60 ný hjúkrunarrými bætast við á Akranesi – rýmum í bænum fjölgar um 80%

Hjúkrunarrýmum á Akranesi fjölgar um 80% þegar nýtt hjúkrunarheimili á Sólmundarhöfða á Skaganum verður tekið í notkun. Samkomulag var í dag undirritað um stækkun hjúkrunar- og dvalarheimilisins Höfða en þar búa í dag 75 manns, þar af tveir í skammtímarýmum. Með tilkomu nýrrar byggingar á Sólmundarhöfðanum bætast 60 hjúkrunarrými við.

Akraneskaupstaður leggur til lóðina og auglýst verður eftir aðila til að hanna og byggja nýja heimilið. Ríkið leigir húsið síðan með leigusamningi til 20-30 ára. Gert er ráð fyrir að verklegar framkvæmdir við heimilið hefjist á næsta ári.

Fjölgun hjúkrunarheimila á Akranesi er hluti af framkvæmdaáætlun um uppbyggingu hjúkrunarheimila fyrir árin 2026-2030 en samkvæmt henni er ætlunin að taka ríflega 1.500 hjúkrunarrými í notkun fram til ársins 2030. Að framkvæmdum loknum á Akranesi verða alls 135 íbúar á hjúkrunar- og dvalarheimilinu Höfða.

Mikilvægt skref við að bæta þjónustu við eldra fólk á Vesturlandi

„Við höfum sett málefni eldra fólks í forgang og látum verkin tala. Framkvæmdir eru hafnar eða í undirbúningi vítt og breitt um landið og stækkunin á Höfða er enn einn áfanginn í þeirri uppbyggingu. Þessi mikla viðbót á Akranesi er stórt og mikilvægt skref fyrir Skagamenn og fyrir allt Vesturland. Með 60 nýjum hjúkrunarrýmum getum við betur mætt þörfum eldra fólks á svæðinu og veitt fleiri fjölskyldum það öryggi og þá þjónustu sem þær eiga rétt á,“ segir Inga Sæland, mennta- og barnamálaráðherra, sem einnig fer fyrir uppbyggingu hjúkrunarheimila.

„Akraneskaupstaðar fagnar því að þessi mikilvægi áfangi sé í höfn, enda þörfin brýn og biðlistinn langur. Akraneskaupstaður fyrir sitt leyti leggur áherslu á að áætlun um uppbyggingu gangi eftir þannig að framkvæmdir geti hafist á árinu 2027 og að taka megi heimilið í notkun á árinu 2028 eða fyrri hluta árs 2029,“ segir Steinar Adolfsson, sem er starfandi bæjarstjóri Akraneskaupstaðar.

„Sveitarfélögin Hvalfjarðarsveit og Akraneskaupstaður hafa lengi unnið að stækkun á hjúkrunarheimilinu Höfða, enda rík þörf fyrir stærra heimili og biðlistar stöðugt að lengjast. Áfanginn í dag er því langþráður og við væntum þess að stækkun gangi vel fyrir sig. Það er mikilvægt og afar brýnt. Stækkun um 60 rými er stór áfangi. Þetta er því afar ánægjulegur dagur,“ segir Haraldur Benediktsson, oddviti sveitarstjórnar í Hvalfjarðarsveit.

Valdís Eyjólfsdóttir, framkvæmdastjóri Höfða, fagnar sömuleiðis samkomulaginu. „Höfði hefur verið einn af hornsteinum samfélagsins á Akranesi frá árinu 1978. Heimilið hefur notið trausts og góðs orðspors í gegnum tíðina, ekki síst vegna starfsfólksins sem hefur í gegnum árin lagt metnað og alúð í að veita íbúum góða og faglega umönnun. Því er það mikið gleðiefni að nú eigi að ráðast í þessa verulegu stækkun sem mun stytta bið eftir hjúkrunarrýmum á Höfða og gera heimilinu kleift að mæta vaxandi þörf í samfélaginu.“

Fjölmargir áfangar víðs vegar um landið

Í stefnuyfirlýsingu ríkisstjórnarinnar er áhersla lögð á málefni eldra fólks, þar á meðal fjölgun hjúkrunarrýma.

• Þann 19. mars 2025 var tilkynnt að samkomulag væri í höfn milli ríkis og sveitarfélaga um ábyrgðarskiptingu á uppbyggingu hjúkrunarheimila.
• Í byrjun maí 2025 var fyrsta skóflustungan tekin að nýju hjúkrunarheimili í Ási í Hveragerði.
• Nokkrum dögum síðar mundaði þáverandi félags- og húsnæðismálaráðherra sleggju við Nauthólsveg í Reykjavík en þar verður ráðist í gagngerar endurbætur á húsnæði sem breytt verður í hjúkrunarheimili.
• Undir lok maímánaðar 2025 var ráðherra á Akureyri vegna samkomulags um nýtt hjúkrunarheimili í Þursaholti.
• Sama dag fór ráðherra á Húsavík en þar hefur kyrrstaða nú verið rofin um hjúkrunarheimili sem beðið hefur verið eftir svo árum skiptir.
• Þann 16. júní 2025 var samkomulagið sem náðist milli ríkis og sveitarfélaga í mars fest í lög.
• Þann 1. júlí var nýtt samkomulag undirritað um þreföldun hjúkrunarrýma í Mosfellsbæ.
• Þremur dögum síðar var skóflustunga tekin að stækkun hjúkrunarheimilisins í Sóltúni í Reykjavík.
• Nýtt hjúkrunarheimili í Boðaþingi í Kópavogi var opnað þann 2. september að viðstöddum ráðherrum, bæjarstjóra og fleirum.
• Þann 8. janúar 2026 var viljayfirlýsing undirrituð um uppbyggingu nýs hjúkrunarheimilis í Hafnarfirði.
• Nýtt hjúkrunarheimili var opnað við Nesvelli í Reykjanesbæ þann 15. janúar að viðstöddum ráðherrum, bæjarstjóra og fleirum.
• Í mars síðastliðinn var hjúkrunarheimili opnað í Urðarhvarfi í Kópavogi með 100 rýmum sem notuð eru sem skammtímahjúkrunarrými.
• Þann 4. maí var samkomulag undirritað um nýbyggingu sem mun hýsa nýtt hjúkrunarheimili og heilsugæslustöð í Vík í Mýrdal. 
• Um miðjan júní var tilkynnt að tilboð Reita hafi verið valið hagstæðast af Framkvæmdasýslunni-Ríkiseignum vegna uppbyggingar hjúkrunarheimilis fyrir 140 íbúa á Akureyri.
• Í síðustu viku var tilkynnt að nýtt hjúkrunarheimili með 90 rýmum verði opnað við Keilisbraut í Reykjanesbæ.
• Á næstunni verða 45 skammtímahjúkrunarrými tekin í notkun á Vífilsstöðum í Garðabæ að loknum endurbótum á húsnæðinu. Þá mun Hlévangur í Reykjanesbæ opna aftur í haust með 24 skammtímahjúkrunarrýmum.

  

Inga Sæland og Valdís Eyjólfsdóttir, forstöðumaður Höfða.