Mál nr. 33/2025. Ákvörðun kærunefndar útboðsmála, aðgangur að gögnum.

Ákvörðun kærunefndar útboðsmála 8. maí 2026
í máli nr. 33/2025:
Gulur bíll ehf.
gegn
Landspítalanum

Lykilorð
Aðgangur að gögnum.

Útdráttur
Í ákvörðun kærunefndar útboðsmála var fallist á að G ætti rétt til aðgangs að tilteknum hluta skjals sem varnaraðili hafði lagt fram við meðferð málsins en kröfu um aðgang að öðrum hlutum skjalsins var hafnað með vísan til 17. gr. stjórnsýslulaga nr. 37/1993.

Með kæru móttekinni hjá kærunefnd útboðsmála 11. júlí 2025 kærði Gulur bíll ehf. (hér eftir „kærandi“) ákvörðun Landspítala (hér eftir „varnaraðili“) um niðurfellingu útboðs nr. 35029 auðkennt „Parking solutions for Landspítali“.

Varnaraðili lagði fram viðbótargreinargerð 1. apríl 2026. Á meðal fylgiskjala með greinargerðinni var fylgiskjal 1 sem er auðkennt með rafræna skráaheitinu „Fylgiskjal 1_Kostnaðar- og tekjulíkan á rekstri bílastæða á Hringbraut 2025.xlsx“.

Með tölvupósti 7. apríl 2026 upplýsti kærunefnd útboðsmála varnaraðila að nefndin hygðist gefa kæranda kost á að tjá sig um viðbótargreinargerðina og óskaði eftir upplýsingum hvort varnaraðili óskaði þess að gætt yrði trúnaðar um fylgigögn greinargerðarinnar.

Varnaraðili svaraði erindinu 15. sama mánaðar og óskaði eftir að framangreint fylgiskjal yrði ekki afhent kæranda. Um væri að ræða vinnuskjal varnaraðila sem innihéldi viðskiptaupplýsingar um ýmis atriði, þar með talið upplýsingar um ítarlega útreikninga og verð. Ef upplýsingarnar yrðu afhentar og þannig gerðar opinberar gæti það raskað samkeppni á markaði og jafnvel veitt aðilum óeðlilegt forskot í framtíðarútboðum varnaraðila. Afhending gæti þannig enn fremur verið andstæð hagsmunum varnaraðila.

Kærandi sendi tölvupóst til nefndarinnar 22. apríl 2026 og óskaði eftir aðgang að skjalinu á grundvelli 15. gr. stjórnsýslulaga nr. 37/1993, sbr. 7. mgr. 108. gr. laga nr. 120/2016 um opinber innkaup.

Í ákvörðun þessari verður leyst úr kröfu kæranda um aðgang að umræddu skjali en málið bíður að öðru leyti efnislegrar úrlausnar.

Niðurstaða

Umbeðið skjal telst til málsgagna í því stjórnsýslumáli sem rekið er fyrir kærunefnd útboðsmála á milli kæranda og varnaraðila. Um meðferð kærumála fyrir nefndinni gilda stjórnsýslulög nr. 37/1993, sbr. 7. mgr. 108. gr. laga nr. 120/2016 um opinber innkaup. Ber því við úrlausn um aðgang að gögnunum að fara eftir ákvæðum stjórnsýslulaga sem ganga framar ákvæðum upplýsingalaga nr. 140/2012, sbr. 2. mgr. 4. gr. síðarnefndu laganna.

Samkvæmt 15. gr. stjórnsýslulaga á aðili máls rétt á aðgangi að skjölum og öðrum gögnum er mál varða. Hefur óheftur aðgangur að gögnum máls verið talinn nauðsynlegur til að tryggja að réttur aðila til að koma að skýringum og leiðrétta fyrirliggjandi gögn nýtist að fullu. Gerðar eru undantekningar frá þessari grunnreglu í 16. og 17. gr. laganna.

Í 3. tölul. 1. mgr. 16. gr. kemur meðal annars fram að réttur aðila til aðgangs að gögnum nái ekki til vinnuskjala sem stjórnvald hefur ritað til eigin afnota. Þó eigi aðili aðgang að vinnuskjölum ef þau hafa að geyma endanlega ákvörðun um afgreiðslu máls eða upplýsingar sem ekki verður aflað annars staðar frá. Samkvæmt 17. gr. laganna er stjórnvaldi, þegar sérstaklega stendur á, heimilt að takmarka aðgang aðila máls að gögnum ef hagsmunir hans af því að notfæra sér vitneskju úr þeim þykja eiga að víkja fyrir mun ríkari almanna- eða einkahagsmunum.

Við mat á framangreindum skilyrðum verður meðal annars að horfa til þess að ákvæði 16. og 17. gr. stjórnsýslulaga eru undantekningar frá þeirri meginreglu að málsaðili eigi rétt á því að kynna sér málsgögn auk þess sem líta ber til þeirra hagsmuna sem reglum um opinber innkaup er ætlað að þjóna, þ. á m. hvort afhending upplýsinga getur raskað jafnræði fyrirtækja við opinber innkaup.

Umbeðið skjal er excel-skjal sem skiptist í fjóra flipa: (1) „Fjöldi bílastæða“, (2) „Raunkostnaður viðhalds“, (3) „Nýtt kostnaðar- og tekjumódel“ og (4) „Verðskrár“. Að mati kærunefndar útboðsmála verður ekki séð að unnt væri að afla þeirra upplýsinga sem koma fram í skjalinu annars staðar frá og í öllu falli ekki með þeim samantekna hætti sem á við um umbeðið skjal. Verður því ekki fallist á að 3. tölul. 1. mgr. 16. gr. stjórnsýslulaga standi í vegi fyrir afhendingu skjalsins óháð því hvort það teljist vinnuskjal í skilningi ákvæðisins.

Þær upplýsingar sem koma fram í flipanum „Verðskrá“ og „Raunkostnaður viðhalds“ eru meðal annars verðupplýsingar frá tilteknum fyrirtækjum varðandi malbiksframkvæmdir og umferðarmerkingar og rauntölur um viðhaldskostnað vegna bílastæða sem samkvæmt skjalinu miðast meðal annars við „rauntölur og verðskrá verktaka 2024-2025“. Að mati kærunefndar útboðsmála verður að telja að þessar upplýsingar hafi takmarkaða tengingu við kæruefni málsins auk þess sem þar koma meðal annars fram upplýsingar um nýleg einingarverð fyrirtækja sem sinna þjónustu fyrir varnaraðila. Verður því að telja að hagsmunir kæranda af því að notfæra sér þessar upplýsingar skuli víkja fyrir mun ríkari einkahagsmunum, sbr. 17. gr. stjórnsýslulaga. Verður kæranda því ekki veittur aðgangur að þessum hlutum skjalsins.

Í flipanum „Nýtt kostnaðar- og tekjumódel“ koma fram þrjú kostnaðar- og tekjumódel, merkt A til C, og er þar að finna ýmsar upplýsingar um mismunandi kostnaðar- og tekjuliði auk upplýsinga um forsendur sem liggja að baki framsetningu þessara liða. Í efnislega hluta þessa máls er deilt um ákvörðun varnaraðila að fella niður útboð varðandi þjónustu við bílastæðastýringu með myndavélaeftirliti. Af málatilbúnaði varnaraðila verður ráðið að til standi að fara í annað útboð vegna umræddrar þjónustu. Eftir yfirferð á framangreindum upplýsingum telur kærunefnd útboðsmála að þær geti gefið innsýn í forsendur varðandi verðlagningu þjónustunnar. Verður því að telja að afhending þessara upplýsinga til kæranda geti raskað samkeppnishagsmunum í hugsanlegu framtíðarútboði enda hefði kærandi þá aðrar og meiri upplýsingar en eru aðgengilegar öðrum aðilum á markaðinum. Að þessu gættu og að virtu eðli upplýsinganna í samhengi við kæruefni málsins er það mat nefndarinnar að hagsmunir kæranda af því að notfæra sér þessar upplýsingar skuli víkja fyrir mun ríkari almannahagsmunum, sbr. 17. gr. stjórnsýslulaga. Verður kæranda því ekki veittur aðgangur að þessum hluta skjalsins.

Að endingu er í skjalinu að finna upplýsingar um heildarfjölda bílastæða við Landspítala. Umræddar upplýsingar tengjast kæruefni málsins með beinum hætti enda er meðal annars á því byggt af hálfu varnaraðila að breyttar forsendur varðandi fjölda bílastæða hafi haft áhrif á grundvöll útboðsins. Samkvæmt þessu og að teknu tilliti til eðlis umræddra upplýsingar er það mat nefndarinnar að ekki séu uppfyllt skilyrði til að takmarka aðgang kæranda að þessum hluta skjalsins á grundvelli 17. gr. stjórnsýslulaga.

Samkvæmt öllu framangreindu verður kæranda veittur aðgangur að hluta umbeðins skjals en kröfu hans að öðru leyti hafnað, sbr. nánar það sem greinir í ákvörðunarorði.

Ákvörðunarorð:

Kæranda, Gulum bíl ehf., er veittur aðgangur að upplýsingum sem er að finna í flipanum „Fjöldi bílastæða“ í fylgiskjali 1 með viðbótargreinargerð varnaraðila, Landspítala, dags. 1. apríl 2026.

Að öðru leyti er kröfu kæranda hafnað.

Reykjavík, 8. maí 2026.

Reimar Pétursson

Kristín Haraldsdóttir

Auður Finnbogadóttir