27 febrúar 2026
/
1340/2026. Úrskurður frá 27. febrúar 2026
Hinn 27. febrúar 2026 kvað úrskurðarnefnd um upplýsingamál upp svohljóðandi úrskurð nr. 1340/2026 í máli ÚNU 26020012.
Kæra og málsatvik
Með erindi, dags. 24. febrúar 2026, kærði […] afgreiðslutöf Samgöngustofu vegna fyrirspurnar hans til stofnunarinnar, dags. 30. desember 2025.
Með fyrirspurn sinni óskaði kærandi eftir lista yfir alla umsækjendur um starf sérfræðings hjá […] Samgöngustofu þar sem hann var meðal umsækjenda. Auk þess óskaði hann eftir öllum upplýsingum varðandi stigagjöf þeirra tíu umsækjenda sem boðaðir voru í viðtal og gögnum sem staðfestu hvort leitað hefði verið eftir vitnisburði umsagnaraðila kæranda í ráðningarferlinu.
Í kæru kemur fram að kærandi telji að annar umsækjandi hafi verið valinn umfram hann, þrátt fyrir að sá sem valinn hafi verið uppfylli hæfniviðmið síður en kærandi. Óþarft er að rekja nánar það sem fram kemur í gögnum málsins, sbr. 31. gr. stjórnsýslulaga, nr. 37/1993. Úrskurðarnefndin hefur haft hliðsjón af öllum gögnum málsins við úrlausn þess.
Niðurstaða
Í máli þessu er deilt um afgreiðslutöf Samgöngustofu vegna erindis kæranda þar sem hann óskaði eftir gögnum sem varpa ljósi á ákvörðun Samgöngustofu að ráða annan aðila en kæranda í starf sérfræðings hjá Samgöngustofu.
Samkvæmt 2. mgr. 4. gr. upplýsingalaga gilda lögin ekki um aðgang að upplýsingum samkvæmt stjórnsýslulögum, nr. 37/1993. Stjórnsýslulög gilda þegar teknar eru ákvarðanir um rétt eða skyldu manna, sbr. 2. mgr. 1. gr. laganna. Um rétt til aðgangs að gögnum í slíkum málum fer samkvæmt ákvæðum 15.–19. gr. stjórnsýslulaga, en í 1. mgr. 15. gr. kemur fram að aðili máls eigi rétt á aðgangi að skjölum og öðrum gögnum er mál varða. Aðgangur að gögnum um aðila sjálfan getur því byggst hvort sem er á upplýsingalögum eða stjórnsýslulögum. Það hvor lögin eigi við ræðst af því hvort gögnin tilheyri stjórnsýslumáli þar sem tekin er ákvörðun um rétt eða skyldu.
Í athugasemdum við 1. gr. með frumvarpinu sem varð að stjórnsýslulögum, nr. 37/1993, kemur fram að ákvarðanir um skipun, setningu og ráðningu opinberra starfsmanna, svo og lausn þeirra frá störfum, teljist til stjórnvaldsákvarðana. Þegar stjórnvald tekur ákvörðun um að ráða eða ráða ekki tiltekinn umsækjanda um opinbert starf felur það í sér einhliða ákvörðun um réttindi og skyldur viðkomandi umsækjanda. Slík ákvörðun telst því stjórnvaldsákvörðun í skilningi stjórnsýslulaga.
Þau gögn sem kærandi óskar eftir eru gögn sem innihalda forsendur fyrir ákvörðun um ráðningu opinbers starfsmanns í ráðningarferli þar sem kærandi var umsækjandi. Úrskurðarnefndinni þykir ljóst að umbeðin gögn tilheyri því stjórnsýslumáli sem kærandi var aðili að og varðar ráðningu í starf sérfræðings hjá […] Samgöngustofu.
Samkvæmt 2. mgr. 4. gr. upplýsingalaga gilda lögin ekki um aðgang að upplýsingum samkvæmt stjórnsýslulögum. Af þessu leiðir að ákvarðanir um aðgang að gögnum í slíkum tilvikum verða ekki bornar undir úrskurðarnefnd um upplýsingamál heldur ber að beita sérstakri kæruheimild í 2. mgr. 19. gr. stjórnsýslulaga. Í máli þessu byggir kærandi kæruheimild sína á 3. mgr. 17. gr. upplýsingalaga um afgreiðslutafir. Þar sem kærandi óskar eftir gögnum í stjórnsýslumáli á fyrrnefnd kæruheimild í upplýsingalögum ekki við heldur ber að beita kæruheimild 4. mgr. 9. gr. stjórnsýslulaga. Samkvæmt framangreindu falla gögn sem kæra í málinu varðar utan gildissviðs upplýsingalaga. Verður kærunni því vísað frá úrskurðarnefndinni.
Úrskurðarorð
Kæru […], dags. 24 febrúar 2026, er vísað frá úrskurðarnefnd um upplýsingamál.
Trausti Fannar Valsson, formaður
Hafsteinn Þór Hauksson
Sigríður Árnadóttir