Úrskurðarnefnd um upplýsingamál

Úrskurðarnefnd um upplýsingamál er starfrækt á grundvelli V. kafla upplýsingalaga nr. 140/2012 til að leysa úr ágreiningsmálum um aðgang almennings að upplýsingum hjá stjórnvöldum. Nefndin er sjálfstæð og óháð stjórnsýslunefnd sem skipað er til hliðar við hið almenna stjórnkerfi ríkis og sveitarfélaga. Valdsvið nefndarinnar nær til allrar stjórnsýslu hins opinbera án tillits til á hvaða stjórnsýslustigi ákvörðun er tekin. Aðili þarf því ekki að tæma aðrar kæruleiðir innan stjórnsýslunnar áður en til hennar er leitað. Úrskurðir nefndarinnar eru endanlegir og verður ekki skotið annað innan stjórnsýslunnar. Þeir hafa því jafnframt fordæmisgildi fyrir önnur stjórnvöld og stuðla þannig að auknu samræmi í framkvæmd upplýsingalaganna.

Sjá nánar um kæruheimild og verklagsreglur nefndarinnar.

Skipan úrskurðarnefndar

Samkvæmt 21. gr. upplýsingalaga nr. 140/2012 skipar forsætisráðherra þrjá menn í úrskurðarnefnd um upplýsingamál til fjögurra ára í senn og jafnmarga til vara. Tveir nefndarmenn og varamenn þeirra skulu uppfylla starfsgengisskilyrði héraðsdómara. Skal annar þeirra vera formaður nefndarinnar en hinn varaformaður. Nefndarmenn mega ekki vera fastráðnir starfsmenn í Stjórnarráði Íslands. Sjá skipan úrskurðarnefndar.

Nefndin er sjálfstæð í störfum sínum og óháð öðrum stjórnvöldum. Nefndin nýtur þó ritara og skrifstofuþjónustu úr forsætisráðuneytinu og má beina kærum til nefndarinnar á netfangið [email protected]. Einnig er unnt að senda kæru til nefndarinnar með því að fylla út rafrænt eyðublað á vef Stjórnarráðsins, mínar síður (sjá leiðbeiningar um notkun á mínum síðum).

Ritari nefndarinnar er Egill Pétursson.

Hér fyrir neðan eru allir úrskurðir nefndarinnar. Á annarri síðu er hægt að nota fullkomnari leit sem tekur t.d. tillit til beygingar orða og þar er einnig hægt að leita innan ákveðins árs.

 Sýni 1201-1250 af 1406 niðurstöðum
A-203/2005 Úrskurður frá 11. apríl 2005
Kærð var synjun yfirdýralæknis um að veita aðgang að öllum gögnum er fyrir lægju hjá embættinu vegna umsagna þess til landbúnaðarráðuneytisins um löggildingu sláturhúsa í tilteknum sveitarfélögum. Einnig var farið fram á aðgang að skýrslum vegna árlegs eftirlits með þessum sláturhúsum á yfirstandandi ári. Einni kæru skipt upp í fleiri mál. Mikilvægir fjárhags- eða viðskiptahagsmunir fyrirtækja og annarra lögaðila. Aðgangur veittur.
A-200/2005 Úrskurður frá 30. mars 2005
Kærð var synjun landbúnaðarráðuneytisins um að afhenda ættbók Cocker Spaniel hundsins [A]. Kærufrestur. Frávísun.
A-198/2005 Úrskurður frá 30. mars 2005
Kærð var synjun landbúnaðarráðuneytisins, um að veita aðgang að öllum gögnum um síðustu löggildingu sláturhúss [A], þ. á m. að umsögn embættis yfirdýralæknis um málið og gögnum henni tengdri. Mikilvægir fjárhags- eða viðskiptahagsmunir fyrirtækja og annarra lögaðila. Tilgreining máls eða gagna í máli. Aðgangur veittur.
A-199/2005 Úrskurður frá 25. febrúar 2005
Kærð var synjun Bændasamtaka Íslands um að veita aðgang að lista yfir greiðslumark í fjárbúskap. Jafnframt fór kærandi fram á að fá aðgang að lista yfir mjólkurkvóta allra framleiðenda á landinu. Beiðni um aðgang ekki beint að réttu stjórnvaldi. Gildissvið gagnvart lögum um persónuvernd og meðferð persónuupplýsinga. Kerfisbundin skráning og vinnsla upplýsinga. Stjórnvaldsákvörðun. Tilgreining máls eða gagna í máli. Frávísun á báðum kröfum.
A-196/2005 Úrskurður frá 26. janúar 2005
Kærð var synjun yfirdýralæknis um að veita aðgang að öllum gögnum er fyrir lægju hjá embættinu vegna umsagna þess til landbúnaðarráðuneytisins um löggildingu sláturhúsa í tilteknum sveitarfélögum. Einnig var farið fram á aðgang að skýrslum vegna árlegs eftirlits með þessum sláturhúsum á yfirstandandi ári. Beiðni um aðgang ekki beint að réttu stjórnvaldi. Einni kæru skipt upp í fleiri mál. Mikilvægir fjárhags- eða viðskiptahagsmunir fyrirtækja og annarra lögaðila. Frávísun á fyrri kröfu. Aðgangur veittur skv. seinni kröfu.
A-197/2005 Úrskurður frá 26. janúar 2005
Kærð var synjun Hafnarfjarðarbæjar um að veita aðgang að yfirliti yfir allar samþykktar íbúðir norðan Reykjanesbrautar. Tilgreining máls eða gagna. Leiðbeiningar um afmörkun beiðni. Frávísun staðfest.
A-195/2004 Úrskurður frá 30. desember 2004
Kærð var synjun utanríkisráðuneytisins um að veita aðgang að gögnum um viðræður forsætisráðherra og utanríkisráðherra við aðstoðarutanríkisráðherra Bandaríkjanna 5. júní 2003. Vinnuskjal sem stjórnvald hefur ritað til eigin afnota. Öryggi og varnir ríkisins. Samskipti við önnur ríki. Synjun staðfest.
A-191/2004 Úrskurður frá 22. desember 2004
Kærð var synjun utanríkisráðuneytisins um að veita aðgang gögnum um árás á íslenska friðargæsluliða í Kabúl í Afganistan 23. október 2004. Vinnuskjal sem stjórnvald hefur ritað til eigin afnota. Einkamálefni einstaklinga. Samskipti við önnur ríki eða fjölþjóðastofnanir. Aðgangur veittur að hluta skjals.
A-194/2004 Úrskurður frá 17. desember 2004
Kærð var synjun Flugstöðvar Leifs Eiríkssonar hf. um að veita aðgang að gögnum um bílagæslu við flugstöðina og meðferð utanríkisráðuneytisins á sams konar beiðni.Gildissvið upplýsingalaga. Gögn ekki í vörslum stjórnvalds. Kæruheimild. Frávísun.
A-193/2004 Úrskurður frá 16. desember 2004
Kærð var synjun dóms- og kirkjumálaráðuneytisins um að veita aðgang að bréfi frá einum umsækjenda um embætti hæstaréttardómara. Umsóknir um störf hjá ríki eða sveitarfélögum og öll gögn sem þau varða. Synjun staðfest.
A-192/2004 Úrskurður frá 2. desember 2004
Kærð var synjun Reykjavíkurhafnar um að veita óskoraðan aðgang að samningi hafnarinnar um útvegun fyllingarefnis fyrir höfnina á árunum 1997 til 1999 og að framlengingu samningsins til og með árinu 2003. Málshraði. Form aðgangs. Mikilvægir fjárhags- eða viðskiptahagsmunir fyrirtækja. Samkeppni. Samkeppnishagsmunir hins opinbera. Aðgangur veittur. Afhenda ber ljósrit af undirrituðu frumriti.
A-189/2004 Úrskurður frá 18. nóvember 2004
Kærð var synjun Umhverfisstofnunar um að veita aðgang að dagbók hundaræktar, sem stofnunin hafði aflað í eftirlits skyni. Mikilvægir fjárhags- eða viðskiptahagsmunir fyrirtækja. Synjun staðfest.
A-190/2004 Úrskurður frá 15. nóvember 2004
Kærð var synjun Fiskistofu um að veita aðgang að upplýsingum um á milli hvaða aðila viðskipti með aflamark í þorski fóru fram 13. september 2004. Gildissvið upplýsingalaga gagnvart lögum um persónuvernd og meðferð persónuupplýsinga. Tilgreining máls. Frávísun.
A-188/2004 Úrskurður frá 27. september 2004
Kærð var synjun skrifstofu hæstaréttar um að veita að gang að nöfnum meðmælenda frambjóðenda við kjör forseta Íslands 26. júní 2004. Gildissvið upplýsinglaga. Frávísun.
A-187/2004 Úrskurður frá 27. september 2004
Kærð var synjun Heilbrigðisstofnunar Austurlands um að veita aðgang að samningi um heilbrigðisþjónustu á virkjanasvæði Kárahnjúkavirkjunar. Mikilvægir fjárhags- eða viðskiptahagsmunir fyrirtækja. Samkeppni. Aðgangur veittur.
A-185/2004 Úrskurður frá 23. ágúst 2004
Kærð var synjun Reykjavíkurborgar, um að veita aðgang að launaseðlum þriggja nafngreindra starfsmanna borgarinnar á þriggja ára tímabili. Persónuupplýsingar. Fyrirliggjandi gögn. Frávísun.
A-186/2004 Úrskurður frá 23. ágúst 2004
Kærð var synjun Flugmálastjórnar um að veita aðgang að fundargerðum aðalvarðstjórafunda hjá flugumferðarþjónustu stofnunarinnar frá hluta árs 1999 og aðgang að dagbókum flugturnsins í Reykjavík fyrir tímabilið 1987 til 1990. Fundargerðir. Vinnuskjöl. Tilgreining máls. Fjöldi mála. Synjun staðfest.
A-179/2004 Úrskurður frá 4. ágúst 2004
Kærð var synjun sýslumannsins í Vestmannaeyjum um að veita aðgang að upplýsingum um tilboð sem borist höfðu í auglýsingar í bæjarblöðunum. Tilboð. Mikilvægir fjárhags- og viðskiptahagsmunir fyrirtækja. Samkeppnissjónarmið. Aðgangur veittur.
A-184/2004 Úrskurður frá 4. ágúst 2004
Kærð var synjun Ríkisútvarpsins um að veita aðgang að gögnum sem lögð voru fram á fundi útvarpsráðs 17. maí 2004. Fundargerðir. Vinnugögn. Samkeppnisstaða opinberrar stofnunar. Mikilvægir almannahagsmunir. Upplýsingar sem ekki verður aflað annars staðar frá. Aðgangur veittur að hluta.
A-183/2004 Úrskurður frá 27. júlí 2004
Kærð var synjun forsætisráðuneytisins um að veita aðgang að lista um greiðslur fyrir nefndarstörf á tilteknu tímabili. Einka- og fjárhagsmálefni einstaklinga. Synjun staðfest.
A-182/2004 Úrskurður frá 14. júlí 2004
Kærð var synjun Borgarskjalasafns um að veita aðgang að gögnum um afa og ömmu kæranda. Einka- og fjárhagsmálefni einstaklinga. Heilbrigðisupplýsingar. Upplýsingar varða kæranda sjálfan. Aðgangur veittur að hluta.
A-181/2004 Úrskurður frá 2. júlí 2004
Kærð var synjun fjármálaráðuneytisins um að veita kæranda aðgang að upplýsingum um heildargreiðslur ríkisins til fyrirtækis í tengslum við verksamning og hugbúnaðarkaup á grundvelli útboðs Ríkiskaupa. Bókhaldsgögn. Fyrirliggjandi gögn. Mikilvægir fjárhags- og viðskiptahagsmunir. Synjun staðfest.
A-180/2004 Úrskurður frá 10. júní 2004
Kærð var synjun Nýsköpunarsjóðs atvinnulífsins um að veita aðgang að upplýsingum um söluverð og greiðsluskilmála á tilteknu vörumerki. Mikilvægir fjárhags- og viðskiptahagsmunir fyrirtækja. Upplýsingar varða kæranda sjálfan. Aðgangur veittur.
A-176/2004 Úrskurður frá 28. maí 2004
Kærð var synjun fjármálaráðuneytisins að veita aðgang að bréfi til innheimtumanna ríkissjóðs um skuldajöfnun vaxta- og barnabóta. Fyrirliggjandi gögn. Frávísun.
A-177/2004 Úrskurður frá 28. maí 2004
Kærð var synjun Vestmannaeyjabæjar um að veita aðgang að lána-, gjaldmiðla- og vaxtaskiptaamningum vegna uppgjörs á gjaldeyrisskiptasamningi frá árinu 2001. Samningur. Mikilvægir fjárhags- og viðskiptahagsmunir fyrirtækis. Þagnarskylda. Aðgangur veittur að hluta.
A-178/2004 Úrskurður frá 28. maí 2004
Kærð var synjun bókasafns Vestmannaeyja um aðgang að upplýsingum um umsækjendur um starf bókavarðar. Umsækjendur um opinber störf. Aðgangur veittur.
A-173/2004 Úrskurður frá 24. maí 2004
Kærð var synjun Akureyrarbæjar um að veita aðgang að upplýsingum um leigu bílaleigubíla hjá Akureyrarbæ. Bókhaldsgögn. Fyrirliggjandi gögn. Synjun staðfest.
A-174/2004 Úrskurður frá 24. maí 2004
Kærðar voru synjanir forsætisráðuneytisins um að veita aðgang að upplýsingum um utanferðir forsætisráðherra. Bókhaldsgögn. Fyrirliggjandi gögn. Fjöldi mála. Synjun staðfest.
A-175/2004 Úrskurður frá 24. maí 2004
Kærð var synjun formanns nefndar skv. 5. mgr. 3. gr. laga nr. 97/1990 um heilbrigðisþjónustu um að veita aðgang að öllum niðurstöðum nefndarinnar á tilteknu árabili. Ótiltekinn fjölda mála. Þagnarskylda. Synjun staðfest.
A-172/2004 Úrskurður frá 24. maí 2004
Kærð var synjun Kópavogsbæjar um að veita aðgang að upplýsingum um leigu bílaleigubíla hjá Kópavogsbæ. Bókhaldsgögn. Fyrirliggjandi gögn. Synjun staðfest.
A-170/2004 Úrskurður frá 26. mars 2004
Kærð var synjun Fiskræktarsjóðs um að veita aðgang að upplýsingum um umsóknir um styrki og styrkveitingar úr sjóðnum á árunum 2002 og 2003. Leiðbeiningarskylda stjórnvalda. Kærufrestur. Almannahagsmunir. Meðferð almannafjár. Fundargerðir. Aðgangur veittur.
A-171/2004 Úrskurður frá 15. mars 2004
Kærð var synjun Landmælinga Íslands um að veita aðgang að áskriftarsamningi við ríkisstofnanir um aðgang að hæðarlíkani af Íslandi, svo og að nánar tilgreindum upplýsingum þar að lútandi. Vinnuskjal til eigin afnota. Samningur. Fyrirhugað útboð. Aðgangur veittur að hluta.
A-169/2004 Úrskurður frá 1. mars 2004
Kærð var synjun framkvæmdanefndar um einkavæðingu um að veita aðgang að kaupsamningi og umfjöllun um sölu á hlut íslenska ríkisins í Íslenskum aðalverktökum hf. í fundargerðum nefndarinnar. Fundargerðir. Vinnuskjöl stjórnvalds. Samningur. Mikilvægir fjárhags- og viðskiptahagsmunir fyrirtækis. Aðgangur veittur.
A-168/2004 Úrskurður frá 20. febrúar 2004
Kærð var synjun fjármálaráðuneytisins um að veita aðgang að upplýsingum um fjölda notendaleyfa og greiðslur fyrir aukaverk í tengslum við verksamning og hugbúnaðarkaup á grundvelli útboðs Ríkiskaupa í janúar 2001. Framkvæmd útboðs. Upplýsingar sem varða kæranda sjálfan. Mikilvægir fjárhags- og viðskiptahagsmunir fyrirtækis. Fyrirliggjandi gögn. Aðgangur veittur.
A-166/2003 Úrskurður frá 17. desember 2003
Kærð var synjun dóms- og kirkjumálaráðuneytisins og ríkislögreglustjóra um að veita aðgang að gögnum um andlát sonar kærenda. Rannsókn í opinberu máli. Samskipti við erlend stjórnvöld. Upplýsingar er varða kærendur sjálfa. Frávísun að hluta. Aðgangur veittur að hluta.
A-167/2003 Úrskurður frá 17. desember 2003
Kærð var meðferð forsætisráðuneytisins og synjun utanríkisráðuneytisins á beiðni um að veita aðgang að gögnum um andlát sonar kærenda. Rannsókn í opinberu máli. Samskipti við erlend stjórnvöld. Upplýsingar varða kærendur sjálfa. Frávísun að hluta. Aðgangur veittur að hluta.
A-165/2003 Úrskurður frá 28. október 2003
Kærð var synjun Landspítala háskólasjúkrahúss um aðgang að upplýsingum um föst laun læknaritara og skrifstofustjóra á sjúkrahúsinu. Óskað aðgangs að mörgum stjórnsýslumálum. Einka- og fjárhagsmálefni einstaklinga. Persónuvernd. Aðgangur veittur.
A-164/2003 Úrskurður frá 3. september 2003
Kærð var synjun framkvæmdanefndar um einkavæðingu um að veita aðgang að mati á tilboðum í útboði á hlut ríkisins í Íslenskum aðalverktökum hf. og að tilboðum annarra tilboðsgjafa í útboðinu. Upplýsingar er varða kæranda sjálfan. Fjárhags- og viðskiptahagsmunir fyrirtækja. Vinnuskjal stjórnvalds. Aðgangur veittur.
A-162/2003 Úrskurður frá 10.júlí 2003
Kærð var synjun Umhverfisstofnunar um aðgang að gögnum um úthlutun innflutningskvóta klórflúorkolefnis og vetnisklórflúorkolefnis 1999 til 2002, svo og um markaðshlutdeild hlutaðeigandi innflytjenda á árinu 1989. Úthlutun innflutningsleyfa. Fjárhags- og viðskiptahagsmunir fyrirtækja. Þagnarskylda. Fyrirliggjandi gögn. Upplýsingar er varða kæranda sjálfan. Aðgangur veittur.
A-163/2003 Úrskurður frá 10. júlí 2003
Kærð var synjun Umhverfisstofnunar um að veita aðgang að minnisblaði um eftirlitsferð dýralæknis í hundaræktarbú. Fjárhags- og viðskiptahagsmunir fyrirtækis. Þagnarskylda. Almannahagsmunir. Aðgangur veittur.
A-161/2003 Úrskurður frá 26. júní 2003
Kærð var synjun iðnaðarráðuneytisins um aðgang að gögnum um kaup Orkubús Vestfjarða á Hitaveitu Dalabyggðar. Minnisblað ráðherra. Skjöl tekin saman fyrir ráðherrafund. Vinnuskjöl til eigin afnota. Synjun staðfest.
A 160/2003 Úrskurður frá 23. júní 2003
Kærð var synjun Umhverfisstofnunar um að veita aðgang að hæfnisprófum veiðimanna. Aðgangur að prófverkefnum. Almannahagsmunir. Synjun staðfest.
A-159/2003 Úrskurður frá 7. febrúar 2003
Kærð var synjun forsætis-, fjármála- og utanríkisráðuneyta um að veita aðgang að upplýsingum um utanferðir forsætis-, fjármála- og utanríkisráðherra, m.a. fjölda ferða, kostnað við hverja ferð og greiðslur dagpeninga. Meðferð persónuupplýsinga. Fyrirliggjandi gögn. Óskað aðgangs að skjölum úr mörgum stjórnsýslumálum. Synjun staðfest að hluta. Aðgangur veittur að hluta.
A-158/2003 Úrskurður frá 20. janúar 2003
Kærð var synjun Vegagerðarinnar um að veita bæjarstjórn Vestmannaeyja aðgang að samningi við skipafélag um rekstur ferjunnar Herjólfs. Kæra frá stjórnvaldi. Samningur. Kærufrestur. Leiðbeiningarskylda stjórnvalda. Samkeppnisstaða hins opinbera. Fjárhags- og viðskiptahagsmunir. Aðgangur veittur að hluta.
A-157/2002 Úrskurður frá 30. desember 2002
Kærð var synjun dóms- og kirkjumálaráðuneytisins um að veita aðgang að úrlausnum úr heimaverkefnum sem fengu jákvæða umsögn dómnefndar í prófum um dómtúlka og skjalaþýðendur. Mat á prófúrlausnum. Þagnarskylda. Skýring upplýsingalaga. Gildissvið upplýsingalaga. Einkahagsmunir annarra. Veittur aðgangur að hluta.
A-156/2002 Úrskurður frá 9. desember 2002
Kærð synjun utanríkisráðuneytisins um að veita aðgang að kröfulista þjóða í yfirstandandi viðræðum á grundvelli alþjóðlegs samnings. Samkeppni. Trúnaðarmál. Almannahagsmunir. Samskipti íslenska ríkisins við erlend ríki og fjölþjóðastofnanir. Synjun staðfest.
A-1552002 Úrskurður frá 8. nóvember 2002
Kærð var meðferð landlæknis á beiðni um aðgang að gögnum er vörðuðu veikindi móður beiðanda. Þagnarskylda. Skýring upplýsingalaga. Gildissvið. Lögvarðir hagsmunir. Upplýsingaréttur aðila. Kæruheimild. Frávísun.
A-154/2002 Úrskurður frá 25. október 2002
Kærð var synjun forsætisráðuneytisins um aðgang að tilteknum gögnum um sölu á hlut ríkisins í Landsbanka Íslands hf. Fyrirhugaðar ráðstafanir. Brottfall takmarkana. Viðskiptahagsmunir. Einka- og fjárhagshagsmunir einstaklinga og fyrirtækja. Skýring upplýsingalaga. Aðgangur veittur.
A-153/2002 Úrskurður frá 22. október 2002
Kærð var synjun landlæknis um aðgang að bréfi hans til yfirlæknis um starfsleyfi til handa kínverskum lækni. Einka- og fjárhagshagsmunir einstaklinga. Kæruheimild. Aðgangur veittur.
A-152/2002 Úrskurður frá 8. ágúst 2002
Kærð var synjun dóms- og kirkjumálaráðuneytisins um að veita aðgang að bréfi til flugfélags vegna tiltekinna öryggisráðstafana í tengslum við opinbera heimsókn þjóðhöfðingja til Íslands. Lögskýring. Takmarkanir á upplýsingarétti vegna almannahagsmuna. Einkahagsmunir einstaklinga. Öryggi ríkisins. Stjórnarskrá. Aðgangur að hluta.

Úrskurðarnefnd um upplýsingamál