Þjónusta við Íslendinga

Sendiráð Íslands í París leggur lið bæði þeim Íslendingum sem búsettir eru í umdæmislöndunum, námsmönnum og ferðamönnum. Aðstoð sendiráðsins getur verið með ýmsum hætti. Algengast er að fólk leiti til sendiráðsins vegna útgáfu vegabréfa og vottorða.

Það skal tekið fram að sendiráðið veitir enga fjárhagsaðstoð af nokkru tagi.

Gagnlegar upplýsingar um Frakkland má finna á vefsíðu ferðamálaráðs Frakklands.

Hægt er að sækja um vegabréf í sendiráðinu í París. Sjá nánar um umsóknir um vegabréf. Vegabréf eru ekki framlengd heldur einungis gefin út ný.

Panta ber tíma vegna umsókna um vegabréf með góðum fyrirvara, og mikilvægt er að mæta á réttum tíma.

Hægt er að framvísa íslenskum nafnskírteinum innan Evrópska efnahagssvæðisins (EES) í stað vegabréfs.

Hægt er að sækja um nafnskírteini sem ferðaskilríki í sendiráðinu og er ferlið það sama og fyrir vegabréf.

Nánari upplýsingar um nafnskírteini eru að finna á vef Þjóðskrár.

Sá sem hefur fasta búsetu erlendis og glatar íslensku ökuskírteini sínu getur ekki lengur sótt um endurútgáfu þess. Föst búseta miðast við að viðkomandi búi a.m.k. 185 daga erlendis á hverju almanaksári.  Undanskildir eru aðilar sem dvelja erlendis vegna tímabundinna verkefna eða náms (12. gr. tilsk. nr. 2006/126/EBE).  Íslendingar með fasta búsetu erlendis verða því að sækja um nýtt ökuskírteini í því landi sem þeir teljast hafa fasta búsetu.

Íslensk ökuskírteini eru gild í Frakklandi og þeim, sem hefur þar fasta búsetu, ber ekki skylda til að sækja um franskt ökuskírteini nema ef viðkomandi hefur gerst sekur um umferðarlagabrot (opinberar upplýsingar á frönsku).

Sýslumannsembættin (préfecture) eða aðallögreglustöðin í París (Préfecture de police) annast afgreiðslu. Nánar um afgreiðslu franskra ökuskírteina.

Íslenskum ríkisborgurum er frjálst að dvelja í Frakklandi lengur en 3 mánuði að uppfylltum eftirfarandi skilyrðum.  Þeim ber skylda til að eiga gilt vegabréf meðan á dvöl þeirra stendur og þurfa að geta sýnt fram á framfærslugetu.  Íslenskum ríkisborgurum ber ekki skylda til að sækja um dvalarleyfi í Frakklandi en það getur þó í sumum tilfellum reynst gagnlegt. Benda má á að almenningi er skylt að ganga með persónuskilríki á sér í Frakklandi.

Nánari upplýsingar á upplýsingasíðu franskra stjórnvalda: Séjour de longue durée d'un Européen en France | Service-public.fr

Íslenskir námsmenn þurfa einnig að geta sýnt fram á skráningu í nám í Frakklandi og sjúkratryggingu á Íslandi.  Námsmenn geta haldið lögheimili sínu á Íslandi meðan á námi stendur og haldið rétti sínum til almannatrygginga. Framvísa þarf evrópska sjúkratryggingakortinu við komu á heilbrigðisstofnun.

Námsmenn þurfa ekki að sækja um dvalarleyfi í Frakklandi en óski þeir sérstaklega eftir því er hægt að sækja um dvalarleyfi hér: Étrangers en France | Accueil (interieur.gouv.fr)

Launþegar þurfa ekki að sækja um dvalarleyfi í Frakklandi, en hafa þó rétt á að sækja um slíkt sé þess óskað, sjá upplýsingasíðu franskra stjórnvalda.  Hægt er að sækja um dvalarleyfi hér: Étrangers en France | Accueil (interieur.gouv.fr)

docEftirlaunaþegar og atvinnulausir geta að uppfylltum skilyrðum dvalið í Frakklandi lengur en 3 mánuði.

Þeir þurfa að geta sýnt fram á framfærslugetu og sjúkratryggingu.  Sjá frekari upplýsingar um kröfur varðandi framfærslugetu hér: Séjour de longue durée d'un Européen en France | Service-public.fr

Eftirlaunaþegar og atvinnulausir þurfa ekki að sækja um dvalarleyfi í Frakklandi, en óski þeir sérstaklega eftir því er hægt að sækja um dvalarleyfi hér: Étrangers en France | Accueil (interieur.gouv.fr)

Upplýsingar um sjúkratryggingar og réttindi milli landa á Ísland.is.

Nemendum við íslenskar menntastofnanir, sem staddir eru erlendis, stendur til boða að taka fjarpróf hjá tilteknum sendiskrifstofum Íslands og eftir atvikum kjörræðismönnum. Miðað er við að próftakan sé á virkum dögum á opnunartíma sendiskrifstofu. Þeir próftímar sem standa til boða fara eftir getu sendiskrifstofunnar hverju sinni.

Ferlið

• Ef bókunarvél er ekki til staðar á vef sendiskrifstofunnar þá skal nemandi senda próftökubeiðni í tölvupósti með góðum fyrirvara á almenna netfang sendiskrifstofu.
• Í próftökubeiðninni skal taka fram fullt nafn nemanda, kennitölu, heiti menntastofnunar og námsbrautar, dagsetningu og tímasetningu prófs.
• Nemandi sendir næst inn umsókn um fjarpróf til skólans eftir að hafa fengið svar frá sendiskrifstofunni.
• Skólinn upplýsir sendiskrifstofuna um að heimild sé veitt fyrir próftöku.
• Nemandi staðfestir viku fyrir próf að hann/hún/hán ætli að þreyta prófið.
• Skólinn sendir sendiskrifstofunni prófið a.m.k. einum virkum degi fyrir prófdag.

Nemandi greiðir póstburðargjald/umsýslugjald til sendiskrifstofunnar fyrir hvert próf sem senda þarf til Íslands með pósti. Einnig þarf nemandi að greiða fyrir ljósritun/útprentun prófgagna ef svo ber undir.

Annað

• Tilkynna ber forföll eins fljótt og auðið er til sendiskrifstofunnar.
• Framvísa verður persónuskilríkjum áður en próf hefst.
• Nemendur mega ekki yfirgefa prófstað fyrr en prófið á Íslandi er hafið (nema að um annað hafi verið samið við viðkomandi menntastofnun).
• Sendiskrifstofur eru ekki hannaðar fyrir próftökur. Því er ekki tryggt að þar sé hljótt vegna almennrar starfsemi í húsinu. Mælt er með því að nemendur taki með sér eyrnatappa.
• Sendiskrifstofum er heimilt að hafna beiðnum um próftökur sökum anna tengdum reglubundinni starfsemi eða plássleysis. Í slíkum tilfellum er það alfarið á ábyrgð próftaka að finna annan stað til að þreyta prófið.