Árið 1999 var opnuð aðalræðisskrifstofa í Winnipeg með útsendum diplómat. Frá 1942 og fram að þeim tíma var starfandi íslenskur heiðurskonsúll í Winnipeg.

Eftirfarandi hafa gegnt starfi aðalræðismanns í Winnipeg. Svavar Gestsson, sendiherra 1999-2001, Eiður Guðnason, sendiherra 2001-2003, Kornelíus Sigmundsson, sendiherra 2003-2004, Atli Ásmundsson, aðalræðismaður 2004-2013, Hjálmar W. Hannesson sendiherra frá 2013-2016, Þórður Bjarni Guðjónsson, aðalræðismaður 2016-2020, Guðmundur Árni Stefánsson, sendiherra 2020-2021 og Vilhjálmur Wiium, aðalræðismaður frá 2022.

Meginverkefni aðalræðisskrifstofunnar snúa að samfélagi fólks af íslenskum ættum og skrifstofan greiðir fyrir menningaratburðum, listum og fræðum og öðru sem má verða til að hjálpa áhugasömu fólki til að leggja rækt við sögu sína og menningararf. Á hverju ári koma listamenn, fræðimenn og aðrir til að miðla þakklátum áheyrendum af þekkingu sinni og list.

Ræðisskrifstofan aðstoðar íslenska ríkisborgara og fyrirtæki í samskiptum við fyrirtæki og yfirvöld og dreifir upplýsingum og fróðleik um Ísland ásamt því að taka þátt í kynningum allskonar sem koma landi og þjóð til góða.

Umdæmi aðalræðisskrifstofunnar eru fylkin Manitoba, Saskatchewan, að undanskilinni borginni Regina, og fylkið Alberta, að undanskildum borgunum Calgary og Edmonton.