Þátttakendur í Umhverfisþingi 2025

Thomas Halliday

Fornlífræðingur, steingervingafræðingur og höfundur bókarinnar Otherlands, sem hefur í rannsóknum sínum beint athyglinni að því hvernig jörðin hefur náð sér eftir síðustu fjöldadauða.

Halliday flytur erindið Hope and the Great Dying.

Loftslagbreytingarnar sem við stöndum frammi fyrir í dag eru ekki þær einu sem jörðin hefur staðið frammi fyrir. Atburðir fyrri tíma hafa margir hverjir haft skelfilegar afleiðingar fyrir þær lífverur sem þá byggðu jörðina. Miklar loftslagsbreytingar fyrir 250 milljónum ára urðu til að mynda þess valdandi 95% tegunda þurrkuðust út, í því sem telst versti fjöldadauði sögunnar.

Það kann að vera freistandi að nota þessa atburði fortíðar til að spá fyrir um fyrirsjáanlegar hörmungar í náinni framtíð, en að hve miklu leyti er það rétt? Hvað getum við lært af fortíðinni til að bjarga framtíðinni?

Dr. Chris McOwen

Sjávarlíffræðingur og helsti hafvísindamaður Umhverfisstofnunar Sameinuðu þjóðanna (UNEP-WCMC). Fræðilegur bakgrunnur McOwen snýr að vistfræði hafsins, en hann er sérfræðingur í stefnumótun og stjórnun hafsins og hefur yfir 15 ára reynslu af haftengdum verkefnum tengdum stefnumótun, nærsamfélögum og fræðslu. McOwen stýrir alþjóðlegum verkefnum hjá UNEP-WCMC um stjórnun hafsins og líffræðilegan fjölbreytileika, sem hafa stutt ríkisstjórnir, svæðisbundnar stofnanir og fjölþjóðlega umhverfissamninga við að raungera aðgerðir byggðar á gögnum um hafmál.

Dr. Sian Prior

Sjávarlíffræðingur. Prior er einn helsti ráðgjafi Clean Arctic Alliance (Seas At Risk), bandalags sjálfseignarstofnana sem starfa á norðurslóðum og berjast fyrir verndun norðurslóða gegn áhrifum skipaflutninga. Clean Arctic Alliance var stofnað fyrir tæpum áratug og leggur áherslu á að draga úr losun sóts (e. black carbon) og gróðurhúsalofttegunda frá skipaflutningum á norðurslóðum, losun skólps í hafið og hávaðamengunar neðansjávar. Prior hefur starfað fyrir og veitt ráðgjöf til fjölda umhverfisverndar- og hafverndarhópa, en hún sérhæfir sig í að túlka hafvísindi svo þau styðji við stefnumótun og málsvörn um verndun og stjórnun hafsins. Prior hefur sl. 30 ár komið að uppbyggingu fjölda svæðisbundinna sem og alþjóðlegra stjórnunar og verndarverkefna, m.a. á vegum Alþjóðasiglingamálastofnunarinnar, Norðurskautsráðsins og Suðurskautssáttmálans.

Rui Martins

Héraðsstjóri hafmála á Azoreyjum (Regional Director for Ocean Affairs). Martins er forstöðumaður stærsta sjávargarðs (e. marine park) í Norður-Atlantshafi og hefur frá árinu 2024 gegnt stöðu svæðisstjóra fyrir hafmál á Azoreyjum. Hann hefur mikla reynslu af opinberri þjónustu og sat á löggjafarþingi Azoreyja í tvö kjörtímabil þar sem hann átti sæti í nefndum um umhverfismál, efnahagsmál, félagsmál og eftirlit með evrópskum sjóðum. Martins hefur einnig reynslu af stjórnun í heilbrigðisþjónustu og gæðaendurskoðun og er virkur þátttakandi í nærsamfélaginu með því að leiða starf stofnana félagslegrar samstöðu og þéttbýlisþróunar.

Samantha Robb

Lögfræðingur í hafréttardeild Ocean Vision Legal. Robb er með bakgrunn í alþjóðarétti, alþjóðlegum hafrétti og mannréttindarétti og hefur sérhæft sig í almannahagsmunum. Hjá Ocean Vision Legal leggur hún áherslu á þróun, styrkingu og að framfylgja lögum og skuldbindingum um verndun umhverfis sjávar, með sérstaka áherslu á námuvinnslu á djúpsjávarbotni, botnvörpuveiðar og tilnefningar verndarsvæða í hafinu.

Dr. Guðbjörg Ásta Ólafsdóttir

Forstöðumaður Rannsóknaseturs Háskóla Íslands á Vestfjörðum. Rannsóknir Guðbjargar Ástu beinast helst að því hvernig álag vegna umhverfisbreytinga og nýtingar móta vistfræði og fjölbreytni sjávarfiska. Hún leiðir fjölmörg rannsóknaverkefni á sviði fiskavistfræði, verndar og nýtingar og vinnur að því að tengja vísindi við stefnumótun og sjálfbæra stjórn hafsvæða Íslands.

Hrefna Karlsdóttir

Sérfræðingur hjá Samtökum fyrirtækja í sjávarútvegi, í fiskveiðistjórn og samningum við erlend ríki.

Dr. Snjólaug Árnadóttir

Dósent við lagadeild Háskólans í Reykjavík og forstöðumaður Sjálfbærni- og loftslagsréttarstofnunar. Helstu sérsvið hennar eru þjóðaréttur, hafréttur og alþjóðlegur umhverfisréttur og snúa rannsóknir hennar öðru fremur að áhrifum loftslagsbreytinga á þróun þessara réttarsviða. Snjólaug hefur gefið út bók hjá Cambridge University Press um áhrif loftslagsbreytinga á mörk hafsvæða, hún situr í nefnd Alþjóðalagaráðs um þjóðarétt og hækkandi sjávarmál og var í starfshópi matvælaráðuneytisins um lagaumgjörð hvalveiða.

Björn Helgi Barkarson

Umhverfisfræðingur og skrifstofustjóri hjá umhverfis-, orku og loftslagsráðuneytinu.

Dr. Freydís Vigfúsdóttir

Líffræðingur og sérfræðingur hjá umhverfis-, orku og loftslagsráðuneytinu. Freydís er doktor í líffræði með sérþekkingu á vistfræði sjávar. Hún er aðalsamningamaður og tengiliður við samning Sameinuðu þjóðanna um líffræðilega fjölbreytni (CBD). Auk þess leiðir hún mörg verkefni innan ráðuneytisins er varða málefni hafsins, verndarsvæði og haftengda alþjóðasamninga.

Dr. Snorri Sigurðsson

Líffræðingur og sviðsstjóri hjá Náttúrufræðistofnun. Snorri flytur erindið Líffræðileg fjölbreytni. Stefnumörkun Íslands. Snorri er doktor í líffræði og starfar sem sviðsstjóri náttúruverndar hjá Náttúrufræðistofnun. Hann var formaður stýrihóps umhverfis-, orku- og loftslagsráðherra sem skilaði tillögu að hvítbók um stefnu Íslands um líffræðilega fjölbreytni í júní síðastliðnum.