Mál nr. 722/2025-Beiðni um endurupptöku

Úrskurðarnefnd velferðarmála

Beiðni um endurupptöku máls nr. 722/2025

Miðvikudaginn 11. febrúar 2026

A

gegn

Tryggingastofnun ríkisins

Ú R S K U R Ð U R

Mál þetta úrskurða Rakel Þorsteinsdóttir lögfræðingur, Eva Dís Pálmadóttir lögfræðingur og Unnþór Jónsson lögfræðingur.

Með beiðni, móttekinni 30. janúar 2026, óskaði A, eftir endurupptöku úrskurðar úrskurðarnefndar velferðarmála, dags. 14. janúar 2026, þar sem staðfest var ákvörðun Tryggingastofnunar ríkisins um útreikning á greiðslum til kæranda vegna frestunar á töku ellilífeyris.

I.  Málsatvik og málsmeðferð

Kærandi hefur verið ellilífeyrisþegi frá 1. október 2010 og hefur fengið 22,5% hækkun greiðslna vegna frestunar töku ellilífeyris. Kærandi gerði með tölvupósti athugasemd við útreikning hækkunar á ellilífeyri vegna frestunar á töku ellilífeyris. Með tölvupósti Tryggingastofnunar ríkisins, dags. 13. október 2025, var kærandi upplýstur um að hann væri með 122,5% réttindi og að lífeyrissjóðstekjur og helmingur fjármagnstekna hefðu áhrif á greiðslur hans.

Kæra barst úrskurðarnefnd velferðarmála 31. október 2025. Að lokinni gagnaöflun úrskurðaði nefndin í málinu 14. janúar 2026. Með úrskurðinum var útreikningur Tryggingastofnunar á greiðslum til kæranda vegna frestunar á töku ellilífeyris staðfestur.

II.  Sjónarmið kæranda

Í beiðni kæranda um endurupptöku úrskurðarins kemur fram að niðurstaða úrskurðarnefndar velferðarmála sé ekki á rökum reist. Að blanda tryggingafræðilegum forsendum í þetta mál og segja að það séu forsendur fyrir útreikningi sé rökleysa og hafi ekkert með málið að gera. Almennar skýringar á tryggingafræðilegum forsendum gildi að sjálfsögðu fyrir almenna lífeyrissjóði og varðandi bætur öryrkja.

Að halda því fram að það sé í lögum að ellilífeyrir sé hækkaður eftir að búið sé að gera ráð fyrir öllum skerðingum vegna tekna, standist ekki skoðun og sé rökleysa. Ef það eigi að hækka útreiknaðar bætur eigi að reikna það á bæturnar en ekki einhverja aðra tilbúna tölu.

Sé dæminu snúið við á þá leið að kærandi hafi flýtt töku ellilífeyris um 45 mánuði og að það væri reiknað með sama hætti og dregið hafi verið frá 22% þá sé frádrátturinn 12% minni en ef hann sé reiknaður fyrir skerðingar. Þetta segi að þessi aðferð Tryggingstofnunar að reikna álag eftir skerðingar sé órökrétt og alröng.

III.  Niðurstaða

Óskað er eftir endurupptöku á úrskurði úrskurðarnefndar velferðarmála, dags. 14. janúar 2026. Með úrskurðinum var staðfestur útreikningur greiðslna ellilífeyris vegna frestunar á töku ellilífeyris.

Samkvæmt 1. mgr. 24. gr. stjórnsýslulaga nr. 37/1993 á aðili máls rétt á því að mál sé tekið til meðferðar á ný ef ákvörðun stjórnvalds hefur byggst á ófullnægjandi eða röngum upplýsingum um málsatvik, sbr. 1. tölul., eða íþyngjandi ákvörðun um boð eða bann hefur byggst á atvikum sem breyst hafa verulega frá því að ákvörðun var tekin, sbr. 2. tölul.

Aðili máls getur einnig átt rétt á endurupptöku máls á grundvelli annarra ólögfestra reglna stjórnsýsluréttar, til að mynda ef ákvörðun stjórnvalds hefur byggst á röngu mati stjórnvalds.

Í beiðni um endurupptöku kemur meðal annars fram að það sé rökleysa að blanda tryggingafræðilegum forsendum í málið. Auk þess segi að það standist ekki skoðun að halda því fram að það sé í lögum að ellilífeyrir sé hækkaður eftir að búið sé að gera ráð fyrir öllum skerðingum vegna tekna.

Að mati úrskurðarnefndar velferðarmála verður ekki ráðið af gögnum málsins að niðurstaða nefndarinnar hafi byggst á ófullnægjandi eða röngum upplýsingum um málsatvik, sbr. 1. mgr. 24. gr. laga nr. 37/1993. Þá verður ekki séð að kærandi eigi rétt á endurupptöku málsins á grundvelli ólögfestra reglna stjórnsýsluréttar. Að mati úrskurðarnefndar kemur ekkert fram í beiðni um endurupptöku sem gefur til kynna að úrskurðurinn hafi byggst á röngu mati eða verið háður verulegum annmörkum sem haft hafi áhrif á niðurstöðu hans.

Með hliðsjón af framangreindu er beiðni kæranda um endurupptöku máls úrskurðarnefndar velferðarmála nr. 722/2025 synjað.

Ú R S K U R Ð A R O R Ð

Beiðni A, um endurupptöku máls nr. 722/2025, hjá úrskurðarnefnd velferðarmála, er synjað.

F.h. úrskurðarnefndar velferðarmála

Rakel Þorsteinsdóttir