Mál nr. 555/2025-Úrskurður

 

Úrskurðarnefnd velferðarmála

Mál nr. 555/2025

Miðvikudaginn 12. nóvember 2025

A

gegn

Tryggingastofnun ríkisins

Ú R S K U R Ð U R

Mál þetta úrskurða Rakel Þorsteinsdóttir lögfræðingur, Eva Dís Pálmadóttir lögfræðingur og Kristinn Tómasson læknir.

Með rafrænni kæru, móttekinni 3. september 2025, kærði A, til úrskurðarnefndar velferðarmála synjun Tryggingastofnunar ríkisins frá 25. ágúst 2025 á umsókn kæranda um endurhæfingarlífeyri.

I.  Málsatvik og málsmeðferð

Kærandi sótti um greiðslur endurhæfingarlífeyris frá 1. apríl 2025 með umsókn 12. ágúst 2025. Með bréfi Tryggingastofnunar ríkisins, dags. 25. ágúst 2025, var umsókn kæranda synjað á þeim grundvelli að endurhæfingaráætlun teldist ekki nógu ítarleg í ljósi heildarvanda kæranda og óljóst væri hvernig endurhæfing kæmi til með að stuðla að endurkomu á vinnumarkað, enda virtist virk endurhæfing þar sem tekið væri á heilsuvanda vart vera hafin. Kærandi sótti á ný um endurhæfingarlífeyri með umsókn 1. september 2025. Með bréfi, dags. 3. október 2025, var umsókn kæranda um sjúkra- og endurhæfingargreiðslur samþykkt frá 1. september 2025 til 28. febrúar 2026.

Kæra barst úrskurðarnefnd velferðarmála 3. september 2025. Með bréfi, dags. 4. september 2025, óskaði úrskurðarnefnd eftir greinargerð Tryggingastofnunar ríkisins ásamt gögnum málsins. Með bréfi, dags. 11. september 2025, barst greinargerð Tryggingastofnunar ríkisins og var hún send kæranda til kynningar með bréfi úrskurðarnefndar, dagsettu sama dag Athugasemdir bárust ekki.

II.  Sjónarmið kæranda

Í kæru greinir kærandi frá því að Tryggingastofnun ríkisins hafi synjað umsókn hans vegna ófullnægjandi endurhæfingaráætlunar frá heimilislækni sem hafi haldið utan endurhæfinguna sumarið 2025. Kærandi hafi sinnt þeim þáttum sem hægt hafi verið að sinna. Sótt hafi verið um hjá VIRK í lok apríl eftir langa bið. Kærandi hafi skrifað undir þjónustusamning 4. júlí 2025 og hafi þá verið tjáð að það væri enn lengri bið. Þetta sé þriðja synjunin sem kærandi hafi fengið þrátt fyrir að hafa gert allt sem hann hafi getað til þess að sinna endurhæfingu á meðan hann væri að bíða eftir að komast til ráðgjafa hjá VIRK.

Það eigi ekki að bitna á þjónustuþegum að allt kerfið fari í frí og að það sé bið eftir að komast inn í úrræði. Kærandi hafi núna verið tekjulaus í fjóra mánuði og fjölskyldan hafi ekki efni á því að lifa. Kærandi fái ekki fjárhagsaðstoð frá sveitarfélaginu þar sem þau hjónin séu samkvæmt síðasta skattframtali talin of tekjuhá og þá hafi fjárhagserfiðleikar þeirra ekki verið teknir greina. Kærandi sé gjörsamlega að bugast á þessu og geti ekki meir. Þau hafi getað borgað leiguna og eigi því núna 13.000 kr. til þess að lifa út mánuðinn ef þau borgi ekki neina reikninga. Þess fyrir utan þá hafi eiginkona kæranda ekki heldur fengið greitt frá Tryggingastofnun þennan mánuð nema brot vegna skuldar sem hafi myndast hjá henni vegna greiðslna úr lífeyrissjóði. Heimilislæknir kæranda hafi oft haldið utan um endurhæfingu einstaklinga og skilji ekki hvers vegna honum sé ítrekað synjað vegna ófullnægjandi endurhæfingaráætlunar. Kærandi hafi verið í endurhæfingu hjá henni síðan hann hafi farið í veikindaleyfi, hann hafi klárað sjúkradagpeningana í lok maí og hafi verið tekjulaus síðan. Það sé ekki hægt að bjóða fólki upp á svona endalausa bið og að kerfið loki bara á fólk í viðkvæmri stöðu. Kona kæranda sé einnig veik og þau geti ekki borgað leikskólagjöld eða neitt.

III.  Sjónarmið Tryggingastofnunar ríkisins

Í greinargerð Tryggingastofnunar ríkisins kemur fram kærð sé ákvörðun, dags. 25. ágúst 2025, þar sem greiðslum endurhæfingarlífeyris hafi verið synjað.

Ákvörðun í máli þessu hafi verið tekin á grundvelli laga nr. 99/2007 um félagslega aðstoð og nr. 100/2007 um almannatryggingar eins og þau hafi verið fyrir breytingar sem hafi tekið gildi 1. september 2025. Í kjölfarið verði vísað til laganna í þeirri mynd sem þau hafi verið fyrir breytingarnar. Þá sé einnig vísað til reglugerðar nr. 661/2020, þrátt fyrir að hún hafi verið felld úr gildi 1. september 2025 með reglugerð nr. 933/2025.

Kveðið sé á um endurhæfingarlífeyri í 7. gr. laga um félagslega aðstoð. Í 1. mgr. segi:

„Heimilt er að greiða endurhæfingarlífeyri í allt að 36 mánuði þegar ekki verður séð hver starfshæfni einstaklings sem er á aldrinum 18 til 67 ára verður til frambúðar eftir sjúkdóma eða slys. Greiðslur skulu inntar af hendi á grundvelli endurhæfingaráætlunar. Skilyrði fyrir greiðslum er að umsækjandi hafi átt lögheimili hér á landi samfellt 12 síðustu mánuði og taki þátt í endurhæfingu með starfshæfni að markmiði sem telst fullnægjandi að mati framkvæmdaraðila og eigi hvorki rétt til launa í veikindaleyfi né greiðslna frá sjúkrasjóðum eða teljist tryggður samkvæmt lögum um atvinnuleysistryggingar.“

Í 2. mgr. 7. gr. sé að finna heimild til að framlengja greiðslutímabil að vissu skilyrði uppfylltu:

„Heimilt er að framlengja greiðslutímabil skv. 1. mgr. um allt að 24 mánuði enda sé starfsendurhæfing með það að markmiði að auka atvinnuþátttöku enn talin raunhæf að mati framkvæmdaraðila, sbr. 1. mgr.“

Nánar sé kveðið á um endurhæfingarlífeyri í reglugerð nr. 661/2020. Í 3. gr. reglugerðarinnar sé kveðið á um mat á líklegum árangri endurhæfingar, en þar segi:

„Tryggingastofnun skal meta heildstætt hvort líklegt sé að endurhæfing sem lagt er upp með í endurhæfingaráætlun muni stuðla að aukinni starfshæfni. Einnig skal stofnunin leggja mat á það hverju sinni hvort fyrirhuguð endurhæfing sem gerð er grein fyrir í endurhæfingaráætlun, sbr. 5. gr., þ.m.t. viðmið um ástundun og viðtöl, sé fullnægjandi með tilliti til markmiðs endurhæfingarinnar.“

Um nánari skilyrði og framkvæmd endurhæfingarlífeyris sé fjallað í reglugerðinni. Í 4. gr. reglugerðarinnar sé fjallað um upphaf, tímalengd og skilyrði greiðslna og í 5. gr. um sjálfa endurhæfingaráætlunina. Þá sé tiltekið í 6. gr. reglugerðarinnar hverjir geti verið umsjónaraðilar endurhæfingaráætlunar og í 8. gr. komi fram að Tryggingastofnun skuli hafa eftirlit með því að greiðsluþegi sinni endurhæfingu sinni, að endurhæfingaráætlun sé framfylgt og að skilyrði fyrir greiðslum séu að öðru leyti uppfyllt. Til dæmis að lögð sé fram endurhæfingaráætlun, lagðir fram endurhæfingarþættir og að umsækjandi taki þátt í endurhæfingunni með fullnægjandi hætti. Í áðurnefndri 7. gr. laga um félagslega aðstoð sé skýrt kveðið á um að skilyrði greiðslna sé endurhæfing með starfshæfni að markmiði, enda ekki álitið að sjúkdómsmeðferð eða óvinnufærni sem slík veiti rétt til greiðslu endurhæfingarlífeyris.

Í 13. gr. laga um félagslega aðstoð segi að beita skuli IV. kafla A, V. og VI. kafla laga um almannatryggingar við framkvæmd laganna.

Í 32. gr. laga um almannatryggingar segi að réttur til greiðslna stofnist frá og með þeim degi er umsækjandi teljist uppfylla skilyrði til greiðslna og skuli greiðslur reiknaðar frá fyrsta degi næsta mánaðar eftir að greiðsluréttur sé fyrir hendi. Greiðslur falli niður í lok þess mánaðar er bótarétti ljúki. Kærandi hafi sótt um endurhæfingarlífeyri frá 1. apríl 2025 með umsókn, dags. 12. ágúst 2025.

Kærandi hafi fengið synjun á umsókn um endurhæfingarlífeyri með bréfi, dags. 25. ágúst 2025, á þeim grundvelli að fyrirliggjandi endurhæfingaráætlun hafi ekki þótt nægilega ítarleg í ljósi heildarvanda hans.

Við mat á umsókn um endurhæfingarlífeyri, dags. 12. ágúst 2025, hafi legið fyrir læknisvottorð, dags. 8. ágúst 2025, og staðfesting frá VIRK, dags. 31. júlí 2025.

Í greinargerð Tryggingastofnunar er greint frá sjúkdómsgreiningum sem koma fram í læknisvottorði, dags. 8. ágúst 2025, ásamt sjúkrasögu. Í tillögu um meðferð segi:

„Áætlun: -núverandi er hann í reglulegu eftirliti á heilsugæslu amk x1/mánuði.- hreyfing amk x30 mín dag, er að byrja í ræktinni, þarf sálfræðiaðstoð og þverfaglega nálugn Virk sem hann er á bið eftir sjá áætlun frá þeim þegar að því kemur. Hann er tekjulaus og hefur ekki fjarhagslega burði til að sækja sér sálfræðiaðstoðar á eigin vegum.- á tíma hjá næringarfræðing nú síðar í ágúst. Lífeyrir er alger forsenda þess að hann geti stundað endurhæfingu og geti séð fyrir fjölskyldu sinni, fékk síðast greidda sjúkradagpeninga 30.05.2025 tekjulaus síðan. Endurhæfingaráætlun er einnig upplistuð í endurhæfingarvottorði frá 25/06/2025.“

Samkvæmt framangreindu læknisvottorði sé það mat læknis að kærandi hafi verið óvinnufær frá 25. febrúar 2025.

Í staðfestingu frá VIRK, dags. 31. júlí 2025, komi fram að beiðni hafi borist frá lækni kæranda 23. apríl 2025, sem hafi í framhaldinu verið vísað til ráðgjafa hjá VIRK. Þá komi fram að haft verði samband við kæranda eins fljótt og auðið sé, en bið eftir ráðgjafa sé að jafnaði átta til níu vikur að svo stöddu.

Afgreiðsla umsókna um endurhæfingarlífeyri sé byggð á 7. gr. laga um félagslega aðstoð og reglugerð nr. 661/2020 um framkvæmd endurhæfingarlífeyris samkvæmt lögum um félagslega aðstoð.

Í 3. gr. reglugerðar nr. 661/2020 segi að Tryggingastofnun skuli meta hvort líklegt sé að sú endurhæfing sem lagt sé upp með í endurhæfingaráætlun muni stuðla að aukinni starfshæfni. Í 2. mgr. 4. gr. reglugerðarinnar segi að skilyrði greiðslna sé að umsækjandi taki þátt í endurhæfingu með starfshæfni að markamiði sem teljist fullnægjandi að mati framkvæmdaraðila. Í 5. gr. reglugerðar nr. 661/2020 komi fram að endurhæfingaráætlun skuli byggð á heildstæðri nálgun með það að markmiði að bæta heilsu og auka starfshæfni. Fram komi að Tryggingastofnun skuli meta heildstætt í hverju tilviki hvort endurhæfingaráætlun teljist fullnægjandi til að skilyrði fyrir greiðslum séu uppfyllt. Skilyrði fyrir greiðslum sé að umsækjandi taki þátt í skipulagðri endurhæfingu með starfshæfni að markmiði sem teljist fullnægjandi að mati framkvæmdaraðila og eigi hvorki rétt til launa í veikindaleyfi, né greiðslna frá sjúkrasjóðum eða teljist tryggður samkvæmt lögum um atvinnuleysistryggingar. Endurhæfingarlífeyrir taki þannig mið af því tímabili sem viðkomandi taki þátt í virkri skipulagðri endurhæfingu með utanumhaldi fagaðila þar sem áhersla sé lögð á endurkomu á vinnumarkaði. Óvinnufærni ein og sér veiti ekki rétt til endurhæfingarlífeyris.

Í tillögum að endurhæfingu komi fram að endurhæfing kæranda feli í sér eftirlit hjá heimilislækni einu sinni í mánuði, viðtal við næringarfræðing í ágúst og daglegar æfingar í að minnsta kosti 30 mínútur. Við skoðun málsins hafi það verið mat stofnunarinnar að ekki væru næg rök til að meta endurhæfingartímabil. Ástæðan sé sú að fyrirliggjandi endurhæfingaráætlun hafi ekki verið talin nægilega ítarleg í ljósi heildarvanda umsækjanda. Þá hafi verið óljóst hvernig endurhæfingin myndi stuðla að endurkomu á vinnumarkað, þar sem virk endurhæfing, sem tæki á heilsuvanda, virtist varla hafa verið hafin. Það sé því mat stofnunarinnar að umsækjandi hafi ekki uppfyllt skilyrði fyrir veitingu endurhæfingarlífeyris á því tímabili sem hann hafi sótt um eða frá 1. apríl 2025, samkvæmt 7. gr. um félagslega aðstoð.

Í læknisvottorði og staðfestingu frá VIRK komi fram að kærandi sé á biðlista eftir ráðgjafa hjá VIRK. Ný umsókn um endurhæfingarlífeyri hafi borist stofnuninni þann 1. september 2025, ásamt endurhæfingaráætlun. Samkvæmt gildandi lögum nr. 99/2007, sem hafi tekið gildi sama dag, geti kærandi átt mögulegan rétt til greiðslna frá og með 1. september 2025.

Af öllu framangreindu telji Tryggingastofnun ekki vera forsendur til að breyta fyrri ákvörðun sinni um endurhæfingarlífeyri, dags. 25. ágúst 2025. Tryggingastofnun óski því eftir staðfestingu á þeirri ákvörðun.

IV.  Niðurstaða

Mál þetta lýtur að ákvörðun Tryggingastofnunar ríkisins um að synja kæranda um endurhæfingarlífeyri. Ágreiningur máls þessa snýr að því hvort kærandi hafi uppfyllt skilyrði fyrir greiðslu endurhæfingarlífeyris á tímabilinu 1. apríl 2025 til 31. ágúst 2025, sbr. þágildandi 7. gr. laga nr. 99/2007 um félagslega aðstoð. Í 1. mgr. ákvæðisins segir:

„Heimilt er að greiða endurhæfingarlífeyri í allt að 36 mánuði þegar ekki verður séð hver starfshæfni einstaklings sem er á aldrinum 18 til 67 ára verður til frambúðar eftir sjúkdóma eða slys. Greiðslur skulu inntar af hendi á grundvelli endurhæfingaráætlunar. Skilyrði fyrir greiðslum er að umsækjandi hafi átt lögheimili hér á landi samfellt 12 síðustu mánuði og taki þátt í endurhæfingu með starfshæfni að markmiði sem telst fullnægjandi að mati framkvæmdaraðila og eigi hvorki rétt til launa í veikindaleyfi né greiðslna frá sjúkrasjóðum eða teljist tryggður samkvæmt lögum um atvinnuleysistryggingar.“

Á grundvelli 5. mgr. 7. gr. laga um félagslega aðstoð var sett þágildandi reglugerð nr. 661/2020 um framkvæmd endurhæfingarlífeyris. Í 1. mgr. 3. gr. reglugerðarinnar segir um mat á líklegum árangri endurhæfingar:

„Tryggingastofnun skal meta heildstætt hvort líklegt sé að sú endurhæfing sem lagt er upp með í endurhæfingaráætlun muni stuðla að aukinni starfshæfni. Einnig skal stofnunin leggja mat á það hverju sinni hvort fyrirhuguð endurhæfing sem gerð er grein fyrir í endurhæfingar­áætlun, sbr. 5. gr., þ.m.t. viðmið um ástundun og viðtöl, sé fullnægjandi með tilliti til markmiðs endurhæfingar­innar.“

Í 1. mgr. 5. gr. reglugerðarinnar segir um endurhæfingaráætlun:

„Endurhæfingaráætlun skal ávallt taka mið af heilsufarsvanda umsækjanda með það að markmiði að aðstoða umsækjanda við að leita lausna við þeirri færniskerðingu eða heilsubresti sem veldur skertri starfshæfni hans. Leitast skal við að endurhæfingaráætlun byggi á heildstæðri nálgun með það að markmiði að bæta heilsu og auka starfsorku og starfshæfni. Tryggingastofnun metur heild­stætt í hverju tilviki hvort endurhæfingaráætlun teljist fullnægjandi til að skilyrði fyrir greiðslum séu upp­fyllt.“

Heimild til greiðslu endurhæfingarlífeyris er samkvæmt framangreindu bundin ákveðnum skilyrðum. Ágreiningur málsins lýtur að því hvort þau skilyrði hafi verið uppfyllt á umdeildu tímabili.

Meðal gagna málsins er læknisvottorð B, dags. 8. ágúst 2025, þar sem fram koma eftirfarandi sjúkdómsgreiningar:

„Blandin kvíða- og geðlægðarröskun

Myalgia

Calculus of kidney

Fitulifur, ekki flokkuð annars staðar

Offita, ótilgreind“

Um sjúkrasögu segir:

„X ára fjölskyldumaður flutti hingað til lands frá C X ára, fjöltyngdur og talar mjög góða íslensku.undanfarna mánuði hamlandi þreyta og andleg þyngsl nú til lengri tíma , svefntruflun einnig. framtaksleysi go hamlandi þunglyndiseinkenni greindur með þunglyndi og kvíða og hafin lyfjameðferð með duloxetin , hætti vegna aukaverkan areynum nú meðferð með wellbutrin.Er að glíma við ofþyngd og komin með fitulifur, verið að glíam við mikil eineknni frá kvið í formi vekrja sem hafa þó skánað við uppvinnslu sumsé staðfest fitulifur verið að reyna að gera lífstílsbreytingar en gengur hægt , þyrfti að byggja upp líkamlegt þrek og vinna með þyngdartap áfram. á tíma hjá næringarfræðing nú í ágústí lok maí og júní verið glíma við nýrnasteina bakverkur samhliða.”

Í samantekt segir:

„Núverandi vinnufærni: engin

Framtíðar vinnufærni: góðir með þverfaglegri endurhæfingu

Samantekt: sumsé X ára fjölskyldufaðir sem er að glíma við hamlandi kvíða og geðlægðarröskun auk stokerfisvekrja, nýrnasteina fitulifur og offitu ofl. Búinn að vera í regluelgu eftirliti hér á heilsugæsli og verið að vinna með streituþætti og hafin lyfjameðferð sem dugar ekki til. er á bið eftir þjónustu VIRK frá lok apríl , tekjulaus þarf lífeyri til að geta unnið að enduhæfingu sem heilsugæsla styður hann í þar til hann kemst að í VIRK“

Í tillögu að meðferð sem áætlað er að vari í sex til 12 mánuði segir:

„Áætlun: -núverandii er hann í regluelgu eftirliti á heilsugæslu amk x1/mánuði.- hreyfing amk x30 mín dag, er að byrja í ræktinni-þarf sálfræðiaðstoð og þverfaglega nálugn Virk sem hann er á bið eftir sjá áætlun frá þeim þegar að því kemur. Hann er tekjulaus og hefur ekki fjarhagslega burði til að sækja sér sálfræðiaðstoðar á eigin vegum.- á tíma hjá næringarfræðing nú síðar í ágústLífeyrir er alger forsenda þess að hann geti stundað endurhæfingu og geti séð fyrir fjölskyldu sinni , fékk síðast greidda sjúkradagpeninga 30.05.2025 tekjulaus síðan.Endurhæfingaráætlun er einnig upplistuð í endurhæfingarvottorði frá 25/06/2025“

Í viðbótarupplýsingum segir:

„verið óvinnufær frá febrúar og er ekki að komast til vinnu og ljóst að hann þarf þverfaglega endurhæfingu mtt að ná upp andlegu og líkamelgu þreki og endurkomu á vinnumarkað því sótt um VIRK og er nú á bið eftir þjónustu þar frá lk apríl. Í millitíðinni hefur UR haldið utan um hans endurhæfingu með lyfjameðfeðr og regluegu eftirliti hér á heilsugæslu á tíma hjá næringarfræðing í Heilsuklasa nú á næstunni, farinn að studna daglega hreyfingu í amk 30 mín , er að komast af stað með líkamsrækt og eins og fyrr segir á bið eftir frekari þverfaglegri þjónustu.verið óvinnufær frá febrúar og er ekki að komast til vinnu og ljóst að hann þarf þverfaglega endurhæfingu mtt að ná upp andlegu og líkamelgu þreki og endurkomu á vinnumarkað því sótt um VIRK og er nú á bið eftir þjónustu þar frá lk apríl. Í millitíðinni hefur UR haldið utan um hans endurhæfingu með lyfjameðfeðr og regluegu eftirliti hér á heilsugæslu á tíma hjá næringarfræðing í Heilsuklasa nú á næstunni, farinn að studna daglega hreyfingu í amk 30 mín , er að komast af stað með líkamsrækt og eins og fyrr segir á bið eftir frekari þverfaglegri þjónustu.Verið tekjulaus frá 30/5 fékk þá síðustu sjúkradagpeningagreisðluna, sótt um endurhæfingarlífeyri hjá TR sem af óskiljanlegum ástæðum var hafnað er með börn á framfæri og háður því að fá lífeyri.”

Einnig liggur fyrir læknisvottorð B, dags. 25. júní 2025. Þá liggur fyrir bréf frá VIRK, dags. 31. júlí 2025, þar sem segir:

„Það staðfestist hér með að beiðni læknis fyrir A, barst VIRK þann 23.4.2025.

Beiðni var vísað áfram til ráðgjafa VIRK þann 4.7.2025 og verður haft samband við viðkomandi eins fljótt og auðið er. Þess skal þó getið að bið eftir ráðgjafa er 8-9 vikur eins og staðan er í dag.“

Ágreiningur málsins lýtur að því hvort skilyrði greiðslna endurhæfingarlífeyris hafi verið uppfyllt á tímabilinu 1. apríl 2025 til 31. ágúst 2025. Í kærðri ákvörðun Tryggingastofnunar segir að endurhæfingaráætlun teljist ekki nógu ítarleg í ljósi heildarvanda kæranda og óljóst sé hvernig endurhæfing komi til með að stuðla að endurkomu á vinnumarkað, enda virtist virk endurhæfing þar sem tekið sé á heilsuvanda vart vera hafin.

Úrskurðarnefnd velferðarmála, sem meðal annars er skipuð lækni, telur að kærandi glími við andlega og líkamlega færniskerðingu sem orsaki skerta vinnugetu. Samkvæmt endurhæfingaráætlun B læknis fólst endurhæfing kæranda á umdeildu tímabili í mánaðarlegu eftirliti hjá heimilislækni, daglegri hreyfingu í a.m.k. 30 mínútur og tíma hjá næringarfræðingi í ágúst 2025. Þá segir í vottorðinu að kærandi þurfi sálfræðiaðstoð og þverfaglega nálgun hjá VIRK. Samkvæmt gögnum málsins er kærandi á biðlista eftir að komast að hjá ráðgjafa VIRK.

Úrskurðarnefndin telur að lyfjameðferð og eftirlit hjá lækni ásamt hreyfingu hafi verið fullnægjandi endurhæfing til að byrja með í tilviki kæranda. Úrskurðarnefndin telur því ljóst að kærandi hafi uppfyllt skilyrði endurhæfingarlífeyris fyrir það tímamark sem Tryggingastofnun miðar við. Samkvæmt staðfestingu frá D, dags. 30. maí 2025, fékk kærandi greidda sjúkradagpeninga til 26. maí 2025 og getur því ekki fengið greiddan endurhæfingarlífeyri fyrir það tímamark, sbr. 1. mgr. 7. gr. laga um félagslega aðstoð. Ekki kemur þó skýrt fram í gögnum málsins hvenær lyfjameðferð undir eftirliti læknis hófst. Úrskurðarnefndin telur því rétt að vísa málinu aftur til Tryggingastofnunar til rannsóknar á framangreindu og mats á upphafstíma endurhæfingarlífeyris.

Að öllu framangreindu virtu er ákvörðun Tryggingastofnunar ríkisins um að synja kæranda um greiðslu endurhæfingarlífeyris vegna tímabilsins 1. apríl 2025 til 31. ágúst 2025 felld úr gildi og málinu vísað aftur til stofnunarinnar til nýrrar meðferðar.

Ú R S K U R Ð A R O R Ð

Ákvörðun Tryggingastofnunar ríkisins um að synja A, um endurhæfingarlífeyri vegna tímabilsins 1. apríl 2025 til 31. ágúst 2025, er felld úr gildi. Málinu er vísað aftur til stofnunarinnar til nýrrar meðferðar.

F.h. úrskurðarnefndar velferðarmála

Rakel Þorsteinsdóttir