Starfshópur metur nálgun stjórnvalda í málefnum gervigreindar

Starfshópur um nálgun stjórnvalda í málefnum gervigreindar hefur tekið til starfa en hann er skipaður að tillögu forsætisráðherra og menningar-, nýsköpunar- og háskólaráðherra. Hlutverk hópsins er að meta stefnu, aðgerðir og áherslur stjórnvalda í málaflokknum heildstætt í ljósi hraðrar þróunar gervigreindar og gera tillögur um aðgerðir, forgangsröðun og úrbætur.

Hópurinn mun einnig veita ráðgjöf um hvernig stjórnvöld geta stutt við öfluga uppbyggingu og innleiðingu gervigreindar á Íslandi og móta tillögur að samstarfi hins opinbera og atvinnulífsins um hagnýtingu gervigreindar.

Starfshópurinn er skipaður sérfræðingum utan Stjórnarráðsins sem hafa þekkingu á gervigreindarmálum. Í starfshópnum sitja:

• Hjálmar Gíslason, framkvæmdastjóri GRID, formaður
• Anna Tumadóttir, framkvæmdastjóri Creative Commons
• Ari Kristinn Jónsson, framkvæmdastjóri nýsköpunarsjóðs Atlantshafsbandalagsins
• Halldór Fannar Guðjónsson, tæknistjóri, NVIDIA
• Lilja Dögg Jónsdóttir, framkvæmdastjóri Almannaróms

Með hópnum starfa fulltrúar úr forsætisráðuneyti og menningar-, nýsköpunar- og háskólaráðuneyti. Hópurinn mun skila tillögum sínum fyrir lok september nk.

Skipun starfshópsins byggir á grunni sem lagður er í stefnu Íslands um gervigreind og aðgerðaáætlun stjórnvalda um gervigreind. Þar er lögð áhersla á að móta sterkan grundvöll fyrir þróun og farsæla nýtingu gervigreindar á Íslandi.