Breytingar á landnotkun landbúnaðarlands

Lausn úr landbúnaðarnotum

Almennt gilda ákvæði skipulagslaga um breytingar á notkun lands sem fellur undir gildissvið jarðalaga. Í ákveðnum tilvikum er þó óheimilt að breyta landnotkun nema að ákveðin atriði sem tilgreind eru í 5. grein jarðalaga hafi verið metin:

• Hvort landið er stærra en þörf krefur að teknu tilliti til þeirra nýtingaráforma sem skipulagstillagan felur í sér. Jafnframt, eftir því sem við á, hvort aðrir valkostir um staðsetningu komi til greina fyrir fyrirhugaða nýtingu á landi sem hentar síður til landbúnaðar og þá sérstaklega jarðræktar.

• Hver áhrif breyttrar landnotkunar eru á aðlæg landbúnaðarsvæði, m.a. hvort hæfileg fjarlægð er milli lands með breyttri landnotkun og landbúnaðar sem fyrir er og hvort girt verði með nýtingaráformum fyrir möguleg búrekstrarnot af landinu í framtíðinni.

• Sveitarstjórn tekur ákvörðun um breytingar á landnotkun á grundvelli heildstæðs mats samkvæmt skipulagsáætlun og þeirra sjónarmiða sem greinir í 1. mgr.

• Við gerð aðalskipulags í dreifbýli skal land flokkað með tilliti til ræktunarmöguleika. Ráðherra gefur út leiðbeiningar um flokkun ræktarlands í samráði við yfirvöld skipulagsmála.

Sá sem vill breyta skipulagi lands til að losa það úr landbúnaðarnotum á því að snúa sér til sveitarfélagsins þar sem landareignin er staðsett.  Við afgreiðslu málsins er sveitarfélaginu skylt að taka mið af ofangreindum ákvæðum jarðalaga.