Æðardúnn

Samkvæmt lögum um gæðamat á æðardúni skal allur æðardúnn hvort sem hann er til dreifingar innanlands eða til útflutnings, metinn og veginn af lögskipuðum dúnmatsmönnum eftir fullhreinsun.

Sjávarútvegs- og landbúnaðarráðherra veitir leyfi til handa dúnmatsmönnum til að starfa á þeim stöðum þar sem þess er þörf. Starfssvæði dúnmatsmanna eru ákveðin með reglugerð.

Dúnmatsmenn verða að uppfylla öll eftirfarandi skilyrði til að geta óskað eftir því að verða skipaðir dúnmatsmenn:

• Hafa verulega reynslu af æðardúnstekju, meðhöndlun æðardúns og þekkingu á eiginleikum hans.
• Hafa sótt námskeið um dúnmat hjá Landbúnaðarháskóla Íslands þar sem farið er yfir helstu atriði er snúa að æðarfugli, æðardúnstekju, geymslu, meðhöndlun hreinsun og eiginleikum æðardúns. Á námskeiðinu skal dúnmatsmönnum veitt leiðsögn um mat á æðardúni þannig að gætt sé samræmis við mat alls staðar á landinu. Dúnmatsmenn skulu sækja námskeið um dúnmat á a.m.k. fimm ára fresti eða ávallt áður en starfsleyfi fellur úr gildi, enda hafi þeir í hyggju að leita eftir endurnýjun starfsleyfis.
• Hafa undirritað eiðstaf áður en þeir taka til starfa.
  Atvinnuvega- og nýsköpunarráðuneytið heldur námskeið fyrir dúnmatsmenn í samvinnu við Landbúnaðarháskóla Íslands, eru þau sérstaklega auglýst á heimasíðu ráðuneytisins.

Lögskipaðir dúnmatsmenn fá afhentar tangir og stimpil til að votta æðardún. Þá er dúnmatsmönnum heimilt að taka gjald vegna vinnu sinnar samkvæmt gjaldskrá sem atvinnuvega- og nýsköpunarráðuneytið staðfestir. Þá hvílir sú skylda á dúnmatsmönnum að þeim ber að skila árlega starfsskýrslu til sjávarútvegs- og landbúnaðarráðherra þar sem tilgreindir eru þeir aðilar sem æðardúnn hefur verið metin fyrir, framleiðslustig vöru, heildarþyngd vottaðs dúns og fjöldi útgefinna vottorða.

Atvinnuvega- og nýsköpunarráðuneytið gefur út staðfestingu fyrir útflytjendur æðardúns þess efnis að æðardúni sé hér á landi safnað samkvæmt hefð og með velferð fuglsins að leiðarljósi. Þá er einnig tilgreint í vottorði ráðuneytisins að viðkomandi æðardúnn sé vottaður af lögskipuðum dúnmatsmanni.