Þjónusta við Íslendinga

Sendiráð Íslands í Berlín leggur lið þeim Íslendingum sem búsettir eru í umdæmislöndunum, námsmönnum og ferðamönnum.

Aðstoð sendiráðsins getur verið með ýmsum hætti. Algengast er að fólk leiti til sendiráðsins vegna útgáfu vegabréfa, nafnskírteina og ýmissa vottorða.

Sendiráðið vekur athygli á að utan opnunartíma þess er í neyðartilfellum hægt að óska eftir borgaraþjónustu í neyðarvakt utanríkisráðuneytisins í síma +354 545-0112.

Hægt er að sækja um vegabréf í sendiráðinu í Berlín.  Vegabréf eru ekki framlengd heldur einungis gefin út ný.

Nánari upplýsingar undir Umsókn um vegabréf og nafnskírteini.

Til þess að börn fædd erlendis verði skráð sem íslenskir ríkisborgarar og þar með fengið íslensk vegabréf, þ.m.t. neyðarvegabréf, þurfa þau að hafa fengið íslenska kennitölu. Nánari upplýsingar eru að finna á vef Þjóðskrár. Um leið og kennitalan liggur fyrir er hægt að útbúa fyrir þau vegabréf.

Hægt er að sækja um neyðarvegabréf í sendiráðinu í Berlín. Neyðarvegabréf eru helst ætluð til þess að koma íslenskum ríkisborgurum heim til Íslands eða á næsta umsóknarstað fyrir vegabréf.

Neyðarvegabréf er handútfyllt á staðnum og hefur það þess vegna ekki sömu öryggisstaðla og venjulegt vegabréf.

Ef þú hefur bókað flug til Íslands og núverandi vegabréf er útrunnið, þá mælir sendiráðið með því að hafa fyrst beint samband við flugfélagið sem miðinn var bókaður með til þess að athuga hvort núverandi skilríki verði tekið gilt við brottför. Mögulegt er að íslensk flugfélög taki t.d. íslenskt ökuskírteini eða afrit af vegabréfi gilt.

Komi hins vegar í ljós að þörf sé á neyðarvegabréfi og tíminn er naumur, hafið þá beint samband við sendiráðið í síma +49 30 7001 60380 eða [email protected].

• Neyðarvegabréfið kostar 51€, en 21€ fyrir börn yngri en 18 ára og eldri borgara 67 ára og eldri 
  Fyrir börn ygnri en 18 ára þarf samþykki beggja forráðamanna að liggja fyrir. Hægt er að fylla það út á staðnum.
• Mæta þarf með tvær góðar passamyndir. Klæðist helst ljósum fötum á myndinni, ef kostur er á.

Ræðismenn geta eftir sem áður haft milligöngu um útgáfu neyðarvegabréfa í sérstökum neyðartilfellum. Upplýsingar um ræðismenn í umdæmislöndum sendiráðsins.

Hægt er að framvísa íslenskum nafnskírteinum innan Evrópska efnahagssvæðisins (EES) í stað vegabréfs. Svipa þau til hins þýska „Personalausweis“ í kreditkortaformi en þó er heimilisfang ekki skráð á það íslenska eins og það þýska.

Hægt er að sækja um nafnskírteini sem ferðaskilríki í sendiráðinu í Berlín og er ferlið það sama og fyrir vegabréf. Nánari upplýsingar undir Umsókn um vegabréf og nafnskírteini.

Nánari upplýsingar um nafnskírteini eru að finna á vef Þjóðskrár.

Íslensk ökuskírteini, gefin út eftir 1997, eru viðurkennd til aksturs innan EES-landanna. Þetta á við hvort sem viðkomandi dvelur sem ferðamaður í viðkomandi ríki eða tekur upp fasta búsetu í því.

Sendiráði Íslands er óheimilt að taka á móti umsóknum um íslensk ökuskírteini, hvort sem um er að ræða endurnýjun eða samrit, nema ef viðkomandi hafi fasta búsetu á Íslandi.

Föst búseta miðast við lögheimili og/eða að viðkomandi búi a.m.k. 185 daga á hverju almanaksári í viðkomandi landi. Íslendingar með fasta búsetu erlendis verða því að sækja um ökuskírteini í því landi þar sem þeir teljast hafa fasta búsetu. Undanskildir eru námsmenn sem flytja erlendis eingöngu til að fara í nám.

Um gildi ökuskírteina af EES-svæðinu í Þýskalandi má finna nánar af vef þýska innviðaráðuneytisins, bæði á þýsku og ensku, og í minnisblaði (einungis á þýsku) er Ísland sérstaklega tekið fram.

Íslendingar þurfa hvorki dvalar- né atvinnuleyfi í Þýskalandi, þar sem Ísland er aðili að samningnum um evrópska efnahagssvæðið (EES) eða EWR, Europäischer Wirtschaftsraum á þýsku, og er einnig hluti af Schengen-samstarfinu.

Upplýsingar um búseturétt Íslendinga í Þýskalandi má finna á vef Berlínarborgar, en upplýsingarnar þar gilda fyrir allt Þýskaland.

Árið 2024 leyfði Þýskaland tvöfaldan ríkisborgararétt. Íslendingar sem vilja sækja um þýskan ríkisborgararétt þurfa ekki lengur að afsala sér þeim íslenska.

Sendiráðið mælir með Auðkennisappinu. Með því er hægt að fá rafræn skilríki í app á snjallsíma, en til þess þarf einungis gilt íslenskt vegabréf og snjallsíma með NFC-lausn og er það ekki tengt við rafræn skilríki á SIM-korti. Þess vegna er ekki þörf á íslensku símanúmeri til þess að geta notað auðkennisappið og geta notendur þannig aðkennt sig hvar sem er í heiminum.

Nánari upplýsingar um rafræn skilríki eru einnig að finna á vef island.is.

Nemendum við íslenskar menntastofnanir, sem staddir eru erlendis, stendur til boða að taka fjarpróf hjá tilteknum sendiskrifstofum Íslands og eftir atvikum kjörræðismönnum. Miðað er við að próftakan sé á virkum dögum á opnunartíma sendiskrifstofu. Þeir próftímar sem standa til boða fara eftir getu sendiskrifstofunnar hverju sinni.

Ferlið

• Ef bókunarvél er ekki til staðar á vef sendiskrifstofunnar þá skal nemandi senda próftökubeiðni í tölvupósti með góðum fyrirvara á almenna netfang sendiskrifstofu.
• Í próftökubeiðninni skal taka fram fullt nafn nemanda, kennitölu, heiti menntastofnunar og námsbrautar, dagsetningu og tímasetningu prófs.
• Nemandi sendir næst inn umsókn um fjarpróf til skólans eftir að hafa fengið svar frá sendiskrifstofunni.
• Skólinn upplýsir sendiskrifstofuna um að heimild sé veitt fyrir próftöku.
• Nemandi staðfestir viku fyrir próf að hann/hún/hán ætli að þreyta prófið.
• Skólinn sendir sendiskrifstofunni prófið a.m.k. einum virkum degi fyrir prófdag.

Nemandi greiðir póstburðargjald/umsýslugjald til sendiskrifstofunnar fyrir hvert próf sem senda þarf til Íslands með pósti. Einnig þarf nemandi að greiða fyrir ljósritun/útprentun prófgagna ef svo ber undir.

Annað

• Tilkynna ber forföll eins fljótt og auðið er til sendiskrifstofunnar.
• Framvísa verður persónuskilríkjum áður en próf hefst.
• Nemendur mega ekki yfirgefa prófstað fyrr en prófið á Íslandi er hafið (nema að um annað hafi verið samið við viðkomandi menntastofnun).
• Sendiskrifstofur eru ekki hannaðar fyrir próftökur. Því er ekki tryggt að þar sé hljótt vegna almennrar starfsemi í húsinu. Mælt er með því að nemendur taki með sér eyrnatappa.
• Sendiskrifstofum er heimilt að hafna beiðnum um próftökur sökum anna tengdum reglubundinni starfsemi eða plássleysis. Í slíkum tilfellum er það alfarið á ábyrgð próftaka að finna annan stað til að þreyta prófið.