Þjónusta við Íslendinga

Aðalræðisskrifstofan veitir Íslendingum margvíslega þjónustu. Aðalræðisskrifstofan hefur m.a. milligöngu um útvegun vegabréfa og veitir íslenskum ríkisborgurum ýmsa aðra fyrirgreiðslu.

Aðalræðisskrifstofan aðstoðar íslenska ríkisborgara og fyrirtæki í samskiptum við fyrirtæki og yfirvöld og dreifir upplýsingum og fróðleik um Ísland ásamt því að taka þátt í kynningum allskonar sem koma landi og þjóð til góða.

Hægt er að sækja um vegabréf hjá aðalræðisskrifstofunni í Winnipeg.

Panta ber tíma í síma +1 (204) 284 1535 eða senda beiðni á tölvupóstfangið [email protected].

Athugið að aðeins er tekið við greiðslu í reiðufé eða innlögn á bankareikning (e-transfer).

Almennar upplýsingar vegna umsókna um vegabréf er að finna hér að neðan og á vef Þjóðskrár Íslands.

Vegabréf og nafnskírteini eru einu persónuskilríkin sem gefin eru út af íslenskum yfirvöldum.  Vegabréf eru einu íslensku ferðaskilríkin sem vissa er fyrir að öll önnur ríki viðurkenni sem gild ferðaskilríki. Nafnskírteini eru hins vegar eingöngu viðurkennd sem gild ferðaskilríki innan ríkja evrópska efnahagssvæðisins. Því þurfa Íslendingar ávallt að ferðast með vegabréf þegar ferðast er til ríkja utan evrópska efnahagssvæðisins.

Burtséð frá því hvar er sótt um vegabréf, þá eru öll vegabréf gefin út af Þjóðskrá. Afgreiðslutími vegabréfa getur verið allt að 6 virkir dagar auk póstsendingartíma. Athugið að ef frídagar eru á tímabilinu lengist afgreiðslutíminn sem þeim nemur.

Umsækjandi þarf alltaf að mæta í eigin persónu á umsóknarstað og skal panta tíma fyrir fram.

Eftirfarandi þarf að hafa með sér:

• Eldra vegabréf
• Umsóknargjald
  ATH! Vegabréf eru aldrei endurútgefin né afgreidd í gegnum netið.

Vegabréf sem tilkynnt hafa verið glötuð eru skráð í Schengen og Interpol upplýsingakerfin og eru þar með ónothæf.

Aðalræðisskrifstofan getur gefið út neyðarvegabréf. Neyðarvegabréf eru gefin út til að aðstoða íslenska ríkisborgara í neyð, helst til að komast heim eða á næstu umsóknarstöð vegabréfa. Neyðarvegabréf gildir aldrei lengur en 12 mánuði. Þau eru talin fullgild ferðaskilríki í Evrópu, en þau eru ekki tölvulesanleg og því er ekki mælt með að þau séu notuð til ferðalaga utan Evrópu.

Búnaður til að taka við umsóknum um vegabréf er í eftirtöldum sendiráðum Íslands erlendis: Berlín, Brussel, Genf, Helsinki, Kaupmannahöfn, Kampala, Lilongwe, London, Moskvu, Nýju-Delí, Osló, Ottawa, París, Peking, Stokkhólmi, Tókýó, Vín, Washington DC og á aðalræðisskrifstofum í Nuuk, Winnipeg og Þórshöfn. Á þessum sendiskrifstofum er því hægt að sækja um vegabréf.

Ekki er lengur unnt að framlengja gildistíma almennra íslenskra vegabréfa.

Hægt er að sækja um endurnýjun á íslensku ökuskírteini hjá aðalræðisskrifstofunni í Winnipeg.

Umsókninni þarf að fylgja svokallað kennispjald sem útvega þarf frá ríkislögreglustjóra. Nauðsynlegt er að hringja fyrst í aðalræðisskrifstofuna, gefa upp nafn og íslenska kennitölu og óska eftir að fá kennispjald útgefið.

Fylla þarf út umsókn á aðalræðisskrifstofunni, koma með eina mynd og greiða CAD 90 (innifalið er pósburðargjald) í reiðufé eða með ávísun sem stíluð er á Consulate General of Iceland in Winnipeg
Afgreiðslutími ökuskírteinis er um fjórar vikur.

Upplýsingar um vegabréfsáritanir sem Íslendingar þurfa vegna ferðalaga til einstakra landa.

Upplýsingar um vegabréfsáritanir sem útlendingar þurfa vegna ferðalaga til Íslands veitir Útlendingastofnun.

Nemendum við íslenskar menntastofnanir, sem staddir eru erlendis, stendur til boða að taka fjarpróf hjá tilteknum sendiskrifstofum Íslands og eftir atvikum kjörræðismönnum. Miðað er við að próftakan sé á virkum dögum á opnunartíma sendiskrifstofu. Þeir próftímar sem standa til boða fara eftir getu sendiskrifstofunnar hverju sinni.

Ferlið

• Ef bókunarvél er ekki til staðar á vef sendiskrifstofunnar þá skal nemandi senda próftökubeiðni í tölvupósti með góðum fyrirvara á almenna netfang sendiskrifstofu.
• Í próftökubeiðninni skal taka fram fullt nafn nemanda, kennitölu, heiti menntastofnunar og námsbrautar, dagsetningu og tímasetningu prófs.
• Nemandi sendir næst inn umsókn um fjarpróf til skólans eftir að hafa fengið svar frá sendiskrifstofunni.
• Skólinn upplýsir sendiskrifstofuna um að heimild sé veitt fyrir próftöku.
• Nemandi staðfestir viku fyrir próf að hann/hún/hán ætli að þreyta prófið.
• Skólinn sendir sendiskrifstofunni prófið a.m.k. einum virkum degi fyrir prófdag.

Nemandi greiðir póstburðargjald/umsýslugjald til sendiskrifstofunnar fyrir hvert próf sem senda þarf til Íslands með pósti. Einnig þarf nemandi að greiða fyrir ljósritun/útprentun prófgagna ef svo ber undir.

Annað

• Tilkynna ber forföll eins fljótt og auðið er til sendiskrifstofunnar.
• Framvísa verður persónuskilríkjum áður en próf hefst.
• Nemendur mega ekki yfirgefa prófstað fyrr en prófið á Íslandi er hafið (nema að um annað hafi verið samið við viðkomandi menntastofnun).
• Sendiskrifstofur eru ekki hannaðar fyrir próftökur. Því er ekki tryggt að þar sé hljótt vegna almennrar starfsemi í húsinu. Mælt er með því að nemendur taki með sér eyrnatappa.
• Sendiskrifstofum er heimilt að hafna beiðnum um próftökur sökum anna tengdum reglubundinni starfsemi eða plássleysis. Í slíkum tilfellum er það alfarið á ábyrgð próftaka að finna annan stað til að þreyta prófið.