Þjónusta við Íslendinga

Sendiráðið hefur það hlutverk að aðstoða Íslendinga í umdæmisríkjum þess. Sendiráðið annast framkvæmd vegna utankjörstaðaatkvæðagreiðslna, útgáfu neyðarvegabréfa og móttekið umsóknir um endurnýjun ökuskírteina svo eitthvað sé nefnt.

Sé þörf á frekari upplýsingum um aðstoð við Íslendinga erlendis er bent á vef borgaraþjónustu utanríkisráðuneytisins en í neyðartilfellum má ná í starsmann borgaraþjónust í síma 00 354 545 9900.

Sendiráð Íslands leggur lið Íslendingum sem búsettir eru í Finnlandi og umdæmisríkjum, námsmönnum og ferðamönnum, ef svo ber undir.

Aðstoð sendiráðsins við íslenska borgara getur verið með ýmsum hætti. Algengast er að fólk leiti til sendiráðsins vegna útgáfu vegabréfa og samskipta við hin ýmsu stig finnskrar og íslenskrar stjórnsýslu. Einnig aðstoðar sendiráðið Íslendinga m.a. vegna veikinda eða slysa, sakamála og afplánunar refsidóma, skjalavottana, leit að týndum einstaklingum og heimflutnings látinna, veikra eða vegalausra borgara. Þá býðst Íslendingum að taka próf hjá íslenskum menntastofnunum í sendiráðinu og greiða atkvæði utankjörfundar.

Umsjónarmaður aðstoðar- og ræðismála er Sigrún Bessadóttir, fulltrúi.

Sendiráðið vekur athygli á að utan opnunartíma má óska eftir borgaraþjónustu í neyðartilfellum hjá neyðarvakt utanríkisráðuneytisins í síma +354 545-0112 sem er opin allan sólarhringinn.

Ferðamönnum í vanda er bent á að hafa í fyrstu samband við borgaraþjónustu utanríkisráðuneytisins í síma +354 545 0112.

Athugið að sendiráðið veitir ekki fjárhagsaðstoð.

Sjá frekari upplýsingar um borgaraþjónusta fyrir íslenska ríkisborgara erlendis

Info Norden er upplýsingavefur á vegum Norrænu ráðherranefndarinnar um flutninga á milli Norðurlandanna, t.d. í tengslum við atvinnuleit, skatta, sjúkratryggingar, lífeyri, barnabætur og tollamál.

Nordisk eTax er upplýsingasíða um skattamál fyrir þá, sem eru búsettir í einu norrænu ríkjanna, en hafa tekjur eða eiga eignir í einhverju öðru þeirra.

this is Finland er opinber vefur Finnlands með gagnlegum upplýsingum.

Á vefsetri utanríkisráðuneytisins er að finna upplýsingar um vegabréfsáritanir sem Íslendingar þurfa vegna ferðalaga til einstakra landa.

Útlendingastofnun veitir upplýsingar um vegabréfsáritanir sem erlendir ríkisborgarar þurfa vegna ferðalaga til Íslands

Sá sem hefur fasta búsetu erlendis og glatar íslensku ökuskírteini sínu getur ekki lengur sótt um endurútgáfu þess. Föst búseta miðast við að viðkomandi búi a.m.k. 185 daga erlendis á hverju almanaksári.  Undanskildir eru aðilar sem dvelja erlendis vegna tímabundinna verkefna eða náms (12. gr. tilsk. nr. 2006/126/EBE).  Íslendingar með fasta búsetu erlendis verða því að sækja um nýtt ökuskírteini í því landi sem þeir teljast hafa fasta búsetu.

Mögulegt er að láta skrá börn sem fædd og búsett eru í Finnlandi en eru með íslenskan ríkisborgararétt í þjóðskrá á Íslandi og fá þau þá úthlutað íslenskri kennitölu. Gefa þarf upp fullt nafn barns og fæðingardag. Beiðninni þarf einnig að fylgja virkatodistus/ämbetsbevis frá finnska Digi- ja väestötietovirasto / Myndigheten för digitalisering och befolkningsdata eða finnsku kirkjunni. Hægt er að hafa beint samband við þjóðskrá en sendiráðið kemur gögnunum til skila sé þess óskað.

• Fylla þarf út Beiðni um skráningu barns sem fætt er erlendis í þjóðskrá
• Hafi íslenskur, ógiftur karlmaður eignast barn erlendis fyrir 1. júlí 2018 með erlendum ríkisborgara, þá þarf að sækja um skráningu barnsins hjá Útlendingastofnun. Útlendingastofnun sendir í þeim tilvikum beiðni um skráningu í þjóðskrá þegar búið er að staðfesta ríkisfang barns. Öll fylgiskjöl tilgreind á eyðublaðinu verða að fylgja beiðninni og uppfylla kröfur til erlendra skjala. Fæðingarvottorð þurfa að vera gefin út af skráningaraðilum í viðkomandi landi. Á vottorðinu eiga að koma fram upplýsingar um fæðingardag barns, nöfn foreldra og nafn barns.

Félagið er með síðu á Facebook "Íslendingar í Finnlandi" og er hægt er að skrá sig þar, fylgjast með og kynnast starfsemi félagsins.

Samband íslenskra námsmanna erlendis (SINE) veitir allar nánari upplýsingar um nám erlendis

Nemendum við íslenskar menntastofnanir, sem staddir eru erlendis, stendur til boða að taka fjarpróf hjá tilteknum sendiskrifstofum Íslands og eftir atvikum kjörræðismönnum. Miðað er við að próftakan sé á virkum dögum á opnunartíma sendiskrifstofu. Þeir próftímar sem standa til boða fara eftir getu sendiskrifstofunnar hverju sinni.

Ferlið

• Ef bókunarvél er ekki til staðar á vef sendiskrifstofunnar þá skal nemandi senda próftökubeiðni í tölvupósti með góðum fyrirvara á almenna netfang sendiskrifstofu.
• Í próftökubeiðninni skal taka fram fullt nafn nemanda, kennitölu, heiti menntastofnunar og námsbrautar, dagsetningu og tímasetningu prófs.
• Nemandi sendir næst inn umsókn um fjarpróf til skólans eftir að hafa fengið svar frá sendiskrifstofunni.
• Skólinn upplýsir sendiskrifstofuna um að heimild sé veitt fyrir próftöku.
• Nemandi staðfestir viku fyrir próf að hann/hún/hán ætli að þreyta prófið.
• Skólinn sendir sendiskrifstofunni prófið a.m.k. einum virkum degi fyrir prófdag.

Nemandi greiðir póstburðargjald/umsýslugjald til sendiskrifstofunnar fyrir hvert próf sem senda þarf til Íslands með pósti. Einnig þarf nemandi að greiða fyrir ljósritun/útprentun prófgagna ef svo ber undir.

Annað

• Tilkynna ber forföll eins fljótt og auðið er til sendiskrifstofunnar.
• Framvísa verður persónuskilríkjum áður en próf hefst.
• Nemendur mega ekki yfirgefa prófstað fyrr en prófið á Íslandi er hafið (nema að um annað hafi verið samið við viðkomandi menntastofnun).
• Sendiskrifstofur eru ekki hannaðar fyrir próftökur. Því er ekki tryggt að þar sé hljótt vegna almennrar starfsemi í húsinu. Mælt er með því að nemendur taki með sér eyrnatappa.
• Sendiskrifstofum er heimilt að hafna beiðnum um próftökur sökum anna tengdum reglubundinni starfsemi eða plássleysis. Í slíkum tilfellum er það alfarið á ábyrgð próftaka að finna annan stað til að þreyta prófið.