Mál nr. 820/2025-Úrskurður

 

Úrskurðarnefnd velferðarmála

Mál nr. 820/2025

Fimmtudaginn 29. janúar 2026

A

gegn

Kópavogsbæ

Ú R S K U R Ð U R

Mál þetta úrskurða Hólmfríður Birna Guðmundsdóttir lögfræðingur, Agnar Bragi Bragason lögfræðingur og Eva Dís Pálmadóttir lögfræðingur.

Með kæru, dags. 22. desember 2025, kærði A, til úrskurðarnefndar velferðarmála ákvörðun Kópavogsbæjar, dags. 27. nóvember 2025, um að synja umsókn hennar um félagslega leiguíbúð.

I.  Málsatvik og málsmeðferð

Kærandi sótti um félagslega leiguíbúð hjá Kópavogsbæ þann 3. september 2025. Umsókn kæranda var synjað með bréfi velferðarsviðs, dags. 27. nóvember 2025. Í bréfinu var kæranda bent á að hún gæti áfrýjað synjuninni til velferðarráðs Kópavogs inn fjögurra vikna frá móttöku bréfsins.

Kærandi lagði fram kæru hjá úrskurðarnefnd velferðarmála 22. desember 2025. Með erindi úrskurðarnefndar, dags. 5. janúar 2026, var óskað eftir upplýsingum frá kæranda um hvort hún hefði áfrýjað máli sínu til velferðarráðs Kópavogsbæjar. Svar barst frá kæranda samdægurs að hún hefði gert það en ekki enn fengið svar. Sama dag bárust einnig upplýsingar frá Kópavogsbæ um að áfrýjun hefði verið móttekin og að hún yrði tekin til afgreiðslu í velferðar- og mannréttindaráði 12. janúar 2026. Með erindi úrskurðarnefndar, dags. 14. janúar 2026, var óskað eftir upplýsingum frá Kópavogsbæ um hvort mál kæranda hefði verið tekið fyrir hjá ráðinu. Svar barst samdægurs þar sem fram kom að mál kæranda hefði ekki verið lagt fyrir fundinn þar sem hún hefði dregið umsókn sína til baka þann 8. janúar 2026. Tekið var fram að kærandi hefði veitt þær upplýsingar að hún hefði þegar fengið úthlutaðri íbúð frá B leigufélagi og væri því að flytja til Reykjavíkur. Í kjölfarið var kærandi innt eftir svari við því hvort um réttar upplýsingar væri að ræða og þá hvort hún vildi loka máli sínu hjá nefndinni. Í svari kæranda kom fram að hún hefði hugsað um að draga hana til baka þar sem hún hafi fengið húsnæði en svo hafi lögmaður kæranda sagt henni að gera það ekki. Kærandi vildi því halda máli sínu áfram. Kæranda var þá bent á að hafa samband við Kópavogsbæ ef hún hefði skipt um skoðun varðandi að draga umsókn sína til baka. Það ferli yrði að eiga sér stað hjá Kópavogsbæ.

II.  Niðurstaða

Kærð var ákvörðun Kópavogsbæjar, dags. 27. nóvember 2025, um að synja umsókn kæranda um félagslega leiguíbúð.

Hlutverk úrskurðarnefndar velferðarmála er að úrskurða í kærumálum vegna stjórnvaldsákvarðana eftir því sem mælt er fyrir um í lögum sem kveða á um málskot til nefndarinnar, sbr. 1. gr. laga nr. 85/2015 um úrskurðarnefnd velferðarmála. Um húsnæðismál er fjallað í XII. kafla laga nr. 40/1991 um félagsþjónustu sveitarfélaga. Í 1. málsl. 1. mgr. 6. gr. laga nr. 40/1991 um félagsþjónustu sveitarfélaga kemur fram að aðila máls hjá félagsþjónustu sveitarfélaga sé heimilt að kæra stjórnvaldsákvarðanir sem teknar eru samkvæmt lögunum til úrskurðarnefndar velferðarmála. Nefndin metur að nýju alla þætti kærumáls, getur fellt úr gildi ógildanlegar ákvarðanir í heild eða að hluta en ekki tekið nýja ákvörðun í máli fyrir hönd sveitarfélags. Í 3. mgr. 6. gr. er þó tekið fram að sveitarstjórn geti ákveðið í samþykkt um stjórn og stjórnsýslu sveitarfélagsins að áður en hægt sé að kæra stjórnvaldsákvörðun til úrskurðarnefndar velferðarmála, sbr. 1. mgr., skuli máli fyrst skotið til félagsmálanefndar eða annars tiltekins aðila innan stjórnsýslu sveitarfélaga. Nýti sveitarstjórn þessa heimild skal málsaðila leiðbeint bæði um málskot og kæruleið þegar ákvörðun í máli er kynnt honum og skal niðurstaða liggja fyrir innan 30 daga.

Í bréfi til kæranda, dags. 27. nóvember 2025, var henni bent á að heimilt væri að skjóta synjun á umsókn um félagslega leiguíbúð til velferðarráðs Kópavogs innan fjögurra vikna frá móttöku bréfsins. Fyrir liggur að velferðarráð Kópavogs hafði ekki tekið mál kæranda til meðferðar þegar hún lagði fram kæru hjá úrskurðarnefnd velferðarmála. Þá liggja fyrir upplýsingar frá Kópavogsbæ um að kærandi hafi dregið umsókn sína um félagslega leiguíbúð til baka í janúar 2026 með vísan til þess að hún hefði fengið úthlutaðri íbúð hjá leigufélagi og væri að flytja til Reykjavíkur. Að því virtu og framangreinds hlutverks úrskurðarnefndarinnar er það mat nefndarinnar að lögvarðir hagsmunir kæranda af efnislegri úrlausn málsins séu ekki lengur til staðar. Kærunni er því vísað frá úrskurðarnefnd velferðarmála.

 

 

 

Ú R S K U R Ð A R O R Ð

Kæru A, er vísað frá úrskurðarnefnd velferðarmála.

F.h. úrskurðarnefndar velferðarmála

Hólmfríður Birna Guðmundsdóttir