tilkynnt að kæra þeirra hefði verið lögð fram of seint með tilliti til kærufrests og var þeim veitt færi á því að leggja fram frekari skýringar til stuðnings þess að taka ætti málin til efnislegrar meðferðar. Með tölvubréfi kærenda, sama dag, kom fram að lögmaður kærenda hafi verið í sumarorlofi og komið heim um kvöldið 22. ágúst 2024 og mætt til vinnu degi síðar þar sem hann hafi opnað tölvubréf frá Útlendingastofnun og móttekið umræddar ákvarðanir Útlendingastofnunar. Lögmaður kærenda hafi því ekki átt kost á að kynna sér efni ákvarðana Útlendingastofnunar fyrr en 23. ágúst 2024. Ákvarðanir Útlendingastofnunar hafi því talist birtar 23. ágúst 2024 þegar lögmaður kærenda hafi átt þess kost að kynna sér efni þeirra.

II. Niðurstaða

Í 28. gr. stjórnsýslulaga nr. 37/1993 er kveðið á um réttaráhrif þess þegar kæra berst æðra stjórnvaldi að liðnum kærufresti. Þar segir í 1. mgr.:

„Hafi kæra borist að liðnum kærufresti skal vísa henni frá, nema:

1. afsakanlegt verði talið að kæran hafi ekki borist fyrr, eða

2. veigamiklar ástæður mæla með því að kæran verði tekin til meðferðar.“

Í 1. mgr. 28. gr. stjórnsýslulaga er því að finna tvær undantekningarreglur frá þeirri meginreglu laganna að kærumáli skuli vísað frá æðra stjórnvaldi ef kæra berst að liðnum kærufresti. Í athugasemdum við einstakar greinar í frumvarpi því sem varð að stjórnsýslulögum segir um ákvæðið að í fyrsta lagi sé gerð undantekning þegar afsakanlegt er að kæra hafi borist að liðnum kærufresti. Hér getur t.a.m. fallið undir ef stjórnvald lætur hjá líða að veita leiðbeiningar um kæruheimild skv. 20. gr. laganna eða veitt rangar eða ófullnægjandi upplýsingar. Í öðru lagi má taka mál til meðferðar ef veigamiklar ástæður mæla með því. Við mat á því hvort veigamiklar ástæður mæli með því að kæra verði tekin til meðferðar skal m.a. litið til hagsmuna aðila máls og hvort mál hafi fordæmisgildi.

Samkvæmt gögnum málsins voru ákvarðanir Útlendingastofnunar birtar fyrir kærendum með tölvubréfi 21. ágúst 2024. Í ákvörðunum Útlendingastofnunar er gerð grein fyrir kæruheimild, kærufresti og hvert beina skuli kæru í samræmi við 2. tölul. 2. mgr. 20. gr. stjórnsýslulaga. Var kærufrestur liðinn þegar kæra barst kærunefnd útlendingamála 6. september 2024.

Kærendur bera fyrir sig að lögmaður kærenda hafi verið í sumarorlofi og komið heim um kvöldið 22. ágúst 2024 og mætt til vinnu degi síðar þar sem hann hafi opnað tölvubréf frá Útlendingastofnun og móttekið umræddar ákvarðanir Útlendingastofnunar. Lögmaður kærenda hafi því ekki átt kost á að kynna sér efni ákvarðana Útlendingastofnunar fyrr en 23. ágúst 2024. Ákvarðanir Útlendingastofnunar hafi því talist birtar 23. ágúst 2024 þegar lögmaður kærenda hafi átt þess kost að kynna sér efni þeirra.

Í 1. mgr. 39. gr. stjórnsýslulaga kemur fram að stjórnvaldsákvörðun eða önnur gögn á rafrænu formi teljist birt aðila þegar hann eigi þess kost að kynna sér efni þeirra. Aðili máls ber ábyrgð á því að vél- og hugbúnaður hans fullnægi þeim kröfum sem til hans eru gerðar, sbr. 1. mgr. 35. gr., og nauðsynlegar eru svo að hann geti kynnt sér efni stjórnvaldsákvörðunar eða annarra gagna sem stjórnvald sendir honum á rafrænu formi.

Samkvæmt framangreindu átti lögmaður kærenda þess kost að kynna sér efni ákvarðana Útlendingastofnunar þegar honum voru birtar ákvarðanirnar 21. ágúst 2024. Ekki er unnt að fallast á framangreindar skýringar kærenda fyrir því að kæra hafi borist of seint. Gögn málsins bera því ekki með sér að afsakanlegt sé að kæra hafi borist seint. Að framangreindu virtu verður kæran ekki tekin til meðferðar á grundvelli 1. tölul. 1. mgr. 28. gr. stjórnsýslulaga.

Kærunefnd hefur farið yfir gögn málanna, þ.m.t. ákvarðanir Útlendingastofnunar í máli kærenda auk röksemda þeirra. Hvorki verður séð af gögnum málsins að um slíkt fordæmisgefandi mál sé að ræða né að hagsmunir kærenda eða almannahagsmunir krefjist þess að málin verði tekið til meðferðar, sbr. 2. tölul. 1. mgr. 28. gr. stjórnsýslulaga. Þar að auki er litið til þess að kærendum er unnt að sækja um dvalarleyfi á grundvelli fjölskyldusameiningar, sbr. 71. gr. laga um útlendinga að nýju.

Að öllu framangreindu virtu er kæru þessari vísað frá nefndinni.

Úrskurðarorð:

Kæru kærenda á ákvörðunum Útlendingastofnunar er vísað frá.

The applicant‘s appeal of the decisions of the Directorate of Immigration is dismissed.

Valgerður María Sigurðardóttir

Vera Dögg Guðmundsdóttir