Ávarp á netöryggisráðstefnu Eyvarar

Ágætu fundargestir og samstarfsaðilar. 

Það er mjög ánægjulegt að fá að ávarpa ykkur hér í dag á þessum mikilvæga viðburði sem snýr að netöryggi – einu af grundvallarmálum samtímans.

Ég vil færa skipuleggjendum fundarins, samstarfsaðilum Eyvarar og öllum sem hér eru saman komin, mínar bestu þakkir. 

Slíkir fundir eru ekki aðeins vettvangur þar sem við miðlum upplýsingum og nýrri þekking –þeir eru einnig merki um að við sem samfélag, erum reiðubúin að leggjast á eitt, í baráttunni fyrir öruggu stafrænu umhverfi.

Heimurinn stendur frammi fyrir hraðri stafvæðingu. Það hefur gefið okkur áður óþekkt tækifæri, en á sama tíma skapað nýjar og flóknari ógnir.

Við vitum öll að stafrænir innviðir eru nú orðnir jafn mikilvægir fyrir þjóðina og samgöngu- og orkuinnviðir. Þeir styðja við daglegt líf okkar, efnahag og lýðræðislegt samfélag.

Þegar þessir innviðir verða fyrir truflunum eða árásum getur það haft afdrifarík áhrif.

Það sem áður var talið tæknilegt sérsvið sérfræðinga er nú viðfangsefni allra – stjórnvalda, fyrirtækja, háskóla og almennings.

Á hverjum degi sjáum við nýjar ógnir í stafrænu umhverfi. Allt frá árásum með það að markmiði að stöðva rekstur fyrirtækja og tilrauna til að grafa undan lýðræðinu með upplýsingaóreiðu.

Þessar áskoranir snerta okkur öll.

Við höfum séð dæmi annars staðar í heiminum þar sem netárásir hafa lamað heilbrigðiskerfi, orkuinnviði og jafnvel haft áhrif á kosningar. Það er því skylda okkar að tryggja eins og kostur er, að Ísland sé búið undir þessar áskoranir.

Sem lítið, opið og tengt samfélag er Ísland sérstaklega viðkvæmt.

Við erum hins vegar lipur þjóð sem getur brugðist hratt við, nýtt mannauð sinn og skapað nýjar lausnir. Stjórnvöld á Íslandi horfa til þess að landið verði í fremstu röð þegar kemur að öflugum varnarviðbúnaði og viðnámsþrótti í stafrænum heimi.

Þetta er ekki markmið sem við náum í einni svipan. Það krefst markvissrar stefnumótunar, fjárfestinga og alþjóðlegrar samvinnu.

Við viljum byggja samfélag sem er ekki aðeins öruggt heldur einnig framsækið og skapandi. Við viljum vera þjóð sem leggur fram lausnir sem nýtast öðrum þjóðum.

Til þess þurfum við að fjárfesta í nýsköpun og menntun. Til að tryggja að næsta kynslóð sérfræðinga hafi þá þekkingu sem þarf— og að við nýtum tæknina með ábyrgum hætti.

Þetta felur einnig í sér að Ísland taki virkan þátt í alþjóðlegu samstarfi og sé hluti af sameiginlegum vörnum Evrópu.

Með þessu leggjum við okkar af mörkum til öryggis álfunnar í heild.

Ríkisstjórnin getur sett stefnu, veitt fjármagn og skapað lagaramma. En án samstarfs við atvinnulíf, fræðasamfélag og alþjóðlega aðila verður árangurinn lítill.

Við getum litið til dæma frá öðrum Norðurlöndum og Evrópu þar sem samvinna hefur skilað árangri.

Þegar þekking fræðasamfélagsins, nýsköpun atvinnulífsins og stefnumótun stjórnvalda koma saman – þá skapast öflugur grunnur að netöryggismenningu, sem nær til alls samfélagsins.

Einstaklingar, fyrirtæki og stofnanir þurfa að tileinka sér öryggismenningu. Við þurfum að breyta vinnubrögðum og tryggja að netöryggi sé hluti af daglegu lífi.

Þegar við horfum til framtíðar er ljóst að áskorunum fer ekki fækkandi. Ný tækni eins og gervigreind, skýjalausnir og skammtatölvur opna ótal möguleika, en skapa jafnframt nýjar hættur.

Sem ráðherra netöryggismála legg ég áherslu á að þessi málaflokkur verði áfram í forgangi.

Eyvör stendur á tímamótum þótt ung sé en tveggja ára reynsla er komin á samstarfið og samningur um næstu tvö ár liggur fyrir.

Fjarskiptastofa hefur tekið verkefnið föstum tökum á síðustu mánuðum sem nýr leiðandi aðili í samstarfinu og ljóst er að netöryggisstyrkir Eyvarar hafa þegar sannað gildi sitt.

Ég trúi því að með sameiginlegu átaki getum við tryggt, að Ísland verði fyrirmynd í netöryggismálum í allri Evrópu. Gegnir Eyvör og ykkar framlag þar mikilvægu hlutverki. 

Ég þakka ykkur öllum fyrir og hlakka til að fylgjast með því hvernig ykkar hugmyndir, nýsköpun og samstarf munu skila árangri.