19 Fjölmiðlun
Starfsemi á þessu málefnasviði er á ábyrgð menningar-, nýsköpunar- og háskólaráðherra. Undir það heyrir einn málaflokkur sem sjá má í eftirfarandi töflu. Þar má jafnframt sjá fjárhagslega þróun málefnasviðsins á tímabilinu 2025–2027. Helstu áherslum, framtíðarsýn og meginmarkmiðum á málefnasviðinu er lýst í fjármálaáætlun. Markmið og mælikvarða sem sett hafa verið á málefnasviðinu má sjá á sérstöku mælaborði á vef Stjórnarráðsins.
Breytingar á útgjaldaramma eftir tilefnum
Myndin hér á eftir sýnir sundurliðaðar breytingar á útgjaldaramma málefnasviðsins eftir helstu tilefnum, sem nánar er greint frá í inngangskafla málefnasviða.
Heildargjöld málefnasviðs 19 Fjölmiðlun árið 2027 eru áætluð 8.137,3 m.kr. og aukast um 605 m.kr. á föstu verðlagi fjárlaga 2026, eða sem svarar til 8%. Þegar tekið er tillit til áhrifa af almennum launa- og verðlagsbreytingum hækka útgjöldin um 610,7 m.kr. milli ára, eða sem svarar til 8,1%.
Myndin endurspeglar þá útfærslu og forgangsröðun sem unnin er út frá stefnumótun málefnasviðsins og þeim útgjaldaramma sem settur var í fjármálaáætlun 2027–2031. Sú niðurstaða getur eftir atvikum vikið frá þeim viðmiðum sem sett voru í fjármálaáætlun.
Hagræn skipting útgjalda
Í eftirfarandi töflu eru útgjöld málefnasviðsins, þróun fjárheimilda og fjármögnun frá árinu 2024 greind í fjóra þætti eftir hagrænni skiptingu, eins og nánar er greint frá í inngangskafla málefnasviða. Hagræn skipting útgjalda niður á málaflokka birtist í fylgiriti með fjárlögum.
19.10 Fjölmiðlun
Starfsemi málaflokksins er í höndum Fjölmiðlanefndar, Ríkisútvarpsins ohf. og einkarekinna fjölmiðla.
Í töflunni hér fyrir neðan má sjá helstu verkefni sem áformað er að ráðast í á árinu 2027 og hvaða markmið þau styðja við en markmið og mælikvarðar í hverjum málaflokki eru birt á sérstöku mælaborði á vefsíðu Stjórnarráðsins. Í framhaldi af töflunni eru dregnar fram helstu breytingar á fjármögnun verkefna frá fjárlögum ársins 2026. Þær fjárhæðir sem þar koma fram endurspegla ekki heildarfjárveitingar til verkefna nema í tilvikum þar sem breyting á milli ára felur í sér heildarfjármögnun verkefnisins.
| Helstu verkefni 2027 | Framkvæmdaraðili | Breyting á fjárveitingu |
| Markmið 1: Stuðningur við einkarekna fjölmiðla efli ritstjórnir fjölmiðla | ||
| Styrkja stöðu einkarekinna fjölmiðla með því að innleiða aðgerðir í aðgerðaáætlun um málefni fjölmiðla 2025–2030. | Menningar- , nýsköpunar- og háskólaráðuneyti | Innan ramma |
| Stuðla að umbótum sem styrkt geta fjölmiðlafrelsi á Íslandi. | Menningar-, nýsköpunar- og háskólaráðuneyti | Innan ramma |
| Markmið 2: Sjálfstætt ríkisútvarp sem nýtur trausts og sinnir vandaðri og aðgengilegri fjölmiðlaþjónustu í almannaþágu | ||
| Áhersla á leikið íslenskt efni til að auka framboð og gæði á leiknu íslensku sjónvarpsefni skv. þjónustusamningi. | RÚV | Innan ramma |
| Áfram verði unnið að því að nýta gervigreind til uppbyggingar á máltæknilausnum og sjálfvirkri textun í rauntíma á íslensku tal- og myndefni. | RÚV | Innan ramma |
| Innleiddar verði breytingar á ráðstöfun útvarpsgjalds og stafrænt auglýsingasölukerfi Ríkisútvarpsins tekið í notkun. | Menningar-, nýsköpunar- og háskólaráðuneyti og RÚV | Innan ramma |
| Markmið 3: Aukin stafræn færni, netöryggi og miðlalæsi allra aldurshópa, með áherslu á börn og ungmenni | ||
| Samanburðarrannsóknir á stafrænni færni, netöryggi og miðlalæsi. | Fjölmiðlanefnd | Innan ramma |
| Miðlalæsis-, gervigreindarlæsis- og netöryggisfræðsla í grunnskólum til að efla stafræna færni. | Fjölmiðlanefnd | Innan ramma |
| Borgarasamtal, fræðsla um netöryggi til viðkvæmra hópa, m.a. eldri borgara. | Fjölmiðlanefnd | Innan ramma |
Heildarfjárheimild til málaflokksins fyrir árið 2027 er áætluð 8.137,3 m.kr. og hækkar um 605 m.kr. frá gildandi fjárlögum að frátöldum almennum launa- og verðlagsbreytingum en þær nema 5,7 m.kr.
Ekki er um miklar breytingar á hagrænni skiptingu innan málaflokksins að ræða.
Helstu breytingar á fjárheimildum málaflokksins eru eftirtaldar:
- Fjárheimild málaflokksins er aukin um 330 m.kr. til samræmis við tekjuáætlun af útvarpsgjaldi.
- Í samræmi við áherslumál ríkisstjórnarinnar er lagt til að framlag til einkarekna fjölmiðla verði aukið um 300 m.kr.
- Aðhaldskrafa málaflokksins nemur 25 m.kr. sem er skipt hlutfallslega á stofnanir og verkefni málaflokksins.
Fjárlög fyrir árið 2027