Mál nr. 663/2025-Úrskurður

 

Úrskurðarnefnd velferðarmála

Mál nr. 663/2025

Fimmtudaginn 15. janúar 2026

A

gegn

Seltjarnarnesbæ

Ú R S K U R Ð U R 

Mál þetta úrskurða Hólmfríður Birna Guðmundsdóttir lögfræðingur, Agnar Bragi Bragason lögfræðingur og Eva Dís Pálmadóttir lögfræðingur.

Með kæru, dags. 10. október 2025, kærði A, til úrskurðarnefndar velferðarmála ákvörðun Seltjarnarnesbæjar um hækkun húsaleigu.

I.  Málsatvik og málsmeðferð

Kærandi er leigutaki að félagslegu leiguhúsnæði í eigu Seltjarnarnesbæjar og undirritaði húsaleigusamning þann 22. júlí 2025.

Kærandi lagði fram kæru hjá úrskurðarnefnd velferðarmála 10. október 2025 vegna ákvörðunar Seltjarnarnesbæjar um hækkun húsaleigu. Með bréfi til kæranda, dags. 14. október 2025, óskaði úrskurðarnefndin eftir afriti af hinni kærðu ákvörðun. Sú beiðni var ítrekuð 30. október og 2. desember 2025. Svar barst ekki. Með bréfi, dags. 3. desember 2025, var Seltjarnarnesbær upplýstur um kæruna og óskað var eftir upplýsingum um hvort fyrir lægi kæranleg ákvörðun er varðaði kæruefnið. Svar barst 9. desember 2025 og var það kynnt kæranda með bréfi úrskurðarnefndar, dags. 10. desember 2025.

II.  Sjónarmið kæranda

Kærandi greinir frá því að húsaleigusamningur félagslegrar íbúðar sé til eins árs í senn lögum samkvæmt. Húsaleiga kæranda hafi verið hækkuð um 30.000 kr. 1. september 2025 án fyrirvara og óski kærandi þess að það gangi til baka sem fyrst. Húsaleigusamningur kæranda hljóði upp á rúmlega 170.000 kr. en hann hafi fengið 180.000 kr. rukkun í heimabanka sinn.

III.  Sjónarmið Seltjarnarnesbæjar

Í svari Seltjarnarnesbæjar til úrskurðarnefndar velferðarmála kemur fram að af kærunni megi ráða að hún beinist að húsaleigusamningi sem hafi verið undirritaður þann 22. júlí 2025. Seltjarnarnesbæ hafi hvorki borist fyrirspurnir né athugasemdir frá kæranda varðandi umræddan samning fyrir undirritun hans. Rúmlega mánuði eftir undirritun húsaleigusamningsins hafi borist tölvupóstur frá kæranda varðandi fjárhæð húsaleigunnar og fyrirspurn um hvort hækkun húsaleigunnar teldist eðlileg. Kæranda hafi verið svarað þann 2. september 2025 með útskýringu á hækkun leiguverðs á milli ára. Kærandi hafi svarað þeim tölvupósti samdægurs en síðan þá hafi engar athugasemdir borist frá honum vegna málsins. 

III.  Niðurstaða

Kærð er ákvörðun Seltjarnarnesbæjar um hækkun húsaleigu vegna félagslegs leiguhúsnæðis.

Hlutverk úrskurðarnefndar velferðarmála er að úrskurða í kærumálum vegna stjórnvaldsákvarðana eftir því sem mælt er fyrir um í lögum sem kveða á um málskot til nefndarinnar, sbr. 1. gr. laga nr. 85/2015 um úrskurðarnefnd velferðarmála. Í 1. málsl. 1. mgr. 6. gr. laga nr. 40/1991 um félagsþjónustu sveitarfélaga kemur fram að aðila máls hjá félagsþjónustu sveitarfélaga sé heimilt að kæra stjórnvaldsákvarðanir sem teknar eru samkvæmt lögunum til úrskurðarnefndar velferðarmála. Þannig er grundvöllur þess að úrskurðarnefndin geti tekið kæru til efnislegrar meðferðar að fyrir liggi stjórnvaldsákvörðun. Um stjórnvaldsákvörðun er að ræða þegar stjórnvöld taka ákvarðanir um rétt eða skyldur manna í skjóli stjórnsýsluvalds, sbr. 2. mgr. 1. gr. stjórnsýslulaga nr. 37/1993. Þær ákvarðanir stjórnvalda sem ekki eru teknar í skjóli stjórnsýsluvalds, til dæmis þær sem eru einkaréttarlegs eðlis, teljast ekki stjórnvaldsákvarðanir.

Þegar stjórnvaldsákvörðun hefur verið tekin um úthlutun félagslegs leiguhúsnæðis á grundvelli laga nr. 40/1991 er gerður leigusamningur við umsækjanda, standi vilji til þess hjá viðkomandi. Þar er um að ræða leigusamning sem húsaleigulög nr. 36/1994 gilda um. Þær ákvarðanir sem lúta að leigusamningnum sjálfum, svo sem um greiðslu húsaleigu eða hækkun hennar, eru ekki stjórnvaldsákvarðanir. Með vísan til þess er mál kæranda ekki tækt til efnismeðferðar og er kærunni því vísað frá úrskurðarnefnd velferðarmála.

 

Ú R S K U R Ð A R O R Ð

Kæru A, er vísað frá úrskurðarnefnd velferðarmála.

F.h. úrskurðarnefndar velferðarmála

Hólmfríður Birna Guðmundsdóttir