06 Hagskýrslugerð og grunnskrár
Starfsemi á þessu málefnasviði er á ábyrgð forsætisráðherra og dómsmálaráðherra. Undir það heyrir einn málaflokkur sem sjá má í eftirfarandi töflu. Þar má jafnframt sjá fjárhagslega þróun málefnasviðsins og einstakra málaflokka á tímabilinu 2025–2027. Helstu áherslum, framtíðarsýn og meginmarkmiðum á málefnasviðinu er lýst í fjármálaáætlun. Markmið og mælikvarða sem sett hafa verið á málefnasviðinu má sjá á sérstöku mælaborði á vef Stjórnarráðsins.
Breytingar á útgjaldaramma eftir tilefnum
Myndin hér á eftir sýnir sundurliðaðar breytingar á útgjaldaramma málefnasviðsins eftir helstu tilefnum sem nánar er greint frá í inngangskafla málefnasviða.
Heildargjöld málefnasviðs 06 Hagskýrslugerð og grunnskrár árið 2027 eru áætluð 3.446,8 m.kr. og lækka um 263,4 m.kr. á föstu verðlagi fjárlaga 2026, eða sem svarar til 7,4%. Þegar tekið er tillit til áhrifa af almennum launa- og verðlagsbreytingum lækka útgjöldin um 112,1 m.kr. milli ára, eða sem svarar til 3,1%.
Myndin endurspeglar þá útfærslu og forgangsröðun sem unnin er út frá stefnumótun málefnasviðsins og þeim útgjaldaramma sem settur var í fjármálaáætlun 2027–2031. Sú niðurstaða getur eftir atvikum vikið frá þeim viðmiðum sem sett voru í fjármálaáætlun. Aðhaldsmarkmið málefnasviðsins felur m.a. í sér sértækar aðhaldsráðstafanir vegna aukinnar hagræðingar í opinberum innkaupum, fyrirhugaðrar sameiningar stofnana, fækkun stöðugilda hjá ríkinu auk almennrar aðhaldskröfu á málefnasviðið.
Hagræn skipting útgjalda
Í eftirfarandi töflu eru útgjöld málefnasviðsins, þróun fjárheimilda og fjármögnun frá árinu 2025 greind í fjóra þætti eftir hagrænni skiptingu, eins og nánar er greint frá í inngangskafla málefnasviða. Hagræn skipting útgjalda niður á málaflokka birtist í fylgiriti með frumvarpi til fjárlaga.
06.10 Hagskýrslugerð, grunnskrár og upplýsingamál
Undir málaflokknum eru tvær stofnanir og verkefni þeirra. Hagstofa Íslands heyrir undir forsætisráðherra og Þjóðskrá Íslands heyrir undir dómsmálaráðherra.
Í töflunni hér fyrir neðan má sjá helstu verkefni sem áformað er að ráðast í á árinu 2027 og hvaða markmið þau styðja við en markmið og mælikvarðar í hverjum málaflokki eru birt á sérstöku mælaborði á vefsíðu Stjórnarráðsins. Í framhaldi af töflunni eru dregnar fram helstu breytingar á fjármögnun verkefna frá fjárlögum ársins 2026. Þær fjárhæðir sem þar koma fram endurspegla ekki heildarfjárveitingar til verkefna nema í tilvikum þar sem breyting á milli ára felur í sér heildarfjármögnun verkefnisins.
| Helstu verkefni 2027 | Framkvæmdaraðili | Breyting á fjárveitingu |
| Markmið 1: Bæta aðgengi og tímanleika hagtalna | ||
| Endurbætur á þjóðhagsreikningum með áherslu á framleiðsluuppgjör. | Hagstofa Íslands | Innan ramma |
| Frekari þróun á fyrirtækjaskrá með upplýsingum um starfsstöðvar. | Hagstofa Íslands | Innan ramma |
| Innleiðing á samræmdum gagnaarkitektúr og styrking rekstraröryggis tækniinnviða. | Hagstofa Íslands | Innan ramma |
| Nýtt þjóðskrárkerfi (uppfærsla gagnagrunna og innfærsla nýrra skráningarupplýsinga) sem vistað er í skýi. | Þjóðskrá Íslands | Innan ramma |
| Markmið 2: Bæta gæði, framboð og aðgengi að opnum gögnum | ||
| Afhending skilríkja og skírteina á aðgengilegum stað með rúman opnunartíma. Þjónusta til hagsbóta fyrir fólkið í landinu. | Þjóðskrá Íslands | Innan ramma |
| Skilríki; innleiðing nýrra vegabréfa með öryggiskröfum í samræmi við alþjóðastaðla, ásamt hugbúnaði og tækjum til persónugerðar. | Þjóðskrá Íslands | Innan ramma |
| Ný skilríkjaskrá (gagnagrunnur) | Þjóðskrá Íslands | Innan ramma |
| Markmið 3: Auka framboð öruggrar, stafrænnar þjónustu | ||
| Þróun á rafrænni kjörskrá. | Þjóðskrá Íslands | innan ramma |
| Þróun á samræmdu auðkenni, „gerviauðkenni“, fyrir stofnanir eins og heilbrigðisstofnanir og löggæslu vegna einstaklinga sem ekki með eru með íslenska kennitölu. | Þjóðskrá Íslands | Innan ramma |
Heildarfjárheimild til málaflokksins fyrir árið 2027 er áætluð 3.446,8 m.kr. og lækkar um 263,4 m.kr. frá gildandi fjárlögum að frátöldum almennum launa- og verðlagsbreytingum en þær nema 151,3 m.kr.
Engar breytingar eru á hagrænni skiptingu innan málaflokksins.
Helstu breytingar á fjárheimildum málaflokksins eru eftirtaldar:
- Fjárheimild að fjárhæð 113 m.kr. vegna hagtölugerðar um lífeyrismál fellur niður.
- Hlutdeild málaflokksins í aðhaldskröfu málefnasviðsins nemur 95,1 m.kr. og er skipt niður á stofnanir og verkefni málaflokks.
Fjárlög fyrir árið 2027