Mál nr. 19/2025-Úrskurður

Úrskurðarnefnd velferðarmála

Mál nr. 19/2025

Fimmtudaginn 10. apríl 2025

A

gegn

Tryggingastofnun ríkisins

Ú R S K U R Ð U R

Mál þetta úrskurða Rakel Þorsteinsdóttir lögfræðingur, Eva Dís Pálmadóttir lögfræðingur og Kristinn Tómasson læknir.

Með rafrænni kæru, móttekinni 9. janúar 2025, kærði A, til úrskurðarnefndar velferðarmála ákvörðun Tryggingastofnunar ríkisins frá 30. október 2024 um upphafstíma greiðslna endurhæfingarlífeyris til kæranda.

I.  Málsatvik og málsmeðferð

Með rafrænni umsókn, móttekinni 28. september 2024, sótti kærandi um endurhæfingarlífeyri frá 1. júní 2024. Með bréfi Tryggingastofnunar ríkisins, dags. 30. október 2024, var umsókn kæranda synjað á þeim grundvelli að fyrirliggjandi endurhæfingaráætlun teldist ekki nógu ítarleg í ljósi heildarvanda kæranda og óljóst hvernig endurhæfing kæmi til með að stuðla að endurkomu á vinnumarkað, enda virtist virk endurhæfing þar sem tekið væri á heilsufarsvanda vart hafin. Kærandi sótti á ný endurhæfingarlífeyri með rafrænni umsókn, móttekinni 1. desember 2024 frá 1. júlí 2024. Með bréfi Tryggingstofnunar, dags. 12. desember 2024, var umsókn kæranda samþykkt frá 1. desember 2024 til 31. ágúst 2025, með þeim rökum að heimilt væri að veita greiðslur frá fyrsta degi næsta mánaðar eftir að öll skilyrði laga séu uppfyllt.

Kæra barst úrskurðarnefnd velferðarmála 9. janúar 2025. Með bréfi, dags. 14. janúar 2025, óskaði úrskurðarnefnd eftir greinargerð Tryggingastofnunar ríkisins ásamt gögnum málsins. Með bréfi, dags. 21. janúar 2025, barst greinargerð Tryggingastofnunar ríkisins og var hún send kæranda til kynningar með bréfi úrskurðarnefndar, dagsettu sama dag. Athugasemdir bárust ekki. Með bréfi til kæranda, dags. 12. mars 2025, óskaði úrskurðarnefndin eftir upplýsingum um hvenær lyfjameðferð hennar hafi byrjað. Engin svör bárust frá kæranda.

II.  Sjónarmið kæranda

Í kæru kemur fram að kærandi hafi verið orðin óvinnufær síðasta vor og hafi hún þá leitað til læknis sem hafi sent inn gögn til VIRK og upplýsingar um andlega og líkamlega stöðu auk þess sem fyrir hafi legið að hún myndi leita sér heilsubótar. Í kulnun sé erfitt að sinna sjálfum sér og núna þegar kærandi sé komin inn í kerfið og farin að fá inn á námskeiðum og fái góðar leiðbeiningar þá sjái hún hversu týnd hún hafi verið í kerfinu. Þessi vinnsla milli VIRK og Tryggingastofnunar ríkisins sé ómanneskjuleg. Það sé enginn til að halda í höndina á manni þegar mesta þörfin sé og núna þurfi hún að kæra þessa ákvörðun því það gæti verið gott fordæmi.

B læknir kæranda hafi sent inn gögn og telji þau fullnægja upplýsingaþörf fyrir umsókn um endurhæfingalífeyri þar sem að kærandi hafi verið innskráð hjá VIRK og komin á biðlista eftir ráðgjafa. Það hafi sett stórt strik í reikninginn að yfir sumartímann séu sumarfrí og biðin lengist og auk þess sé framboð á úrræðum minna. Kærandi hafi skráð sig í „Vinir í bata“ sem séu með 12 sporin, kerfi sem nýtist öllum. Fundir hafi verið frá því í október 2024 og því hafi þeir ekki getað skráðst sem virkni yfir sumarið. Kæranda skiljist að ástæða synjunarinnar sé sú að kærandi hafi ekki verið komin með nein virk úrræði. Staðan sé sú að hún hafi verið að bíða eftir virkri aðstoð til að koma sér í úrræði. Að vera fársjúk í kulnun sé rosalega erfitt og kulnun sé erfið meðferðar þar sem að einsemd sé svo mikil í byrjun og allt gangi svo hægt. Erfitt sé að finna út hvert skuli snúa sér, hvaða tölvupósta eigi að senda og hverjir geti hjálpað gjaldfrjálst því engar séu tekjurnar. Kærandi hafi verið svo heppin að hafa getað verið með heimagistingu og fengið inn smá tekjur þannig en það hafi líka lengt bataferlið. Kærandi óski því eftir að fá framfærslulífeyri greiddan frá því að hún hafi verið samþykkt inn hjá VIRK eða frá júlí 2024 en ekki bara frá 1. desember 2024. Kærandi hafi mætt á alla fundi hjá 12 sporunum í C síðan það hafi byrjað í október 2024. Kærandi hafi farið oft í sund í D og hafi nýtt sér innrauða klefann og kalda pottinn auk þess að spjalla við sveitunga sem kærandi hafi suma hverja þekkt alla ævi. Kærandi telji sig hafa verið að gera rétt samkvæmt ráðleggingum læknisins.

Þess sé krafist að málið verði tekið fyrir og endurskoðað þar sem að biðlistinn hjá VIRK hafi verið orðinn sá lengsti á landinu sl. haust og það eigi ekki að koma svona illa niður á veikum einstaklingi sem geti þess vegna hvorki unnið né fengið atvinnuleysisbætur. Kærandi geti fengið staðfestingu frá hópnum í C og um mætingar frá D ef þörf sé.

III.  Sjónarmið Tryggingastofnunar ríkisins

Í greinargerð Tryggingastofnunar ríkisins kemur fram að kæra varði ákvörðun stofnunarinnar, dags. 30. október 2024, að synja umsókn um endurhæfingarlífeyri. Kæranda hafi verið synjað um mat á endurhæfingarlífeyri þar sem fyrirliggjandi endurhæfingaráætlun hafi ekki þótt nægilega ítarleg í ljósi heildarvanda kæranda.

Um endurhæfingarlífeyri sé fjallað í 7. gr. laga nr. 99/2007 um félagslega aðstoð, með síðari breytingum. Í 1. mgr. 7. gr. segi að heimilt sé að greiða endurhæfingarlífeyri í allt að 36 mánuði þegar ekki verði séð hver starfshæfni einstaklings sem sé á aldrinum 18 til 67 ára verði til frambúðar eftir slys eða sjúkdóma. Greiðslur skuli inntar af hendi á grundvelli endurhæfingaráætlunar. Skilyrði fyrir greiðslum sé að umsækjandi taki þátt í endurhæfingu með starfshæfni að markmiði sem teljist fullnægjandi að mati framkvæmdaraðila og eigi hvorki rétt til launa í veikindaleyfi né greiðslna frá sjúkrasjóðum eða teljist tryggður samkvæmt lögum um atvinnuleysistryggingar.

Heimilt sé að framlengja greiðslutímabil samkvæmt 1. mgr. 7. gr. laga um félagslega aðstoð um allt að 24 mánuði, enda sé starfsendurhæfing með það að markmiði að auka atvinnuþátttöku enn talin raunhæf að mati framkvæmdaraðila, sbr. 2. mgr. 7. gr. laga um félagslega aðstoð.

Tryggingastofnun hafi eftirlit með því að endurhæfingaráætlun sé framfylgt og að skilyrði fyrir greiðslum séu að öðru leyti uppfyllt, t.d. að lögð sé fram endurhæfingaráætlun, lagðir fram endurhæfingarþættir og að umsækjandi taki þátt í endurhæfingunni með fullnægjandi hætti. Í fyrrnefndri 7. gr. sé skýrt að skilyrði greiðslna sé endurhæfing með starfshæfni að markmiði, enda ekki álitið að sjúkdómsmeðferð eða óvinufærni sem slík veiti rétt til greiðslu endurhæfingarlífeyris.

Um nánari skilyrði og framkvæmd endurhæfingarlífeyris sé fjallað í reglugerð nr. 661/2020 um framkvæmd endurhæfingarlífeyris samkvæmt lögum um félagslega aðstoð.

Samkvæmt 13. gr. laga um félagslega aðstoð segi að beita skuli IV. kafla A, V. og VI. kafla laga um almannatryggingar við framkvæmd laganna.

Í 32. gr. laga nr. 100/2007 um almannatryggingar segi að réttur til greiðslna stofnist frá og með þeim degi er umsækjandi teljist uppfylla skilyrði til greiðslna og skuli greiðslur reiknaðar frá fyrsta degi næsta mánaðar eftir að greiðsluréttur sé fyrir hendi. Greiðslur falli niður í lok þess mánaðar er bótarétti ljúki.

Málavextir séu þeir að kærandi hafi sótt um endurhæfingalífeyri með umsókn, dags. 28. september 2024, afturvirkt frá 1. júní 2024. Meðfylgjandi umsókn hafi verið læknisvottorð, dags. 30. júlí 2024, staðfesting frá lífeyrissjóði, dags. 23. september 2024, og spurningalisti vegna færniskerðingar sem hafi borist stofnuninni 19. september 2024.

Með bréfi, dags. 30. október 2024, hafi umsókn kæranda um endurhæfingarlífeyri verið synjað.

Kærandi hafi sótt aftur um endurhæfingarlífeyri með umsókn, dags. 1. desember 2024, og hafi þá sótt um afturvirkar greiðslur frá 1. júlí 2024. Með bréfi Tryggingastofnunar, dags. 12. desember 2024, hafi kærandi fengið samþykkt mat endurhæfingarlífeyris frá 1. desember 2024 til 31. ágúst 2025, samtals níu mánuði.

Við mat á umsókn um endurhæfingarlífeyri, dags. 28. september 2024, vegna tímabilsins frá 1. júní 2024 til 30. október 2024 hafi legið fyrir læknisvottorð, dags. 30. júlí 2024, staðfesting frá lífeyrissjóði, dags. 23. september 2024, og spurningalisti vegna færniskerðingar sem hafi borist stofnuninni 19. september 2024.

Í greinargerð Tryggingastofnunar er greint frá sem fram kemur í læknisvottorði B, dags. 30. júlí 2024, varðandi sjúkdómsgreiningar og lýsingu á sjúkdómi kæranda. Í læknisvottorðinu sé eftirfarandi endurhæfingaráætlun tilgreind:

„Búið að sækja um endurhæfingu í VIRK, sótt um í maí 2024 þannig ætti að fara að komast að.-

Innstilling lyfjameðferð með SSRI lyfjum, eftirlit hjá undirritaðri mánaðarlega.“

Tryggingstofnun hafi í tvígang óskað eftir gögnum, n.t.t. með bréfi, dags. 7. ágúst 2024, en þá hafi verið óskað eftir staðfestingu frá Skattinum og sjúkrasjóði stéttarfélags og með bréfi, dags. 18. október 2024, hafi verið óskað eftir staðfestingu frá VIRK, útlistun á endurhæfingu og hvenær sú endurhæfing hafi hafist.

VIRK starfsendurhæfingarsjóður hafi sent staðfestingu með bréfi, dags. 23. október 2024, þar komi fram að beiðni læknis hafi borist VIRK 15. október 2024 og að henni hafi verið vísað áfram til ráðgjafa VIRK á E 10. júní 2024. Jafnframt hafi verið tilgreint að mjög löng bið væri eftir ráðgjafa á E og að ekki væri hægt að segja til um hvenær viðkomandi gæti átt von á fyrsta viðtali hjá ráðgjafa.

Með bréfi, dags. 30. október 2024, hafi umsókn kæranda um endurhæfingarlífeyri verið synjað. Í bréfinu segi m.a. að ekki hafi þótt rök fyrir því að meta endurhæfingartímabil þar sem fyrirliggjandi endurhæfingaráætlun hafi ekki verið talin nógu ítarleg í ljósi heildarvanda umsækjanda og óljóst væri hvernig endurhæfingin kæmi til með að stuðla að endurkomu á vinnumarkað, enda virtist virk endurhæfing þar sem tekið væri á heilsufarsvanda ekki hafa verið hafin. Kærandi hafi því ekki uppfyllt skilyrði um veitingu endurhæfingarlífeyris á grundvelli 7. gr. laga um félagslega aðstoð og hafi umsókn kæranda því verið synjað. Í bréfinu hafi kæranda verið leiðbeint um að ef breytingar yrðu á endurhæfingu eða aðstæðum þá væri hægt að leggja inn nýja umsókn og endurhæfingaráætlun frá VIRK eða annarra gagna frá fagaðilum sem staðfesti virka þátttöku í endurhæfingu.

Kærandi hafi sótt aftur um endurhæfingarlífeyri með umsókn, dags. 1. desember 2024, og hafi þá sótt um afturvirkar greiðslur frá 1. júlí 2024. Með bréfi Tryggingstofnunar, dags. 12. desember 2024, hafi kærandi fengið samþykkt mat endurhæfingarlífeyris frá 1. desember 2024 til 31. ágúst 2025, samtals níu mánuði. Í bréfinu segi að heimilt sé að veita greiðslur frá fyrsta degi næsta mánaðar eftir að öll skilyrði hafi verið uppfyllt og sé mat því samþykkt frá 1. desember 2024.

Afgreiðsla umsókna um endurhæfingarlífeyri byggist á 7. gr. laga um félagslega aðstoð og reglugerð um framkvæmd endurhæfingarlífeyris samkvæmt lögum um félagslega aðstoð nr. 661/2020.

Í 3. gr. reglugerðar nr. 661/2020 segi að Tryggingastofnun skuli meta hvort líklegt sé að sú endurhæfing sem lagt sé upp með í endurhæfingaráætlun muni stuðla að aukinni starfshæfni. Í 2. mgr. 4. gr. reglugerðarinnar segi að skilyrði greiðslna sé að umsækjandi taki þátt í endurhæfingu með starfshæfni að markamiði sem teljist fullnægjandi að mati framkvæmdaraðila. Í 5. gr. sömu reglugerðar komi fram að endurhæfingaráætlun skuli byggð á heildstæðri nálgun með það að markmiði að bæta heilsu og auka starfshæfni. Fram komi að Tryggingastofnun skuli meta heildstætt í hverju tilviki hvort endurhæfingaráætlun teljist fullnægjandi til að skilyrði fyrir greiðslum séu uppfyllt. Skilyrði fyrir greiðslum sé að umsækjandi taki þátt í skipulagðri endurhæfingu með starfshæfni að markmiði sem teljist fullnægjandi að mati framkvæmdaraðila og eigi hvorki rétt til launa í veikindaleyfi, né greiðslna frá sjúkrasjóðum eða teljist tryggður samkvæmt lögum um atvinnuleysistryggingar. Endurhæfingarlífeyrir taki þannig mið af því tímabili sem viðkomandi taki þátt í virkri skipulagðri endurhæfingu með utanumhaldi fagaðila þar sem áhersla sé lögð á endurkomu á vinnumarkað. Óvinnufærni ein og sér veiti ekki rétt til endurhæfingarlífeyris. Það sé mat Tryggingastofnunar að sú endurhæfing sem lögð hafi verið upp með í læknisvottorði, dags. 30. júlí 2024, hafi ekki talist nægilega ítarleg í ljósi heildarvanda kæranda og óljóst hvernig endurhæfingin kæmi til með að stuðla að endurkomu á vinnumarkað, enda virtist virk endurhæfing þar sem tekið væri á heilsufarsvanda ekki hafin.

Í ljósi framangreinds sé það niðurstaða stofnunarinnar að afgreiðsla á umsókn kæranda, dags. 30. október 2024, þ.e. að synja umsókn kæranda um endurhæfingarlífeyri sé rétt, miðað við fyrirliggjandi gögn í málinu. Sú niðurstaða sé byggð á faglegum sjónarmiðum sem og gildandi lögum og reglum.

Tryggingastofnun fari því fram á staðfestingu ákvörðunar sinnar frá 30. október 2024 um að synja kæranda um endurhæfingarlífeyri.

IV.  Niðurstaða

Ágreiningur máls þessa lýtur að því hvort kærandi hafi uppfyllt skilyrði fyrir greiðslu endurhæfingarlífeyris á tímabilinu 1. júní til 30. nóvember 2024, sbr. 7. gr. laga nr. 99/2007 um félagslega aðstoð. Í 1. mgr. ákvæðisins segir:

„Heimilt er að greiða endurhæfingarlífeyri í allt að 36 mánuði þegar ekki verður séð hver starfshæfni einstaklings sem er á aldrinum 18 til 67 ára verður til frambúðar eftir sjúkdóma eða slys. Greiðslur skulu inntar af hendi á grundvelli endurhæfingaráætlunar. Skilyrði fyrir greiðslum er að umsækjandi hafi átt lögheimili hér á landi samfellt 12 síðustu mánuði og taki þátt í endurhæfingu með starfshæfni að markmiði sem telst fullnægjandi að mati framkvæmdaraðila og eigi hvorki rétt til launa í veikindaleyfi né greiðslna frá sjúkrasjóðum eða teljist tryggður samkvæmt lögum um atvinnuleysistryggingar.“

Samkvæmt 4. mgr. sömu lagagreinar hefur Tryggingastofnun ríkisins eftirlit með því að endurhæfingaráætlun sé framfylgt og að skilyrði fyrir greiðslum séu að öðru leyti uppfyllt.

Á grundvelli 5. mgr. 7. gr. laga um félagslega aðstoð hefur verið sett reglugerð nr. 661/2020 um framkvæmd endurhæfingarlífeyris. Í 1. mgr. 3. gr. reglugerðarinnar segir um mat á líklegum árangri endurhæfingar:

„Tryggingastofnun skal meta heildstætt hvort líklegt sé að sú endurhæfing sem lagt er upp með í endurhæfingaráætlun muni stuðla að aukinni starfshæfni. Einnig skal stofnunin leggja mat á það hverju sinni hvort fyrirhuguð endurhæfing sem gerð er grein fyrir í endurhæfingar­áætlun, sbr. 5. gr., þ.m.t. viðmið um ástundun og viðtöl, sé fullnægjandi með tilliti til markmiðs endurhæfingarinnar.“

Í 1. mgr. 5. gr. reglugerðarinnar segir um endurhæfingaráætlun:

„Endurhæfingaráætlun skal ávallt taka mið af heilsufarsvanda umsækjanda með það að markmiði að aðstoða umsækjanda við að leita lausna við þeirri færniskerðingu eða heilsubresti sem veldur skertri starfshæfni hans. Leitast skal við að endurhæfingaráætlun byggi á heildstæðri nálgun með það að markmiði að bæta heilsu og auka starfsorku og starfshæfni. Tryggingastofnun metur heild­stætt í hverju tilviki hvort endurhæfingaráætlun teljist fullnægjandi til að skilyrði fyrir greiðslum séu upp­fyllt.“

Heimild til greiðslu endurhæfingarlífeyris er samkvæmt framangreindu bundin ákveðnum skilyrðum. Ágreiningur málsins lýtur að því hvort þau skilyrði séu uppfyllt.

Samkvæmt 14. gr. laga um félagslega aðstoð gilda ákvæði laga um almannatryggingar um bætur félagslegrar aðstoðar eftir því sem við á. Þá segir í 2. málsl. 13. gr. laga um félagslega aðstoð að beita skuli IV. kafla A, V. og VI. kafla laga um almannatryggingar við framkvæmd laganna. Í 1. mgr. 32. gr. laga nr. 100/2007 um almannatryggingar kemur fram að réttur til bóta stofnist frá og með þeim degi er umsækjandi teljist uppfylla skilyrði til bótanna og að bætur skuli reiknaðar frá fyrsta degi næsta mánaðar eftir að bótaréttur sé fyrir hendi.

Meðal gagna málsins er læknisvottorð B, dags. 30. júlí 2024, þar sem fram kemur sjúkdómsgreiningin „Depressive disorder nos“. Um sjúkrasögu segir:

„Mikil viðvarandi vanlíðan seinustu 2 ár. Engin fyrr geðsaga. Depurð, framtaksleysi, vonleysi og þreyta ríkjandi. Einnig mikill kvíði. Seinustu árin verið mikið álag, […]. Einnig menopausa á þessum tíma.Svefn slæmur, vaknar mikið, x2-3, yfirleitt ekki lengi að sofna aftur, sefur ca 6 klst. Lengi að sofna á kvöldin. Mikil matarlyst, þyngst eitthvað. Psychcomotor retardation. Finnst hún ólík sjálfri sér.Starfar sem X en sagði upp vegna þess að treystir sér ekki til að vera í vinnu vegna þess hvað hún er utan við sig og framtakslaus vegna þunglyndis. Fannst hún orðin hættuleg í umferðinni.Býr ein og á uppkomin börn og barnabörn. Gott samband. Sinnir barnabörnunum eins og getur en hfur ekki orku í nokkra aðra virkni. Ríkjandi vanlíðan. Hafin lyfjameðferð með escitalopram, trappað upp, komin í 20mg nú, hlutasvörun. Nær að fara í sund einstaka sinnum, í infra. Engin önnur virkni. Er að bíða eftir virk.Er ekki í stéttarfélagi og hefur því verið framfærslulaus frá 1.jún.”

Í samantekt og rökum segir:

„Núverandi vinnufærni: Er með verslunarskólapróf og meirapróf […].Hefur stafað sem X í verktöku. Er nú orðin að fullu óvinnufær vegna þunglyndis.

Framtíðar vinnufærni: Stefnir aftur á vinnumarkað í bata. Langar að komast í fastráðningu, sér fyrir sér mögulega einhverskonar umönnunarstarf.

Samantekt: X kona með þunglyndi og ríkjandi vanvirkni, orkuleysi og vonleysi. Hætti að geta unnið vegna þunglyndis 1.jún 2024. Er að bíða eftir VIRK og hefur hafið meðferð með SSRI.“

Í tillögu að meðferð sem er áætlað að standi yfir í 6 mánuði segir:

„Endurhæfingaráætlun: - Búið að sækja um endurhæfingu í VIRK, sótt um í maí 2024 þannig ætti að fara að komast að.- Innstilling lyfjameðferð með SSRI lyfjum, eftirlit hjá undirritaðri mánaðarlega.“

Í bréfi frá VIRK starfsendurhæfingarsjóði, dags. 23. október 2024, segir:

„Það staðfestist hér með að beiðni læknis fyrir A, barst VIRK þann 15.10.2024 [sic].

Beiðni var vísað áfram til ráðgjafa VIRK á E þann 10.6.2024 og verður haft samband við viðkomandi eins fljótt og auðið er. Þess skal þó getið að mjög löng bið er eftir ráðgjafa á E og ekki hægt að segja til um hvenær A megi eiga von á fyrsta viðtali hjá ráðgjafa.“

Í fyrirliggjandi endurhæfingaráætlun vegna tímabilsins 22. nóvember 2024 til 31. ágúst 2025 kemur fram að kærandi hafi byrjað í þjónustu hjá VIRK 11. nóvember 2024 og að fyrsta viðtal hjá ráðgjafa hafi verið þann sama dag. Tryggingstofnun ríkisins hefur samþykkt endurhæfingarlífeyri frá 1. desember 2024.

Ágreiningur í máli þessu snýst um það hvort kærandi eigi rétt á greiðslum endurhæfingarlífeyris frá 1. júní 2024 til 30. nóvember 2024. Tryggingastofnun ríkisins telur að skilyrði fyrir greiðslum endurhæfingarlífeyris hafi ekki verið uppfyllt fyrr en 1. desember 2024, n.t.t. fyrsta degi næsta mánaðar eftir að kærandi byrjaði hjá VIRK í nóvember 2024. Í kærðri ákvörðun Tryggingastofnunar segir að fyrirliggjandi endurhæfingaráætlun sé ekki nógu ítarleg í ljósi heildarvanda kæranda og óljóst hvernig endurhæfing komi til með að stuðla að endurkomu á vinnumarkað, enda virðist virk endurhæfing þar sem tekið sé á heilsufarsvanda vart hafin.

Úrskurðarnefnd velferðarmála, sem meðal annars er skipuð lækni, telur að kærandi glími við andlega færniskerðingu sem orsaki skerta vinnugetu. Samkvæmt endurhæfingaráætlun B læknis fólst endurhæfing kæranda í því að sótt hafi verið um hjá VIRK í maí 2024, lyfjameðferð með SSRI lyfjum ásamt mánaðarlegu eftirliti læknis. Úrskurðarnefndin telur að lyfjameðferð og eftirlit hjá lækni geti verið fullnægjandi endurhæfing til að byrja með þegar um alvarlegt þunglyndi er að ræða líkt og í tilviki kæranda. Samkvæmt læknisvottorði B var innstilling lyfjameðferðar hafin þegar hún ritaði læknisvottorðið 30. júlí 2024. Gögn málsins gefa því til kynna að kerfisbundin meðferð hafi verið hafin í lok júlí 2024. Með hliðsjón af framangreindu telur úrskurðarnefndin rétt að miða upphafstíma endurhæfingarlífeyris við 1. ágúst 2024, sbr. 1. mgr. 32. gr. laga um almannatryggingar.

Ákvörðun Tryggingastofnunar ríkisins um upphafstíma greiðslna endurhæfingarlífeyris til kæranda er því felld úr gildi. Upphafstími endurhæfingarlífeyris skal vera 1. ágúst 2024.

Ú R S K U R Ð A R O R Ð

Ákvörðun Tryggingastofnunar ríkisins um upphafstíma greiðslna endurhæfingarlífeyris til A, er felld úr gildi. Upphafstími endurhæfingarlífeyris skal vera 1. ágúst 2024.

F.h. úrskurðarnefndar velferðarmála

Rakel Þorsteinsdóttir