Umsókn um innflutning

Sækja þarf um leyfi til innflutnings á búfé til matvælaráðuneytisins. Áður en leyfi til innflutnings á búfé eða erfðaefni þess er veitt þarf ráðherra að leita álits fagráðs í viðkomandi búgrein og skal það meta þörf eða hugsanlegan ábata fyrir íslenska búfjárrækt af slíkum innflutningi. Fagráðið skal svo gera tillögu til ráðherra um það hvaða kyn og tegund skuli flytja inn, með hvaða hætti og frá hvaða landi.

Matvælastofnun tekur við beiðnum um inn- og útflutning á gæludýrum samkvæmt lögum um innflutning dýra.

Sækja þarf um leyfi til innflutnings á nýjum dýrategundum eða erlendum stofnum tegunda til atvinnuvega- og nýsköpunarráðuneytisins sem afla skal umsagnar erfðanefndar landbúnaðarins. Einnig þarf að afla leyfis Náttúruverndarstofnunar samkvæmt 63. gr. laga um náttúruvernd.