Ávarp við setningu Búnaðarþings 1. mars 2014 í Hörpu.

ATH. Talað orð gildir

Ágætu hátíðargestir.

„Það er ekki siður í sveitum að taka menn trúanlega ef þeir afþakka kaffi og meðí!“.

Með þessum orðum kom Nóbelsskáldið okkar Halldór Laxnes fyrir í einni setningu og lagði áherslu á :  einlægri gestrisni sveitafólks;  nægum og fjölbreyttum mat á borðum húsmæðra og  sjálfsagðri kurteisi.

Í raun sjáum við brot af þessu öllu við þetta tækifæri í dag þegar verið að er setja Búnaðarþing.

Allt tekur breytingum og svo er með setningu þingsins nú og finnst mér vel við hæfi að setning þingsins veki athygli og hvaða staður er betri til þess nú en Harpan.

Íslenskir bændur vita vel hvert skal stefna – að framleiða hollan og nægan mat fyrir þjóðina. Þetta hefur tekist þannig að fullyrða má að Íslendingar treysta á þessa framleiðslu og eru stoltir af sínum mat.

Á heimsvísu er íslensk landbúnaðarframleiðsla afar lítill  gæðamarkaður og vörurnar ef til vill dýrari en hægt væri að fá þær á uppboðsmörkuðum offramleiðslu vara – en ekki hvarflar að neinum að kvika frá gæðum – það eru þau sem við viljum verðmeta, rétt eins og svissneska osta eða frönsk kampavín.

Það er ánægjulegt til að vita að íslenskur landbúnaður er í sókn. Og aukinn landbúnaður kallar á hundruði fólks í þjónustu þessa atvinnuvegar. Brot af því sjáum við hér á matarhátíð og svo næstu daga í veitingahúsunum, þegar úrvalskokkar landsins bjóða upp á sitt besta – ekki aðeins fyrir Íslendinga – nei nú er það heimurinn sjálfur sem þeir matbúa fyrir með sínu þjónustuliði, því kokkakeppni Food & Fun er orðið þekkt hátíð og fjölmargir sækja Ísland heim – beinlínis til að upplifa stemminguna og fá að bragða á íslenskum gæðaréttum.

 

Enn til viðbótar er af þessu tilefni haldinn stærsti matarmarkaður landsins sem Ljúfmetisverslunin Búrið stendur fyrir. Einkunnarorð markaðarins eru „Uppruni, umhyggja og upplifun“ og um leið og verslað er kemst viðskiptavinurinn í beint samband við framleiðenda vörunnar – getur spurst fyrir um uppruna hennar og kynnst þeim sem hana hafa meðhöndlað.

Góðir gestir.

Þetta myndi ekki gerast ef íslenskir bændur væru ekki sannfærðir um að það sem þeir framleiða sé gott. Bændur eru stoltir og íslenska þjóðin er stolt af þeirra verkum.

Öll erum við lítil fjölskylda á stóru landi sem um tíma var talið óbyggilegt. Nú fer það orð af Íslendingum að þeir séu framarlega  á flestum sviðum.

Duglegir – vel menntaðir og láta hlut sinn hvergi.

Nokkuð langt er síðan við sátum við samningaborð um íslensku landhelgina. Þá varð einum nefndarmanni að orði. „Ef Íslendingar væru í milljónum það sem þeir eru í þúsundum taldir, vildi ég ekki búa í landinu við hliðina á þeim.“

Við Íslendingar ætlum því ekki að vera upp á aðrar þjóðir komnir með matvælaframleiðslu – en á því veltur ekki hvað síst grundvöllur sjálfstæðrar þjóðar. Við ætlum að sækja fram og á þeim vettvangi er íslenskur landbúnaður ekki undanskilinn.

Hér er hvorki staður né stund til að ræða hin margvíslegu málefni landbúnaðarins. Því mun ég líta inn á Búnaðarþing eftir að það tekur til starfa og fjalla þar um þau atriði sem ég hef verið að fást við.

Ég óska Búnaðarþingi alls velfarnaðar í störfum sínum og ykkur öðrum sem hér eru leyfi ég mér að þakka komuna í Hörpu.