Tilkynning um ráðningu kennsluréttindanema

Í vissum tilvikum er heimilt að ráða til kennslustarfa einstakling sem ekki hefur kennsluréttindi.

Fjallað er um undanþáguheimildir vegna lausráðninga starfsmanna til kennslustarfa sem ekki eru kennarar í 19. gr. laga um menntun, hæfni og ráðningu kennara og skólastjórnenda við leikskóla, grunnskóla og framhaldsskóla, nr. 95/2019.

Sæki enginn aðili með leyfisbréf kennara um auglýst kennslustarf í grunn- eða framhaldsskóla, þrátt fyrir endurtekna auglýsingu, getur skólastjórnandi ráðið umsækjanda sem leggur stund á nám til kennsluréttinda til allt að tveggja ára, að fenginni staðfestingu frá viðkomandi skóla og áætlun um námsframvindu.

Skólastjórnendum er skylt samkvæmt lögum að tilkynna allar slíkar ráðningar til mennta- og barnamálaráðherra.

Tilkynna skal um ráðningu á eyðublaðavef Stjórnarráðsins og þarf að hafa til þess rafræn skilríki.

Í tilkynningunni skal koma fram:

• Nafn og kennitala umsækjanda um kennslustarf.
• Nafn skóla sem umsækjandi hyggst starfa við og þess sem sendir tilkynningu.
• Í hverju sérhæfing náms umsækjanda felst.
• Fjöldi lokinna eininga umsækjanda í námi til kennsluréttinda, ásamt staðfestingu háskóla á stöðu ferils.
• Á hvaða námsári umsækjandi er.
• Áætluð námslok.
• Dagsetningar fyrri og seinni auglýsingar, ásamt afriti auglýsingar.
  Með tilkynningu skal fylgja staðfesting háskóla á stöðu ferils (námsframvindu).

Mennta- og barnamálaráðuneytið hefur eftirlit með framkvæmd laga nr. 95/2019 og er heimilt á grundvelli þeirra að kalla eftir upplýsingum frá skólum um ráðningu í kennslustörf og er skólum skylt að veita þær upplýsingar.