Loftslagsstefna Stjórnarráðsins

Loftslagsstefna Stjórnarráðsins er ein af aðgerðunum í aðgerðaáætlun ríkisstjórnarinnar í loftslagsmálum og var samþykkt á ríkisstjórnarfundi 9. apríl 2019. Stefnan tekur til allra ráðuneyta Stjórnarráðsins og Rekstrarfélags Stjórnarráðsins auk þess sem gerðar eru kröfur til ríkisstofnana um aðgerðir í loftslagsmálum.

Markmiðið með loftslagsstefnunni er að Stjórnarráðið verði til fyrirmyndar í loftslagsmálum og bindi meiri koltvísýring en það losar. Dregið verður úr losun gróðurhúsalofttegunda í allri starfsemi Stjórnarráðsins auk þess sem öll losun verður kolefnisjöfnuð við árslok 2019 og meira til. Stjórnarráðið mun jafnframt draga úr losun sinni á CO2 samtals um 40% til ársins 2030 með því að leggja sérstaka áherslu á eftirfarandi þætti í starfsemi ráðuneyta:

• flugferðir erlendis og innanlands með áherslu á fjarfundi og breytt vinnulag.
• ferðir starfsmanna til og frá vinnu með vistvænum samgöngum.
• akstur á vegum ráðuneyta - með endurnýjun eigin bifreiða og kröfum til bílaleiga og leigubíla um bifreiðar án jarðefnaeldsneytis.
• úrgang - með minni sóun og aukinni flokkun.
• orkunotkun - með orkusparnaðaraðgerðum.
• máltíðir í mötuneytum.

Loftslagsstefnan gildir til ársins 2030 og er ekki einungis ætlað að hafa bein áhrif á þá starfsemi sem undir hana fellur heldur einnig margfeldisáhrif. Loftslagsstefnu Stjórnarráðsins fylgir aðgerðaáætlun fyrir árin 2019-2021 en við vinnslu stefnunnar gripu ráðuneytin strax til fjölbreyttra aðgerða.

Hægt er að koma ábendingum eða fyrirspurnum um loftslagsstefnuna til umhverfis-, orku- og loftslagsráðuneytisins á [email protected].