17 júní 2024
/
Daufur skuggi, fánar í íslenskri myndlist
Fánar eru tákn sem gegna margs konar hlutverki. Þjóðfánar eru tákn lands og þjóðar og lög um íslenska fánann voru fyrstu lögin sem voru samþykkt á eftir stjórnarskránni 17. júní árið 1944. Íslenski fáninn fékk hins vegar staðfestingu konungs þegar árið 1915.
Í Sýningarstofu Safnahússins við Hverfisgötu verður sjónum beint að fjölbreyttum verkum úr safneign Listasafns Íslands þar sem fánar eru útgangspunkturinn. Fánarnir eru af ýmsu tagi: pappírsfánar, tréfánar, ósýnilegir fánar, prjónaðir í sauðalitunum og í málverki. Tvö elstu verkin á sýningunni eru eftir Þórarin B. Þorláksson. Annars vegar málverk af svokallaðri fánanefnd og hins vegar af Alþingishúsinu, þar sem íslenski fáninn blaktir við hún. Yngsta verkið á sýningunni, Daufur skuggi, er textílverk frá 2015 eftir Unnar Örn Auðarson Jónasson.
Staðsetning og dagsetning: Safnahúsið við Hverfisgötu, 17. júní – 25. ágúst 2024