Innleiðing Microsoft Copilot hjá íslenska ríkinu

Unnið er að samræmdri innleiðingu Microsoft Copilot hjá ríkisstofnunum með það að markmiði að efla starfsfólk, auka skilvirkni og styðja við ábyrga notkun gervigreindar í opinberri þjónustu. Verkefnið er hluti af sameiginlegu átaki ríkisins til að byggja upp þekkingu, tryggja öryggi og samræma nálgun við nýtingu gervigreindar.

Innleiðingin er fyrst og fremst umbreytingarverkefni sem byggir á virkri þátttöku stjórnenda og starfsfólks, markvissri fræðslu og góðri gagna- og aðgangsstýringu. Áhersla er lögð á að ný verkfæri styðji við daglegt starf, bæti gæði vinnu og spari tíma — en komi ekki í stað mannlegrar dómgreindar.

Innleiðing verður stigvaxandi og byggð á þörfum stofnana. Samhliða sem undanfari innleiðingar er unnið að mati á tæknilegu umhverfi, öryggi og gagnastjórnun til að tryggja trausta og ábyrga notkun frá upphafi.

Hvað er Copilot?

Microsoft Copilot er gervigreindarlausn sem nýtist innan Microsoft 365 (t.d. Word, Excel, PowerPoint, Outlook og Teams). Með Copilot getur starfsfólk m.a.:

dregið saman skjöl og samskipti
unnið fundargerðir og samantektir
aðstoðað við gerð texta, kynninga og gagnaúrvinnslu
leitað í eigin vinnuumhverfi á skilvirkari hátt

Copilot hefur eingöngu aðgang að þeim gögnum sem notandi hefur þegar heimild fyrir og gögn eru ekki notuð til að þjálfa grunnlíkön.

Fræðsla og stuðningur

Í tengslum við innleiðinguna verður boðið upp á:

Grunnfræðslu fyrir alla ríkisstarfsmenn um notkun gervigreindar, öryggi og gagnrýna hugsun
Hlutverkamiðaða þjálfun fyrir ólíka starfshópa
Stuðning við breytingastjórnun og upptöku nýrra vinnubragða

Sameiginleg þekking og verkfæri

Þessi síða mun þróast áfram samhliða verkefninu og verða miðpunktur upplýsinga fyrir ríkisstarfsmenn. Hér verður m.a. að finna:

Tímalína innleiðingarverkefnis fyrir rekstrarumhverfi
Upplýsingar um framvindu innleiðingar
Svör við algengum spurningum
Dagskrá og skráningu á námskeið
Verkfærakistu fyrir stofnanir, þar á meðal stefnumótunargögn, ávinningsmat og leiðbeiningar
Markmið og mælikvarðar
… og fleira tilfallandi.

Markmiðið er að byggja upp sameiginlegt lærdómssamfélag þar sem stofnanir deila reynslu og góðum dæmum.

Væntingar og næstu skref

Innleiðing Copilot fer fram í áföngum og verður innleidd í samræmi við undirbúning, þarfir og forgangsröðun stofnana. Nánari upplýsingar um tímasetningar og aðgengi verða birtar hér eftir því sem verkefnið þróast.

Innleiðing Microsoft Copilot hjá íslenska ríkinu